އިޒްރޭލުން ހިންގަމުންދަނީ ނަސްލެއް ނައްތާލުމުގެ ލާއިންސާނީ އަމަލުތަކެއް ކަމަށާއި އެ މައްސަލަ ބަލައި ދިނުމަށް ދުނިޔޭގެ ކޯޓަށް ހުށައަޅައިފިއެވެ.
އިންޓަނޭޝަނަލް ކޯޓު އޮފް ޖަސްޓިސްއަށް ސައުތު އެފްރިކާއިން ހުށައެޅި މައްސަލާގައި ބުނަނީ އިޒްރޭލުގެ އަމަލުތަކަކީ ހަނގުރާމައިގެ ތެރޭގައި ހިނގަމުންދާ ކަންކަމެއް ނޫން ކަން މުޅި ދުނިޔެވެސް ހެކިވާނެ ކަމަށެވެ. މި ގޮތުން ބަލި މީހުންނާއެކު ހޮސްޕީޓަލުތަކަށް ހަމަލާދީ އެތަންތަން ގޮއްވާލުމާއި ބަލި މީހުން އުފުލާ އެމްބިއުލެންސްތަކަށް ހަމަލާދިނުމާއި، މިސްކިތްތަކާއި ސްކޫލުތަކަށް މިސައިލު ހަމަލާދީ ބިމާ ހަމަކޮށްލުން ހިމެނޭ ކަމަށެވެ. މިއީ ދުނިޔޭގެ އެއްވެސް ގާނޫނަކުން ހުއްދަކުރެވޭނެ ކަމެއްނޫން ކަމަށާއި އަދި މިއީ އަމިއްލަ ދިފާއުގައި ކުރާ ހަނގުރާމައެއް ކަމަށް ބުނެ ބަހަނާ އެއް ނުދެއްކާނެ ކަމަށެވެ. ކުށެއްނެތް ކުޑަކުދިންނާ އަންހެނުންނަށް އަމާޒުކޮށް ހަމަލާދީ، ނޫސްވެރިންނާ އެހީދޭ ފަރާތްތައް މަރައި އެމީހުންގެ އާއިލާތަކަށް ހަމަލާދެނީ ސީދާ ނަސްލެއް ނައްތާލުމުގެ ބޭނުމުގައިކަން ވަރަށް ސާފުކޮށް އެނގެން އޮތް ކަމަށެވެ. ފަލަސްތީނުގެ ގާޒާއަށް ދެމުންދާ ހަމަލާގައި ގޯތި ގެދޮރު ތަޅާ ސުންނާފަތި ކުރުނީވެސް ބަޔަކަށް އަލުން ދިރިއުޅުނަ ނުދޭން ކަމަށާއި މި ހުރިހާ ކަމެއް ބެލުމަށް އިޒްރޭލު ގޮވައިގެން ސައުތު އެފްރިކާއިންވަނީ ދުނިޔޭގެ ކޯޓަށް ވަދެފައެވެ.
މި މައްސަލާގައި އިޒްރޭލުން ބުނެފައިވަނީ ސަތުރު އެފްރިކާގެ ބޭނުމަކީ އިޒްރޭލު ނެތި ދިއުން ކަމަށާއި އިޒްރޭލުގެ ސަލަމާތާއި ރައްކާތެރިކަމަށް އެއްވެސް ވަރަކަށް އިހުތިރާމް ނުކުރާ ކަން މި ކަމުން އެނގޭ ކަމަށެވެ.
ސައުތު އެފްރިކާއަކީ ފަލަސްތީނަށް އެހީތެރިވެ، އަމަލާއި ބަހުން ފަލަސްތީނު ރައްޔިތުންނަށް މަދަދުދޭ ގައުމެކެވެ. ސައުތު އެފްރިކާ ނަސްލީ ތަފާތު ކުރުމުން މިނިވަން ކުރެއްވި ލީޑަރު ނެލްސަން މަންޑޭލާވެސް ވަނީ ފަލަސްތީނުގެ މިނިވަންކަމަށްޓަކައި ކުރަމުންދާ މަސައްކަތްތަކަށް ތައުރީފުކުރައްވައި ވާހަކަ ދައްކާފައެވެ.
