އިސްރާޢީލުގެ ލީޑަރުން ހައްޔަރު ކުރުމުގެ އަމުރު ހޯދުމަށް އައިސީސީން ހުށައެޅި މައްސަލައަށް ދެކޮޅުހަދާ އަދި އެއީ ޤަބޫލުފުޅު ކުރައްވާކަމެއް ނޫންކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
ބައިޑަން މިހެން ވިދާޅުވީ އިންޓަރނޭޝަނަލް ކުރިމިނަލް ކޯޓް (އައިސީސީ) ގައި އިސްރާޢީލްގެ ބޮޑުވަޒީރު ބެންޖަމިން ނަތަންޔާހޫ އަދި އެޤައުމުގެ ދިފާޢީ ވަޒީރު ޔޮއާވް ގަލަންޓް ހައްޔަރުކުރުމުގެ އަމުރަކަށް އައިސީސީގެ ޕްރޮސެކިއުޓަރ ކަރީމް ޚާން އެދިވަޑައިގަނެފައި ވަނިކޮށްނެވެ.
ބައިޑަންވަނީ އިޒުރޭލުގެ އަސްކަރިއްޔާއިން ފަލަސްތީނުގެ ޣައްޒާގައި ހިންގަމުންގެންދާ ކަންކަމަކީ އެއީ ނަސްލުނައްތާލުމުގެ ޢަމަލެއްކަމަށް ޤަބޫލުފުޅު ނުކުރައްވާކަމަށް ވިދާޅުވެ އިސްރާޢީލް ދިފާއު ކުރައްވާފައެވެ.
ބައިޑަން މިހެން ވިދާޅުވެފައިވާ އިރު މިހާތަނަށް ފަލަސްތީނާއި ދެކޮޅަށް ހިނގަމުންދާ ހަނގުރާމައިގައި އިސްރާޢީލުންވަނީ 35،562 މީހަކު ޝަހީދުކޮށްލާފައެވެ.އަދި 79،652 މީހުންނަށްވަނީ އެކިކަހަލަ އަނިޔާތަކާއި ކުރިމަތިލާންޖެހިފައެވެ.
އިސްރާޢީލްގެ އަމަލުތަކުގެ ސަބަބުން އެޤައުމާއި ދެކޮޅަށް ދެކުނު އެފްރިކާއިންވެސް ވަނީ ނަސްލުނައްތާލުމުގެ މައްސަލައެއް އިންޓަރނޭޝަނަލް ކޯޓް އޮފް ޖަސްޓިސް( އައިސީޖޭ)ގައި މީގެ ކުރިން ކުރިއަށް ގެންގޮސްފައެވެ.
