ރަހުމުކުޑަ ޓެކްސީ ޑްރައިވަރުގެ ދިފާއުގައި ނަލަ ޓެކްސީން ބަޔާނެއް ނެރެފިއެވެ.
ޓެކްސީއަކަށް ހޮޑުލެވުނު 1 އަހަރުގެ ކުޑަ ކުއްޖާ އަދި އޭނަގެ މަންމައަށް ކަންތައްކުރި އިހާނަތްތެރިގޮތްތައް މީޑިއާތަކުން ރިޕޯޓު ކުރުމުން ނަލަ ޓެކްސީން ވަނީ އެއީ ކަން ހިނގިގޮތް ނޫން ކަމަށް ބުނެ ބަޔާނެއް ނެރެފައެވެ. ނަލަ ޓެކްސީ އަށް ނިސްބަތްވާ އެ ޑްރައިވަރުގެ އަމަލުތަކަށް މާފަށް އެދުމުގެ ބަދަލުގައި ނަލަ ޓެކްސީން ވަނީ ޕަސިންޖަރުންނާއި އަދި އާއްމުންނަށް ވަރަށް ބޮޑަށް ފާޑުކިޔައި ޑްރައިވަރުގެ ލާއިންސާނީ އަމަލުތަކަށް ހިތްވަރުދީފައެވެ.
އާއްމުންގެ ފާޑުކިޔުން އަމާޒުވެފައިވާ މި މައްސަލާގައި ކަންވީ ގޮތްކަމަށް ފަސިންޖަރު ބުނަނީ، ހުޅުމާލެއިން 5 ނަމްބަރު ޖެޓީއަށް ދާން އެރި ޓެކްސީއަށް އޭނަގެ 1 އަހަރުގެ ކުޑަ ދަރިފުޅަށް ހޮޑުލެވުނު ކަމަށެވެ. އެކަން ހިނގުމުން ޓެކްސީ ޑްރައިވަރު ވަރަށް ބޮޑަށް ރުޅިއައިސް، ޕަސިންޖަރަށް ހަޑި ބަހުން މުހާތަބުކުރި ކަމަށެވެ. އަދި އެކަމުގެ ބަދަލެއްގެ ގޮތުން 1500 ރުފިޔާ ދިނުމަށްވެސް ތަކުރާރުކޮށް ޑިމާންޑު ކުރަމުންދިޔަ ކަމަށްވެސް ޕަސިންޖަރު ބުނެފައިވެއެވެ. މަންމައަކާއި ކުޑަ ދެކުދިން ކާރުން ފައިބަން ހުއްދަދިނީ 1000 ރުފިޔާ ދިނުމުންނެވެ.
މި މައްސަލާގައި އާއްމުންގެ ފާޑުކިޔުންތައް އަމާޒުވުމުން، މި ޓެކްސީގެ ހިދުމަތްދޭ ސެންޓަރު ނަލަ ޓެކްސީން މި ކަމަށް އެއްވެސް ފިޔަވަޅެއް އަޅާފައި ނުވެއެވެ. އޭގެ ބަދަލުގައި މި ފަދަ ޑްރައވަރުންނަށް ހިތްވަރު ލިބޭ ގޮތަށް ވަނީ ބަޔާނެއް ނެރެފައެވެ. މި ބަޔާނަށް ރައްދުދީ އާއްމުން ބުނަމުން ދަނީ ނަލަ ޓެކްސީގެ ހިދުމަތް ހޯދުން ރައްކާތެރިނޫން ކަމަށާއި މި ފަދަ ޓެކްސީ ސެންޓަރުތަކުގެ މައްސަލަ ފުލުހުން ބަލަން ޖެހޭނެ ކަމަށެވެ.
