މިއަދު ބަޒާރުގައި ލުނބޯގެ އަގު އިންތިހާއަށް އުފުލިއްޖެއެވެ. ވޭތުވެދިޔަ ހަފްތާތަކުގައި ލުނބޯ ކިލޯގެ އަގު 20 ރުފިޔާއިން ފެށިގެން 35 ރުފިޔާއަށް ހުރި އިރު މިއަދު ހުރީ 100 ރުފިޔާއިން ފެށިގެން 130 ރުފިޔާއާއި ދެމެދުގެ އަގުތަކެއްގައެވެ. ބާޒާރުގައި އަގުބޮޑުކޮށް ލުނބޯ ހުރިއިރު ގިނަ ތަންތަނުގައި ހުރީވެސް ދުވަސްވެ ތާޒާކަން ގެއްލިފައި ހުރި ލުނބޯކަމަށް މިއަދު ބާޒާރުން ވިޔަފާރިކުރި އާއްމުންވެސް ވަނީ ފާހަގަކޮށްފައެވެ.
މުރާސިލުގެ ފަރާތުން ބާޒާރުގެ ބައެއް ފިހާރަތަކާ ވާހަކަ ދައްކާލުމުން ބުނީ މިހާރު ލޮނބޯގެ އަގު ބޮޑުވެފައިވަނީ ރިސޯޓުތަކުގެ ސަޕްލައިއަށް ގިނަ އަދަދެއްގެ ލުނބޯ ބޭނުންވުމާއި އަދި ކުރިން އައި ސްޓޮކްވެސް ހުސްވުމުންނެވެ. މި ހަފްތާގެ ފަހުކޮޅުން ފެށިގެން ލުނބޯގެ އަގުތަކަށް އެކަށީގެންވާ ރަނގަޅު ބަދަލެއް އަންނާނެ ކަމަށްވެސް ގިނަ ވިޔަފާރިވެރިން ފާހަގަކުރިއެވެ.
ކުރިއަށް އޮތީ ބަރަކާތްތެރި ރަމަޟާން މަހަށް ވެފައި މީގެ ކުރިންވެސް ރޯދަމަހަށް ތަކެތީގެ އަގު ބޮޑުވާ އުސޫލުން މިހާރުވެސް ބާޒާރުގެ ބައެއް ބާވަތްތަކުން ދަނީ އަގުބޮޑުކުރަމުންނެވެ. އާއްމުންނާއި ކުދި ވިޔަފާރިވެރިން ތުހުމަތު ކުރާ ގޮތުގައި ރާއްޖޭގެ ބައެއް ވިޔަފާރިވެރިން މުދާ އަގުބޮޑު ކުރުމުގެ ގޮތުން ސަޕްލައިދަށްކޮށް، މުދާ ފޮރުވަމުންދަނީ މިގޮތަށް އަގުބޮޑުކުރުމުގެ ބޭނުމުގައެވެ. ނަމަވެސް ވިޔަފާރިވެރިން މި ތުހުމަތުތަށް އަބަދުވެސް ދޮގުކުރެއެވެ.
