އިއްޔެ އަކީ ގދ.ތިނަދޫގެ ތާރީހުގައި އައި އެންމެ އުފާވެރި އެއް ދުވަހެވެ. ”މިއަދު ރޫހު ވަނީ މި ފެންމީރު ތިނަދޫގައޭ ތިނަދޫ ސިޓީއަށް މަރުހަބާ އޭ“ ރައީސް އިބްރާހިމް މުހައްމަދު ސޯލިހު ވިދާޅުވުމާ އެކު ރޭގެ ޖަލްސާގައި ބައިވެރިވި ތިނަދޫ ރައްޔިތުން އުފަލުން ކެކިގަތެވެ.
ތިނަދޫ ގެ ވެރިންނާއި ކައުންސިލުތަކުން ސިޓީއެއްގެ ދަރަޖަ ލިބޭތޯ މަސައްކަތްކުރާތާ އެތައް ދުވަހެއް ވެއްޖެއެވެ. ރަށުގެ އާބާދީ އިތުރުކޮށް ރަށުން ބޭރު މީހުން ވަޒަންވެރިވުމަށް، ރާއްޖޭގެ އެހެން އެއްވެސް ރަށަކުން ނުދޭވަރުގެ ފުރުސަތުތައްވެސް ތިނަދޫއިން އަންނަނީ ދެމުންނެވެ. ތިނަދޫ ކައުންސިލުން ގަބޫލުކުރާ ގޮތުގައި 2018 ގެ ފަހުން ތިނަދޫގައި ދިރިއުޅޭ މީހުންގެ އާބާދީ ދިހަހާހަށް ވުރެ މައްޗެވެ. އެ އަދަދަށް ވުރެ ވެސް ގިނަ މީހުން ދިރިއުޅޭތާ 5 އަހަރަށް ވުރެ ގިނަ ދުވަސް ވީ އިރު ތިނަދޫއިން ދަނީ ތަފާތު ކުރުމެއްނެތި އެންމެންނަށްވެސް ހިދުމަތް ދެމުންނެވެ. ރަށުގައި ވަޒަންވެރިވެގެން ދިރިއުޅެމުންދާ އެހެން ރަށްރަށުގެ މީހުންނެކޭ ތިނަދޫ އުފަން ރައްޔިތުންނެކޭ އެއްވެސް ތަފާތުކުރުމެއް ނުގެންގުޅުމުގެ ނަތީޖާ ވެސް ވަރަަށް ފޮންޏެވެ. ދުވަހަކަށްވުރެ ދުވަހެއްދަނީ އެރަށުގައި ދިރިއުޅޭ މީހުން އިތުރުވަމުންނެވެ. އޭގެ ސަބަބުން ރަށުގެ ވިޔަފާރިއާއި އިގްތިސާދީ އަދި އިޖުތިމާއި އެތައް ކަމަކަށް ފައިދާތަކެއް ކުރެއެވެ.
ސިޓީއެއްގެ ދަރަޖަ ދިނުމުން ނުވަތަ ސިޓީއަކަށް ވުމުން ވަކި ލިބޭ މޮޅެއް އޮތޭތޯ ބައެއް މީހުން ސުވާލު އުފައްދައެވެ. ކަރުދާހުގައި ސިޓީއެއްގެ ދަރަޖަ ލިޔުމުން ލިބުނަސް ހިދުމަތްތަކުގައިކުޑަ ރަށަކުން ލިބޭވަރުގެ ހިދުމަތް ލިބޭ ނަމަ ސިޓީއެއްގެ ނަންބޯޑު އިނަސް ރައްޔިތުންނަށް އެކަމުން ލިބޭނެ އުފަލެއް ނެތެވެ. މިއީ ބައެއް މީހުންގެ ޝަކުވާއެވެ.
