މި ފަހަރުގެ އިންތިހާބުގައި ކޮންގްރެސް ޕާޓީއަށް 50 ގޮނޑިވެސް ނުލިބޭނެ ކަމަށާއި އެ ޕާޓީއަށް އިދިކޮޅު ޕާޓީގެ ގޮތުގައިވެސް ތަމްސީލުކުރުމުގެ ހައިސިއްޔަތެއް ނޯންނާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ. އިންޑިއާގައި މިހާރު ކުރިއަށްދާ ވޯޓު ލުމުގެ ތިންވަނަ މަރުހަލާގެ ކެމްޕޭނު ރެލީއެއްގައި ވާހަކަފުޅު ދައްކަވަމުން މޯދީ ވިދާޅުވީ ލޯކްސަބާ (އިންޑިއާ ޕާލިމެންޓުގެ މަތީގޭގެ) އިންތިހާބުން 10 ޕަސަންޓުވެސް ކޮންގްރެސް ޕާޓީއަށް ނުލިބޭއިރު އެ ޕާޓީއަށް އިދިކޮޅު ޕާޓީއެއްގެ ގޮތުގައި މުހާތަބު ކުރުމަށް ލަދުވެތިވާ ކަމަށެވެ. އިދިކޮޅު ލީޑަރު ކޮންގްރެސް ޕާޓީގެ ރާހުލް ގާންދީއަށް މުހާތަބު ކުރައްވައި މޯދީ ވިދާޅުވީ 2014 ވަނަ އަހަރުގެ މަޖުލިސް އިންތިހާބުން ފެށިގެން ކޮންގްރެސް ’ޝެހެޒާދު‘ ވިދާޅުވަމުން އަންނަނީ އެއް ވާހަކަތަކެއް ކަމަށާއި، އޭގެ ފަހުން މިއަދާއި ހަމައަށްވެސް ގެންގުޅުއްވަނީ އެއް ސްކްރިޕްޓު (ހިތޯބު) ކަމަށެވެ.
ކަންދަމާލުގައި މިއަދު އޮތް އިންތިހާބު ކެމްޕޭނުގައި ވާހަކަފުޅު ދައްކަވަމުން، ’މި ބަސް ހަންދާންކުރާތި، މި ފަހަރު ގެ އިންތިހާބުގައި ބީޖޭޕީން 400 ގޮނޑި ކާމިޔާބު ކުރާނެ‘ ވަރަށް ޖޯޝާއި ފޯރީގައި މޯދީ ވިދާޅުވިއެވެ.
މޯދީގެ ސަރުކާރުގެ ކާމިޔާބީގެ ވާހަކަތައް ތަކުރާރު ކުރައްވަމުން ވިދާޅުވީ މިހާރު އިންޑިއާއަކީ މުޅި ދުނިޔޭގެ މައްސަލަތަކާއި ކަންކަމުގައި ބަސްވިކޭ އިހުތިރާމު ލިބިގެންވާ، ވަރުގަދަ ގައުމެއް ކަމަށެވެ. މި އިންތިހާބުގައި ވަރަށް ބޮޑަށް ދީނީ އަދި ވަތަނީ ގޮތުން ވާހަކަފުޅުދައްކަވާ މޯދީގެ ތަގުރީރު ނިންމާލަމުން ވިދާޅުވީ އެމަނިކުފާނުގެ ވެރިކަމުގައި ހިންދީން 500 އަހަރު ކުރަމުން އައި އުއްމީދެއް ފުރިހަމަކޮށްދެއްވާފައިވާނެ ކަމަށެވެ.
މޯދީ އިޝާރާތް ކުރެއްވީ އަޔޯދިއާގައި ބާބުރީ މިސްކިތް ތަޅާލުމަށްފަހު ބިނާކޮށްފައިވާ ރާމް ފައްޅިއަށެވެ. އަޔޯދިއާގެ ގަދީމީ ބާބުރީ މިސްކިތް ތަޅާލުމުން ހިންދީންނާއި މުސްލިމުންގެ މެދުގައި ހިނގި ހަމަނުޖެހުމުގައި އެތައް ބަޔަކު މަރުވެފައިވެއެވެ. މި ހާދިސާ ހިނގިއިރު މޯދީ ހުންނެވީ އެ ސަރަހައްދުގެ ޗީފު މިނިސްޓަރުގެ މަގާމުގައެވެ. މި ހަމަނުޖެހުންތައް ހުއްޓުވުމަށް އެއްވެސް ކަމެއް ކުރައްވާފައި ނުވާތީ މިއަދާ ހަމައަށްވެސް މޯދީއަށް ފާޑުކިޔުން އަމާޒުވަމުން އަންނައިރު، ހިންދީ ވަތަނީ މީހުންގެ ތާއިދު މޯދީ ހޯއްދެވީ މި ހަމަނުޖެހުންތަކުގައި ހިންދީންނަށް އިންތިހާއަށް ތާއިދުކޮށް އެމީހުންގެ މައްސަލަތައް އޮއްބާލުމުންނެވެ.
