ހައިވާނު ބަގީޗާއެއްގެ ތެރެއިން ހިނގާފައި ދިޔަ ދެމަފިރިއަކަށް ރާމާމަކުނު ތަކެއް ފެނުނުނެވެ. އެތަނުން ވަކިން ޖޯޑެއް (އަންހެން މަކުނަކާއި ފިރިހެން މަކުނެއް) ނިކަން ލޯބިން އެކަތި އަނެކައްޗާއި އޮޅުލާ ބައްދާ ހީ ސަމާސާ ކުރަނިކޮށް ފެނުނެވެ. އެވަގުތު އަނބިމީހާ އެ މަންޒަރު ފިރިމީހާއާއަށް ދައްކާލަމުން ބުންޏެވެ.
”ބަލާބަލާށެވެ، މިއީ ހާދަ ލޯބިން އުޅޭ މަކުނުތަކެކެވެ. ދެ މީހުން އެކަކު އަނެކަކާ ކުޅެ ސަކަރާތް ޖަހާތަން ލޯތްބެއް ނޫން ހެއްޔެވެ“
އަނބިމީހާ ގެ ވާހަކައަށް ފިރިމީހާ ވަކި ޖަވާބެއް ނުދީ ހިނިތުންވެލިއެވެ. އަދި ދެމީހުން ހައިވާނު ބަގީޗާގެ ތެރެއިން މަޑުމަޑުން ހިނގަމުން ދިޔައެވެ. ވަކި ހިސާބަކުން ސިންގާ އެއް ފެނުނެވެ. ބަލާބެލުމަށް ޖޯޑެއްގެ ގޮތަށް ފެނުނަސް އަންހެން ސިންގާއާއި ތަންކޮޅެއް ދުރުގައި ބަނޑު ޖަހާލައިގެން ދުރަށް ބަލަހައްޓައިގެން ފިރިހެން ސިންގާ އެއް އިނެވެ. ދެ މީހުންވެސް ތިބީ އެމީހުންގެ އަމިއްލަ ދުނިޔެއެއްގަ ކަހަލަ ގޮތަކަށެވެ. އެ މަންޒަރު ފެނުމުން ފިރިމީހާގެ ގައިގަ ކޮއްޓާލާފަ ސިންގާތައް ދައްކާލަމުން އަނބިމީހާ ބުންޏެވެ.
”ބަލާބަލާށެވެ. އެއީ ޖޯޑެކެވެ. އެހެން ވިޔަސް އެ ފިރިހެން ސިންގާ އޭނީ ތަންކޮޅެއް ދުރުގައި އެހެން ކަމަކަށް ގެއްލިފައެވެ. ހީވަނީ ލޯތްބެއް ނެތް ހިތާމައިގެ ތަސްވީރެއްހެންނެވެ.“
އެ ވަގުތު ފިރިމީހާވެސް އެ ދެ ޖަނަވާރަށް ބަލާލުމަށް ފަހު އަނބިމީހާ ކައިރި ކުޑަ ގާބުރިއެއް ކަހަލަ އެއްޗެއް އަންހެން ސިންގާއާއި ދިމާއަށް އެއްލަން ބުންޏެވެ. ދެން ވާގޮތް ބަލާނި އެވެ. އަންހެން މީހާ ބިންމަތިން ކުޑަ ގާކޮޅެއް ނަގާ އަންހެން ސިންގާއަށް އެއްލުމާއި އެކު ސިކުންތެއްނުވެ ފިރިހެން ސިންގާ ވަގުތުން އައިސް އަންހެން ސިންގާ ކުރިމައްޗަށް އަރާ ރުޅިވެރި ކަމާއެކު އެ ދެމަފިރިންނާ ދިމާއަށް އަޑުލައްވައިގަތެވެ. އެ ވަގުތު އަންހެން ސިންގާގެ ގެނެސް ފިރިހެން ސިންގާގެ ނިވަލަށް ލައި ފޮރުވައިފިއެވެ.
ފިރިމީހާ ބުންޏެވެ. މި ކަހަލަ ކުޑަ ގާކޮޅެއް މަކުނު ތަކާ ދިމާއަށްވެސް އެއްލާށެވެ. އަނބިމިހާ މަކުނު ތަކާ ހިސާބަށް ގޮއްސަ ބިންމަތިން ކުޑަ ގާކޮޅެއް ނަގާ މަކުނު ގެ ޖޯޑާ ދިމާއަށް އެއްލިއެވެ. އެ ގާކޮޅު ބިމުގަ ނުޖެހެނީސް ދޭތި ދުއްވައިގަތި ދެކޮޅަށެވެ. ފިރިހެން މަކުނު ތެޅެމުން ފޮޅެމުން ގަހުގެ އެއްގޮފިން އަނެއް ގޮފިން އެލެމުން ގޮސް ލޯމަތިން ގެއްލިއްޖެއެވެ. އަންހެން މަކުނުވެސް ގަހެއްގެ ގޮފިގަނޑަށް އަރާ އެކޮޅު ބަލާލީއެވެ. ފިރިހެން މަކުނު ފެންނަންވެސް ނެތެވެ.
އެ ވަގުތު ފިރިމީހާ ބުންޏެވެ.
ބޭރުފުށުން ފެންނަ މަންޒަރަކީ އަސްލެއް ކަމަށް ނުވެދާނެއެވެ. މިހާރަކަށް އައިސް ސޯސަލް މީޑިއާއިންނާއި އެހެނިހެން ވެސް ގޮތްގޮތުން ތިމާ ކިހާ ލޯބިވާކަން އެހެން މީހުންނަށް ދައްކަނީއެވެ. ގިނައިން ދެއްކުންތެރިވީ ވަރަކަށް ހަގީގީބައި ކުޑަވެއެވެ. އެހެން އުޅެން ޖެހެނީ ކޮންމެވެސް ކަމެއް ގޯސްވެގެނެވެ. ހަގީގީ ލޯތްބަކީ އެ ދެމީހުންގެ އެކަކު އަނެކަކަށް އިންނަ ގުޅުމެވެ. އެންމެ ބޭނުން ޖެހޭ ވަގުތެއްގައި އެ ލޯބި ފެނެއެވެ. އެ ލޯބޮ ހިތުގައި އަދި ކޮންމެ ޖަޒުބާތެއްގައި ހުރެއެވެ. ބޭރު ފުށުން ފެންނަ ކޮންމެ މަންޒަރަކަށް ރޭރުނުވާން ޖެހެނީ މިހެންވެގެންނެވެ.
ހިތާމައަކީ މި ޒަމާނުގައި މަކުނުތައް ގިނަވެ ސިންގާ މަދުވީމައެވެ.
