ސްރީލަންކާގައި މި ވަގުތު ތިބި އިޒްރޭލު ރައްޔިތުން ވީހާވެސް އަވަހަށް އެ ގައުމުން ފޭބުމަށް އިޒްރޭލު ސަރުކާރުން އިލްތިމާސް ކޮށްފިއެެވެ.
މެދުއިރުމަތީގެ ހަމަނުޖެހުންތަކާއި ގުޅިގެން ކަމަށް ބުނެ އިޒްރޭލު ފަތުރުވެރިންނަށް ސްރީލަންކާގައި ހަމަލާއެއް ދިނުމަށް ރާވަމުންދާ ކަމަށް މީގެ 3 ދުވަސް ކުރިން އެމެރިކާއިންވެސް ވަނީ އިންޒާރު ދީފައެވެ. މި ހަމަލާ ދިނުމަށް މަސައްކަތް ކުރަމުންދާ ކަމަށް ބުނެފައިވަނީ ސްރީލަންކާގެ އަރުގަމް ބޭ ސަރަހައްދުގައެވެ. މި ސަރަހައްދަކީ ފަތުރުވެރިންގެ މެދުގައި މަގުބޫލު ސަރަހައްދެކެވެ. ހާއްސަކޮށް އިޒްރޭލު ފަތުރުވެރިން ރާޅާ އެޅުމަށް މި ސަރަހައްދު ބޭނުން ކުރަމުންދާއިރު އިޒްރޭލުގެ ވިޔަފާރިވެރިއަކު ހިންގާ ރެސްޓޯރެންޓެއްވެސް މި ސަރަހައްދުގައި ހުރެއެވެ.
މި ދިޔަ މަހުން ފެށިގެން މި ސަރަހައްދުގައި އަންނަނީ އިޒްރޭލުގެ ސަރުކާރަށް ވާގިވެރިވާ ބްރޭންޑުތައް ބޮއިކޮޓް ކުރުމުގެ ކެމްޕޭނެއް ފަށާފައެވެ.
އިޒްރޭލުގެ ނެސެނަލް ސެކިއުރިޓީ ކައުންސިލުން ނެރެފައިވާ ބަޔާނެއްގައި ބުނެފައިވަނީ އެ ގައުމުގެ ރައްޔިތުންގެ ސަލާމަތާއި ރައްކާތެރިކަމަށްޓަކައި މި ވަގުތު ސްރީލަންކާއަށް ދަތުރު ކުރުމާއި އަދި ސްރީލަންކާގައި ތިބި އިޒްރޭލު ރައްޔިތުން ލަންކާގައި ތބުމަށް ރައްކާތެރި ނޫން ކަމަށެވެ. މީގެ އިތުރުން އިޒްރޭލު ސަރުކާރުންވެސް ވަނީ އަރުގަމް ބޭ ސަރަހައްދަށް ޓެރަރިސްޓު ހަމަލާއެއް ދޭން އުޅޭ ކަމުގެ ސައްހަ މައުލޫމާތު ލިބިފައިވާ ކަމަށް ބުނެފައެވެ.
ސްރީލަންކާގެ މީޑިއާތަކުން ހަބަރުދޭ ގޮތުގައި ލަންކާގެ ޓުއަރިސްޓުން ހަރަކާތްތެރިވާ ސަރަހައްދު ތަކުގައި މިހާރުވަނީ ސަލާމަތީ ފިޔަވަޅުތައް ވަރަށް ބޮޑަށް ވަރުގަދަ ކޮށްފައެވެ. އެމެރިކާ، ކެނެޑާ، އިނގިރޭސި ވިލާތުން ވަނީ ސްރީލަންކާއަށް ދަތުރު ކުރުމުގައި އެ ގައުމުގެ ރައްޔިތުންނަށް ޓްރެވަލް އެޑްވަސަރީ ނެރެފައެވެ. ހާއްސަކޮށް މި ދުވަސްވަރު ލަންކާގެ އަރުގަމްބޭ ސަރަހައްދަށް ނުދިއުމަށް ވަނީ އިލްތިމާސްކޮށްފައެވެ.
ސްރީލަންކާއަށް އެންމެ ގިނައިން ފަތުރުވެރިން އަންނަނީ އިނގިރޭސި ވިލާތުންނެވެ. އިޒްރޭލު ފަތުރުވެރިން ހިމެނެނީ 18 ވަނައަށް ލަންކާއަށް ފަތުރުވެރިން އަންނަ ގައުމުގެ ގޮތުގައެވެ.
ސްރީލަންކާގެ އަރުގަމްބޭ ސަރަހައްދަށް ޓެރަރިސްޓު ހަމަލާއެއް ދޭން އުޅޭ ކަަމަށް ބުނެ 3 މީހަކުވެސް ވަނީ މިއަދު ހައްޔަރު ކޮށްފައެވެ. މި މީހުންނާ ބެހޭ އިތުރު މައުލޫމާތެއް މިހާތަނަށް ސްރީލަންކާގެ ސަރުކާރުން ހާމައެއް ނުކުރެއެވެ.
