ފަލަސްތީނާއި މުސްލިމުންގެ ހިފާފައިވާ ބިންތަކުން ފައިބަންދެން އިޒްރޭލާއި އެމެރިކާއަށް ހަމަލާދޭނެ ކަމަށް ޔަމަން ސިފައިންގެ ވެރިޔާ ވިދާޅުވެއްޖެއެވެ. ޔަމަނީ އާރމްޑް ފޯސްގެ ލަޝްކަރުން ދެމުންދާ ހަމަލާތަކެއް މިއަދުވެސް ވަނީ އިޒްރޭލަށް އަމާޒުވެފައެވެ. މީގެތެރެއިން މިސައިލާއި ޑްރޯން ހަމަލާތަކެއް އަޔަންޑޯމުން (އިޒްރޭލުގެ މިސައިލުން ދިފާއުކުރާ ސިސްޓަމް) އިން ވައްޓާލާފައިވާ ކަމަށް އިޒްރޭލު ސިފައިން ވަނީ ބުނެފައެވެ.
މެދުއިރުމަތީގައި ގާއިމު ކޮށްފައިވާ އެމެރިކާގެ އަސްކަރީ ބޭސްތަކާއި އިޒްރޭލުގެ އެކި ތަންތަނަށް އަމާޒުކޮށް ފަލަސްތީނު ބޭރުން ހަމަލާތައް އަންނާތީ މުޅި ސަރަހައްދަށް ހަނގުރާމަ ފުޅާވެދާނެ ކަމުގެ ބިރު ވަނީ ފެތުރިފައެވެ. މި ފަދަ ގިނަ ހަމަލާތަކަކީ ލުބުނާނުގެ ހިޒްބުﷲ އާއި ޔަމަނުން ދެމުންދާ ހަމަލާތަކެކެވެ.
ފަލަސްތީނުގެ ގާޒާއަށް އިޒްރޭލު ސިފައިންދެމުންދާ އުދުވާނީ ހަމަލާތައް ހުއްޓާލުމުގެ ވިސްނުމެއް އިޒްރޭލުން ނުގެންގުޅެއެވެ. އެކަމުގެ ސަބަބުން މުޅި ގާޒާ ވަނީ ހާލުގައި ޖެހި އެތައް ބަޔަކު ޝަހީދުވެފައެވެ.
