އިޒްރޭލު ސިފައިންނަށް ބޮޑެތި ގެއްލުންތަކެއް ދިން ހަމާސް ޖަމާއަތުގެ ޖެހިލުން ކުޑަ ކޮމާންޑަރ މިދުހަތު މަބާޝަރ (މުބާޝިރު) ޝަހީދުކޮށްލައިފިއެވެ.
މިދުހަތު މަބާޝަ އަކީ ހަމާސް ޖަމާއަތުގެ މިލިޓަރީ ގޮފި އަލް ގައްސާމު ބްރިގޭޑުގެ ވެސްޓު ހާން ޔޫނުސްގެ ކޮމާންޑަރެވެ. އިޒްރޭލު ސިފައިން މައުލޫމާތުދޭ ގޮތުގައި މިދުހަތު ޝަހީދުކޮށްލީ އެ މީހުންނަށް ލިބުނު ސިއްރު މައުލޫމާތެއްގެ އެހީގައި ޝިންބެޓް (އިޒްރޭލުގެ އެތެރޭގެ ސެކިއުރިޓީ ސަރވިސް) ގެ އެހީތެރިކަމާ އެކުގައެވެ.
އިޒްރޭލުން ތުހުމަތުކުރާ ގޮތުގައި މަބާޝާއަކީ އިޒްރޭލަށް ހަމަލާ ދިނުމަށް ފޮނުވާ މިސައިލުތަކާއި ރޮކެޓު ހަމަލާތައް އަދި އިޒްރޭލު ސިފައިންނަށް ގެއްލުންތައް ލިބޭ ގޮތަށް ހަމަލާތައް ދިނުމުގައި މުހިއްމު ދައުރެއް އަދާކުރާ އިސް ކޮމާންޑަރެކެވެ. މަބާޝާގެ ބެލުމުގެ ދަށުން ހަމާސްގެ ފައުޖެއް ހާން ޔޫނުސްގައި ހަރަކާތްތެރިވާ ކަމަށްވެސް އިޒްރޭލުން ތުހުމަތު ކުރެއެވެ.
މަބާޝާ ޝަހީދުކޮށްލި މައްސަލާގައި މިހާތަނަށް ހަމާސްއިން ވަކި އެއްޗެއް ހާމައެއް ނުކުރެއެވެ. ހަމާސްގެ މިލިޓަރީ ޖިހާދީ އެއްވެސް ކޮމާންޑަރެއްގެ ފޮޓޯއާއި ވިޑީއޯ އަދި ފަހުގެ އެއްވެސް ފޫޓޭޖެއް ސޯސަލް މީޑިއާއި ހަބަރުތަކުގައިވެސް ބޭނުމެއް ނުކުރެއެވެ.