ގދ. ތިނަދޫއިންވެސް މިހާރު ސިޓީއަކުން ލިބޭނެ ހުރިހާ ހިދުމަތެއް ލިބެއެވެ. ސިޓީއަކަށް ވުމުން އެކަން ދަމަހައްޓަން ވަސީލަތްތަކެއް ގާއިމުކުރަންވެސް ޖެހެއެވެ. ތިނަދޫއިން ސިޓީގެ ދަރަޖަ ހޯދަން އުޅުމުގެ އެންމެ ބޮޑު ބޭނުމަކީ އެއީއެވެ. ތިނަދޫގައި ޓާޝަރީ ހޮސްޕިޓަލުގެ ހިދުމަތް ލިބެއެވެ. ރަސްމީ ޓާޝަރީ ހޮސްޕިޓަލެއް ގާއިމު ކުރަން މި ހަފްތާގައިވަނީ ޗައިނާގެ ކުންފުންޏާކާ ހަވާލުވެސް ކޮށްފައެވެ. ބައިނަލް އަގުވާމީ ފެންވަރުގެ ބަނދަރެއް މިހާރުވެސް ދަނީ ގާއިމު ކޮށް ނިމުމުގެ މަގުމަތީގައެވެ. މީގެ އިތުރުން ތިނަދޫ ފަޅު ތެރޭގައި ތަރައްގީ ކުރާ އިންޓަގްރޭޓެޑް ޓުއަރިޒަމް ޒޯނާއި އެކަމާ ގުޅިގެން ރަށަށް އިތުރު ކުރެވޭ ބިން ހިމެނެއެވެ. މިހާރުވެސް ތިނަދޫގައި 200 ފްލެޓު އަޅަމުންދާއިރު އިތުރު 500 ފްލެޓު އަޅާދޭނެއެވެ. އެއީ ދެވަނަ ދައުރަކަށް ރައީސް ސޯލިހުގެ ވައުދެކެވެ. ތިނަދޫ މަގުތައް ފެންވަރު ރަނގަޅުކޮށް މިހާރުވެސް ހަދަމުންދާއިރު މަަރުކަޒީ ބޮޑު އިންޖީނުގެއެއްވެސް ވަނީ މި ސަރުކާރުން ނިންމާފައެވެ. މަސައްކަތްތައް ދަސްކުރުމަށް ސަރުކާރުގެ ޓިވެޓު ޕްރޮގްރާމުގެ ތެރެއިން އެ ރަށުގައި ޓިވެޓް ކެމްޕަހެއްވެސް ހަދާނެއެވެ. ތިނަދޫ ހޮސްޕިޓަލް ހިމެނޭހެން މެޑިސިން ދާއިރާއިން ކިޔަވަން ބޭންވާ ފަރާތްތަކަށް އެ ރޮނގުން ތައުލީމު ހާސިލުކުރުމަށް ގައުމީ ޔުނިވަރސިޓީގެ ކެމްޕަހެއްވެސް ތިނަދޫގައި ގާއިމު ކުރުމަށް ވަނީ ހަމަޖެހިފައެވެ. މީގެ އިތުރުން ކަސްޓަމާއި އިމިގްރޭޝަނާއި އެމްޕީއެލް ހިދުމަތްވެސް ތިނަދޫއަށް އައުމަށް ދެން އޮތީ ބާކީ ކުޑަ ދުވަސްކޮޅެކެވެ. އިންޓަނޭޝަނަލް ކޮމާޝަލް ޕޯޓު ނިމުނުހާ އަވަހަކަށް އެ އޮފީސްތަކުގެ ހިދުމަތް ގާއިމުކުރުމުގެ ތައްޔާރީތައް ދަނީ ކުރެވެމުންނެވެ. އިއްޔެގެ ސިޓީއެއްގެ ދަރަޖަ ދިނުމާއެކު ޕާސްޕޯޓު ހެދުމުގެ ހިދުމަތްވެސް ތިނަދޫއިން ލިބޭގޮތްވަނީ ހަމަޖައްސައިދީފައެވެ.
ތިނަދޫ ރައްޔިތުން ގަބޫލުކުރަނީ ރާއްޖޭގެ އެހެން ސިޓީތަކަށްވުރެ ރަނގަޅަށް ތިނަދޫ ސިޓީ ކުރިއަށްދާނެ ކަމަށެވެ. މީހުންގެ ހޭލުންތެރިކަމާ ގުޅުމާއި އުޅުމުގައިވެސް ތިނަދޫ މީހުން ތަފާތުވީމާ އެކަން ސިޓީއަކުންވެސް ފެންނާނެ ކަމަށް ތިނަދޫ ރައްޔިތުން ޔަގީންކަން ދެއެވެ.
ރާއްޖޭގައި މީހުން ދިރިއުޅޭ 2 ތިނަދޫއެއް އޮންނަ އިރު މިއަދުގެ ފަހުން ރާއްޖޭގެ ޗާޓުގައި އޮންނާނީ ތިނަދޫ ސިޓީއެވެ.
