ސޯސަލް މީޑިއާގައި ބޮޑު މަގުބޫލުކަމެއް ހޯދަމުންއައި ދެމަފިރިން ކަމަށްވާ ހާލިދު އަލް އަމެއިރީ އާއި ސަލްމާ މުހައްމަދަކީ މީގެ ކުރިން ދެމަފަރިންގެ ޖޯޑު ތަކަށް މިސާލެކެވެ. ދެމީހުން އެކީގައި ސޯސަލް މީޑިއާއަށް ދޫކޮށްލާ ވީޑީއޯތައް ކޮންމެ ދުވަހަކު އެތައް މިލިއަން ބަޔަކު ބަލަމުން ދިޔައެެވެ. އެތައް މިލިއަން ބަޔަކު އެ ދެމީހުންގެ ވީޑިއޯތައް ބަލަމުން ތައުރީފުކުރަމުން ދިޔައެވެ. ޒަމާނީ މަޖާ ގޮތްތަކާއި އެމީހުންގެ އަމިއްލަ ބައެއް ވާހަކަތަކާއި މުޅި އާއިލާ ހިމެނޭހެން ގެނެސްދެމުން ދިޔަ ވީޑިއޯތަކުން އެތައް ބަޔަކު ހެއްވާލަދިނެވެ. އެންމެންވެސް އޭރު ބުނަމުންދިޔައީ އެއީ ފުރިހަމަ ދެމަފިރިންކަމަށެވެ. ރީތި ފުރިހަމަ ގެއަކާއި ފުރާވަރަށް އަރަމުން އަންނަ ދެ ފިރިހެން ދަރިންނާއި، މަޖާ ސަކަ މިޒާޖެއްގެ ފިރިިއެއްގެ އިތުރުން ފައިސާގެ ތަނަވަސްކަން ލިބުމުން އެންމެންވެސް ހީކުރީ ސަލްމާއަށް ދުނިޔޭގެ ހުރިހާ އުފަލެއް ލިބިފައިވާ ކަމަށެވެ. އަންހެން ކުދިން ބޭނުންވީ ހާލިދެކެވެ، ފިރހެނުން ބޭނުންވީ ސަލްމާއެކެވެ.
އެ ދެ މީހުން އަހަރުމެންނަށް ދެއްކި އުފަލާއި މަޖާ އަދި ދިރިއުޅުމުގެ ފިލާވަޅުތަކުން ދިން ލޯބި ކުއްލިއަކަށް، އެ ދެމީހުންގެ އަމިއްލަ ހަޔާތުން ގެއްލުނީ ކިހިނެތް ހެއްޔެވެ؟ އެ ދެ މީހުން އެކީގައި ހަދަމުން އައި ވީޑިއޯތައް ހުއްޓުމުކަށްއައިސް ދެމީހުން އެކީ ނިސްބަތްވާ ސޯސަލް މީޑިއާގެ އެކައުންޓުތައް ފުހެލީ ކީއްވެ ހެއްޔެވެ؟ ހާލިދާއި ސަލްމާގެ ދެކުދިން ކަމަށްވާ އަބްދުﷲ އާއި ހަލީފާ މީގެ ކުރިން ހިއްސާކުރަމުން އައި އާއިލީ މަންޒަރުތަކާއި ވީޑިއޯތަކުގެ މައުލޫ ބަދަލުވެ އެހެނިހެން މަންޒަރުތަކެއް ދައްކަން ފެށީ ކީއްވެ ހެއްޔެވެ؟
މި ސުވާލުތަކުގެ ކުރު ޖަވާބެއް ދާދި ފަހުން ސަލްމާވަނީ ދީފައެވެ. މެދުއިރުމަތީގެ މަޝްހޫރު ޕޮޑްކާސްޓު ޕްރޮގްރާމެއްގައި ވާހަކަ ދައްކަމުން ސަލްމާ ބުނީ އޭނާއަންނަނީ ނަފްސާނީ ބައެއް މައްސަލަތަކަށް ފަރުވާ ހޯދަމުންނެވެ. ބޭރު ފުށުން ކިތަންމެ އުފާވެރިކަމެއް ފެނުނަސް ކިތަންމެ އާއިލީ މީގެއްހެ ގޮތުގައި ފެނުނަސް ހަގީގީ ސަލްމާ އުޅެނީ މީހުންނާއި ދުުރުގައެވެ. އެކަނިވެރިކަމުން އަމާން ދުނިޔެެއެއް ހޯދުމުގައެވެ. އެކަމުގެ ބައެއް މިސާލުވެސް ސަލްމާ ކިޔާދިނެވެ. މި ގޮތުން ބައެއް ފަހަރު އޭނަގެ ދެކުދިން ގޭތެރޭގައި ސަކަރާތް ޖަހާ ދުވެ، ހީސާމާސާ ކުރާ އަޑު އިވުމުން ސަލްމާ ވަންނަނީ ކޮޓަރިއަށެވެ. އެނދުގައި އޮވެ ހިތް ފުރެންދެން ރޯލާފައި ނުކުންނަނީ ކަމެއްވީހެންވެސް ހީނުވާ ގޮތަށެވެ. އެއީ ކީއްވެ ހެއްޔެވެ؟ މާބޮޑު ތަފްސީލަކަށް ނުގޮސް ސަލްމާ ބުނީ އެއީ ’ޗައިލްހުޑް ޓްރައުމާ‘ ކަމަށެވެ. ކުޑައިރު އެގޮތަށް ހިޔާލެއް ފިކުރެއްނެތި ސަކަރާތް ޖަހާލާނެ ފުރުސަތެއް ނުލިބުނުކަމަށެވެ. ކުޑައިރު ދިމާވެފައިވާ އެތައް ނަފްސާނީ މައްސަލައެއްގައި ސަލްމާ ކަނޑާ ވައްޓާލަނީ ދާދި ކުދިކުދި ކަންތައްތަކުގައެވެ. މި ކަންތައްތަކުން އަރައިގަތުމަށް ސަލްމާއަށް އެންމެ ބޮޑު ސަޕޯޓެއް ދެނީ ކާކުތޯ ޕްރެސެންޓަރު ސުވާލު ކުރުމުން ސަލްމާ ބުނީ އެއްވެސް މީހެއްގެ ފަރާތުން ސަޕޯޓެއް ނުލިބޭ ކަމަށެވެ. އެއްވެސް ސަޕޯޓެއް ނުލިބި ހިތްވަރެއް ނުލިބި އެ އަނިޔާތަކާއި ހިތްމަރުވުމުގެ ތެރެއިން ހަޔާތެއް ފެށުނީ ކީއްވެތޯވެސް ސަލްމާ އަމިއްލަ ނަފްސަށް ސުވާލު އުފައްދައެވެ.
ކިރިޔާ ސަލާމަތްވެފައިވާ ހަޔާތުގެ ވާހަކަ ދައްކާއިރު ސަލްމާ ކިޔާދިނީ ދެމީހެއްގެ ގުޅުމުގެ ނުވަތަ ޒަވާޖީ ހަޔާތެއްގައި ކޮންމެހެން ހުންނަން ޖެހޭ ކަންތައްތަކެވެ. ސަލްމާ ބުނާ ގޮތުން ދެމީހެއްގެ ލޯބީގެ ގުޅުމަކީ ސިކުނޑީގެ ހަމަޖެހުން އެ ގުޅުމަކުން ލިބުމެވެ. ނަފްސާނީ ހިތްހަމަޖެހުން އެ ގުޅުމުން ލިބުމެވެ. އެ ގުޅުމުން ހިތްހަމަ ޖެހުމާއި އުފަލެއް ނުލިބޭ ނަމަ އެއީ ވިހަވެ ކޮށިއަރާފައިވާ ދިރިއުޅުކެވެ. ކޮންމެ ގަޑިއެއްގައިވެސް މީހާ ބަލިކޮށްލާ މާޔޫސްކޮށްލާނެ ފަދަ ދިރިއުޅުމެކެވެ. ސަލްމާ ބުނާ ގޮތުން އޭނާގެ އަމިއްލަ ހަޔާތަށް ބަލާ ނަމަ އެބުނާ ނަފްސާނީ ހިތްހަމަ ޖެހުމެއް ނުލިބުނެވެ. ސިކުނޑިއަށް ލުއިކަމެއް ނުލިބުނެވެ. އެހެންކަމުން ލޯބީގެ ދަތުރުގައި ކިތަންމެ ދުރަކަށް ދެވިފައި ވިޔަސް އަމާން ކަމެއް ނެތްނަމަ އެ ދަތުރެއް ޖެހޭނީ ހުއްޓާލާށެވެ. ސަލްމާގެ ވާހަކަ ކުރިއަށް ގެންދަމުން ބުނީ މި ޒަނާމުގައި ބައެއް މީހުން ދެކެނީ ނަފްސުދެކެ ލޯބިވުން އެއީ އަމިއްލަ އެދުން ބޮޑުވުން ކަމަށެވެ. ނުވަތަ އަމިއްލަ ނަފްސުގެ ދެއްކުންތެރިކަމެވެ. އަމިއްލަ ނަފްސުގެ ދެކެ ލޯބިވުމަކީ އަމިއްލަ އެދުމެއްނޫނެވެ. އަމިއްލަ ނަފްސު ދެކެ ތިމާ ލޯބިނުވެ އެހެން މީހުން ކައިރި ލޯބިވާން ބުނާނީ ކިހިނެތްތޯ ސަލްމާ ސުވާކު ކުރިއެވެ. ދިގު ޒަވާޖީ ހަޔާތެއް ހޭދަކުރަން ބޭނުން ނަމަ އެންމެ މުހިއްމުކަމާ އެކު ވިސްނަންވީ ތިމާއާއި ތިމާގެ ނަފްސަށް އަމާންކަމާއި އުފާވެރިކަން ލިބުމެވެ. ސަލްމާގެ ވާހަކަ ނިންމާލަމުން ބުނީ ”އަހަރެން ދިރިއުޅުނީ މަގޭ ނަފްސާނީ ސަލާމްތެރިކަން އިހުސާސް ނުވާ ދިރިއުޅުމެއްގަ، އަހަންނަށް އެމީހަކާއި އެކީ ހަމަޖެހުމެއް ނުލިބޭ މީހެއް، މަގޭ ދިރިއުޅުމުގެ އެއްބައިގެ ގޮތުގައި ބަލާނީ ކިހިނެތް؟ ”
ސަލްމާ އާއި ހާލިދުގެ އުފާވެރި މަޖާ ވީޑިއޯތަކާއި މެސެޖުތައް ކުއްލިއަކަށް ހުއްޓުމަކަށް އައި ފަހުން، އެކަމާ ގުޅިގެން ހާލިދު އެއްވެސް ވާހަކައެއް ނުދައްކައެވެ. ހާލިދުގެ ސޯސަލް މީޑިއާއިން އެކި ގައުމުތަކަށް ދަތުރުކޮށް، އެކި ކަންކަމާ ބެހޭ ވިޑީއޯތައް ކޮންމެވެސް ވަރަކަށް އަންނަނީ ޝެއަރ ކުރަމުންނެވެ.
ހާލިދު އާއި ސަލްމާގެ ވަކިވުމާއި ބެހޭ ގޮތުން އާއްމުން ދެކޭގޮތް؛
ޔުނައިޓެޑް އެރެބް އެމިރޭޓްސްއަށް އުފަން މި ދެމަފަރިންނަކީ ދުބާއީގެ ސެލެބްރިޓިންގެ ދަރަޖަ ލިބިފައިވާ ވަރަށް މަޝްހޫރު ޖޯޑެކެވެ. ދުނިޔޭގެ އެންމެ އުސް އިމާރާތް ބުރުޖު ހަލީފާގެ ލެޑްޑިސްޕްލޭ ގަައިވެސް މި ދެ މީހުންގެ ޓިކްޓޮކް ދައްކާފައިވެއެވެ. މުސްލިމުންގެ އާބާދީ އެންމެ ބޮޑު މި ސަހަރަހައްދުގެ މީހުން ގަބޫލުކުރަނީ އެ ދެމަފަރިންނަށް އެސްފީނާ ޖެހުނީ ކަމަށެވެ. ސޯސަލްމީޑިއާގައި މާ ބޮޑަށް އަމިއްލަ ދިރިއުޅުމުގެ ކަންކަމާއި އުފާވެރިކަމާއި ދެމީހުން އެކަކު އަނެކަކަށް ސަޕޯޓުކުރާވަރު ދެއްކުމުން ހަސަދަވެރިންގެ ލޯތަކުން މި ދެ މީހުން ދުރުކުރީއެވެ. އަނެއް ބަޔަކު ދެކޭ ގޮތުގައި ހުރިހާވެސް މައްސަލައަކީ ސަލްމާއެވެ. ސަލްމާ އަކީ ހިތް ނުފުރޭ އަންހެނެއް ކަމަށާއި ހުރިހާ ކަމެއް ފުރިހަމަވުމުންވެސް ޝަކުވާ ކުރުން ނުހުއްޓޭ މިޒާޖުގެ އަންހެނެއް ކަމަށެވެ. ކޮންމެ އިންސާނެއްގެ ހަޔާތުގެ އެކި ހިސާބުގައި އެކި ކަހަލަ ކަންކަމަޢި ދިމާވާނެ ކަމަށާއި އެ ކަންތައް ބޮލަށްލައިގެން، ރީތި ދިރިއުޅުމެއް ލިބުމުން އެ ދިރިއުޅުން ތެރެއަށް އެކަން ވައްޓާލަކަށް ނުޖެހޭނެ ކަމަށެވެ.
