ރާއްޖޭގައި އެންމެ އާއްމުކޮށް ބޭނުންކުރާ ބާވަތްތަކުގެ އަގު އިންތިހާއަށް ބޮޑު ވެއްޖެއެވެ.
ހާއްސަކޮށް ފިޔާ، ބިހުގެ އަގު ވަނީ އާދަޔާ ހިލާފަށް ބޮޑުވެފައެވެ. މީގެ ކުރީގެ އަހަރު ތަކުގައި އާއްމުކޮށް ރޯދަ މަހު އަގަށް ކޮންމެވެސް ބަދަލެއް އަޔަސް އަހަރުގެ މެދު ތެރޭގައި އާއްމުކޮށް ބޭނުންކުރާ ކާބޯތަކެތީގެ އަގަށް ބަދަލު ނާދެއެވެ. ބާޒާރުގައި މުދާ ސަޕްލައިކުރާ ވިޔަފާރިވެރިއަކު ބުނީ މިދިޔަ އަހަރު ޑިސެމްބަރުން ފެށިގެން މުދަލުގެ އަގު ނިސްބަތުން އައީ ބޮޑު ވަމުންނެވެ. މި ގޮތުން ދިވެހިން އާއްމުކޮށް ބޭނުންކުރާ ބާސްމަތީ ހަނޑުލުގެ ބާވަތްތަކާއި މަމީ ނޫޑްލްސް އަދި ސޮފްޓު ޑްރިންކް އަގު ވެސް ވަނީ ބޮޑު ވެފައެވެ. މި ދުވަސް ވަރަކީ ރިސޯޓުތަކާއި ގެސްޓުހައުސް ތަކުގެ އޮފްސީޒަން ކަމަށްވެފައި މުދަލުގެ ޑީމާންޑުވެސް މާ މަތީގައި ނުހުންނާނެ ދުވަސްވަރެއް ކަމަށް ވިޔަސް މުދަލުގެ އަގު ބޮޑުކުރި ސަބަބެއް ނޭންގޭ ކަމަށް ކުރިން ވާހަކަ ދެއްކި ވިޔަފާރިވެރިޔާ ފާހަގަކުރިއެވެ. ދުނިޔޭގެ ބާޒާރުގައި ތެލުގެ އަގު އިންތިހާއަށް ހެޔޮވެ، ބޭރުން ގެންނަ މުދަލުގެ ފުރައިޓަށްވެސް މާބޮޑު ބަދަލެއް ނާންނަ އިރު ބާޒާރުގައި މުދާ އިންތިހާއަށް ބޮޑުވަމުންދާއިރު ސަރުކާރުގެ ކަމާ ބެހޭ އިދާރާތަކުން މިހާތަނަށް މިކަމާ ބެހޭގޮތުން މާބޮޑު ވާހަކައެއް ނުދައްކައެވެ.
ރިޓެއިލް ވިޔާފާރިވެރިއަކު ބުނީ ބާޒާރުގައި އިންޑިއާ ބިސް އަދި ފިޔާ ގެ އަގުން މިހާރު ރީޓެއިލްކޮށް ބިހެއް ވިއްކޭނީ 3 ރުފިޔާއަށެވެ. އަދި ފިޔާ ކިލޯއެއް 35 – 40 ރުފިޔާ ދޭތެރޭގައި ވިއްކައިގެން ނޫނީ އެމީހުނަށް ފައިދާއެއް ނޯންނާނެ ކަމަށެވެ.
ބާޒާރުގެ މިހާރުގެ އަގު ތަކަކީ ދުވަހަކުވެސް ރާއްޖޭގައި މުދަލުގެ އަގަށް އައި ބަދަލެއް ނޫނެވެ. މީގެ ކުރިން ފިޔާ އަލުވި ބިސް ފަދަ ތަކެތި އަގު ބޮޑުވަނީ ހަފްތާއެއްހާ ދުވަހަށެވެ. އޭގެ ފަހުން ބޮޑުތަނުން އަގު ހެޔޮވެއެވެ.
މި ދުވަސްވަރު ކަރަންޓު ބިލު އިންތިހާއަށް ބޮޑުވެ، އެކަމުގެ ޝަކުވާގައި ތިބި ރައްޔިތުންނަށް މިއީ އަނެއްކާވެސް ވަރަށް ބޮޑު ތަކުލީފެކެވެ.
