ބާޒާރުގައި ފިޔާ އަލުވި ބިސް ފަދަ ތަކެތީގެ އަގު ބޮޑުވި ގޮތަށް ދެމަސްވީއިރުވެސް ހެޔޮވެފައި ނުވާތީ މިއީ ދާއިމީ އަގުތަކެއް ކަމަށް ވެދާނެ ކަމަށް ވިޔަފާރިވެރިިން ބުނަން ފަށައިފިއެވެ.
އިންޑިޔާއިން ރާއްޖެ އެތެރެކުރާ ބައެއް ސާމާނު އަގު ބޮޑުވެފައިވާއިރު އާއްމުކޮށް ހަފްތާއެއް ފަހުން އަގު ތިރިވެއެވެ. ނަމަވެސް މި އަހަރު އޮގަސްޓު ފަހުކޮޅުން ފެށިގެން ބިސް، ފިޔާ އަލުވި ފަދަ ބާވަތްތައް އަގު ބޮޑުވި ގޮތަށް ހުރީ ހިފެހެއްޓިފައެވެ. ދިވެހިން އެންމެ ގިނައިން ބޭނުންކުރާ މި މުދަލުގެ އަގު ބޮޑުވީ އިންޑިއާގައި ހައްދާ ތަކެތީގެ ތެރެއިން ގައުމުން ބޭރުކުރާ ތަކެތި ކޮންޓްރޯލްކޮށްފައިވާ ދަނޑިވަޅެއްގައެވެ. މީގެ ކުރިން އެހެން ގައުމުތަކަށް އިންޑިއާއިން ވިއްކާ ތަކެތީގެ ކޮންޓްރޯލް ސަރުކާރުގެ ދަށަށް ގެނަޔަސް ރާއްޖެއަށް ދަތި ނުވާ ވަރަށް ލިބޭނެ ކަމަށް އިންޑިއާ ސަރުކާރުން އަބަދުވެސް އަންނަނީ ބުނަމުންނެވެ. މީގެ ކުރީގައި މި ގޮތަށް ތަކެތީގެ އަގު ބޮޑުވުމުން އިންޑިއާ ސަރުކާރުގެ ހާއްސަ ހުއްދައެއްގެ ދަށުން ރާއްޖެއަށް ބޭނުންވާ ތަރުކާރީގެ ބާވަތްތަށް ލިބެއެވެ.
އާއްމުކޮށް ކާބޯތަކެތީގެ އަގު އުފުލެނީ ރޯދަމަސް ނުވަތަ ރޯދަމަހުގެ ކުރިން ވިޔަސް މި ފަހަރު ރޯދަމަހާ ގުޅުމެއް ނެތް ގޮތަށް ތަކެތީގެ އަގު ބޮޑުވުމުން ރޯދަމަހާ ހަމައަށްދާއިރުވެސް މި ބާވަތްތައް އަގު ހެޔޮވާނެ ކަމަށް ވިޔަފާރިވެރިން ލަފައެއް ނުކުރެއެވެ. މީގެ ކުރިން ތަކެތީގެ އަގު ބޮޑުވާ ދަނޑިވަޅުތަކުގައި އެސްޓީއޯއިން އެ ބާވަތްތައް އެތެރެކޮށް އާއްމުންނަށް އަގުހެޔޮކޮށް ވިއްކިޔަސް މި ފަހަރު އެސްޓީއޯއިންވެސް މިފަދަ ބާވަތްތައް ގެނެސް ވިއްކާނެ ކަމުގެ މައުލޫމާތެއް މިހާތަނަށް ދީފައި ނުވެއެވެ.
މީގެ ކުރިން ދުވަހަކުވެސް އަގުބޮޑު ނުވާވަރަށް ބިހުގެ އަގުވަނީ ބޮޑުވެފައެވެ. މިހާރު ވަކިން ބިހެއް ލިބެނީ 3 ރުފިޔާއަށެވެ. ފިޔާ ކިލޯއެއް 25 ރުފިޔާގައި އުޅޭއިރު މިއީ މިހާތަނަށް ފިޔާގެ އަގު އެންމެ ބޮޑުވި ދުވަސްވަރެވެ.މީގެ އިތުރުން ޓޮމާޓޯ، ކެބެޖު، އަލުވި، ކެރެޓުގެ އަދި ލޮނުމެދު ފަދަ އާއްމު ކާބޯތަކެތީގެ ގޮތުގައި ބޭނުންކުރާ ތަކެތީގެ އަގު ވަނީ ބޮޑުވެފައެވެ.
އިކޮނޮމިކް މިނިސްޓްރީން މީގެ ކުރިން ބުނެފައިވަނީ ބޭރުން މުދާ ލިބުމުގައި، ހާއްސަކޮށް އާއްމުކޮށް ކެއިން ބުއިމަށް ބޭނުންކުރާ ކާބޯތަކެތި ލިބުމުގައި ދަތިތަކެއް ނެތް ކަމަށާއި އެހެންކަމުން މުދަލުގެ އަގު ބޮޑު ނުކުރުމަށް ވިޔަފާރިވެރިންނަށް ވަނީ އިލްތިމާސްކޮށްފައެވެ. އޭގެ ފަހުންވެސް މުދަލުގެ އަގުދަނީ ބޮޑުވަމުންނެވެ.
