ރާއްޖޭގެ ތިން ރަށެއްގައި ކަށަވަރު ޝޯރޫމުތައް ގާއިމުކުރަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ނިންމައިފިއެވެ.
އެމްޓީސީސީން ތިން ރަށެއްގައި ކަށަވަރު ޝޯރޫމުތައް ގާއިމުކުރުމަށް ނިންމާފައިވާކަން އިއުލާންކޮށްފައިވަނީ އެމްޓީސީސީ ކަށަވަރު ޝޯރޫމްގައި މިއަދު ކުރިއަށްގެންދިޔަ ”ކަށަވަރު ޕްރޮމޯ 2023″ގެ ނަސީބުވެރިޔާ ހޮވުމަށް ބޭއްވި ރަސްމިއްޔާތުގައެވެ.
ކަށަވަރު ޝޯރޫމުތައް ގާއިމުކުރާ ރަށްތަކަކީ ގދ. ތިނަދޫއާއި އައްޑު ސިޓީ ހިތަދޫ އަދި ކުޅުދުއްފުށި ސިޓީ ގައެވެ. މިގޮތުން އެ ތަންތަނުގައި ހުޅުވާ ޝޯރޫމްތަކުން އެ ކުންފުނިން ދެމުންގެންދާ ހިދުމަތްތަކާ ގުޅޭ މައުލޫމާތު ކަސްޓަމަރުންނަށް ލިބޭނެ އިންތިޒާމުތައް ހަމަޖައްސާނެއެވެ. އަދި މާލޭގައި ހުރި ކަށަވަރު ޝޯރޫމްވެސް އިތުރަށް ތަރައްގީކޮށް، ކަސްޓަމަރުން ގަންނަށް ބޭނުންވާ މުދާ ފެންނާނެ ގޮތަކަށް ޑިސްޕްލޭކުރާނެ ކަމަށްވެސް އެމްޓީސީސީން މައުލޫމާތުދެއެވެ.
