ރާއްޖެއަށް އެންމެ ގިނަ އަދަދަކަަށް ތެޔޮ އެތެރެކުރާ ކުންފުނި ކަމަށްވާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ތެލުގެ އަގު ހެޔޮކުރަން ނިންމައިފިއެވެ.
މިކަމާ ގުޅިގެން އެސްޓީއޯއިން ކުރި ޓްވީޓެއްގައި ބުނީ، މިއަދުން ފެށިގެން ޕެޓްރޯލާއި ޑީސަލްގެ އަގު ހެޔޮކުރަން ނިންމީ، ދުނިޔޭގެ ބާޒާރުގައި ތެޔޮ ގަންނަން ލިބޭ އަގު ހެޔޮވުމާއި ގުޅިގެން ކަމަށެވެ. އެގޮތުން ޕެޓްރޯލް ލީޓަރަކުން 83 ލާރި އަދި ޑީސަލް ލީޓަރަކުން 62 ލާރި ވަނީ އަގުހެޔޮކޮށްފައެވެ.
އެސްޓީއޯއިން ބުނިގޮތުގައި، މިއަދުން ފެށިގެން ފިއުލް ސަޕްލައިސް މޯލްޑިވްސްގެ ސްޓޭޝަންތަކުން ޕެޓްރޯލް ލީޓަރެއް 15.14 ރުފިޔާއަށް އަދި ޑީސަލް ލީޓަރެއް 15.70 ރުފިޔާއަށް ލިބޭނެއެވެ.
ކުރިން ޕެޓްރޯލް ލީޓަރެއް ވިއްކީ 15.97ރުފިޔާ އަށެވެ. ޑީސަލް ލީޓަރެއް 16.32ރުފިޔާ އަށެވެ. އެހެންވެ މިއީ، ޕެޓްރޯލް ލީޓަރަކުން 83 ލާރި އަދި ޑީސަލު ލީޓަރަކުން 62 ލާރީގެ ހެޔޮވުމެކެވެ.
މުޅި ދުނިޔެ ލޮކްޑައުންކޮށްލި ކޮވިޑް-19 އިން އަރައި ނުގަނެވިގެން އުޅެނިކޮށް ރަޝިއާ އިން ޔޫކްރޭން ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް އުފުލެން ފެށިއެވެ. ދުނިޔޭގެ ބާޒާރުގައި ތެލުގެ އަގު އުފުލެން ފެށުމުން ރާއްޖޭގައި ވެސް ފަސް ފަހަރެއްގެ މަތިން ތެލުގެ އަގު ބޮޑުކޮށްފައިވެއެވެ.
ނަމަވެސް ދުނިޔޭގެ ބަޒާރުގައި ތެލުގެ އަގު ދަށަށް ދާން ފެށުމުން މިދިޔަ އަހަރުގެ އޮގަސްޓް މަހު ތެލުގެ އަގު ވަނީ ހެޔޮކޮށްފައެވެ.




