ރަޝިޔާގެ ސަރުކާރާ ދެކޮޅަށް ބަގާވަތް ކުރަމުންދާ ވެގްނަރ ހަނގުރާމަވެރިން މައިތިރި ކުރަން ތައްޔާރަށް ހުރި ކަމަށް ޗެޗްނިޔާގެ ލީޑަރު ރަމަދާން ކަދިރޯވް ވިދާޅުވެއްޖެއެވެ. ރަޝީޔާގެ އަސްކަރިއްޔާއަށް އަދަބު ދޭނެ ކަމަށް ބުނެ، ވެގްނަރ ގުރޫޕުގެ ވެރިޔާ ޔެގްގެނީ ޕްރިގޯޒިން ވަނީ އިންޒާރު ދީފައެވެ. އޭނަގެ އިންޒާރާ އެއްގޮތަށް ވެގްނަރ ގުރޫޕުގެ ހާހަކަށް ވުރެ ގިނަ ހަނގުރާމަވެރިން ވަނީ ޔުކްރެއިންގެ ތެރެއިން ރަޝިޔާ ތެރެއަށް ވަދެފައެެވެ. ބައެއް ރިޕޯޓުތައް ބުނާ ގޮތުން ޕްރިގޯޒިން ގެ ކުލީ ސިފައިންވަނީ ރަޝިޔާގެ އަސްކަރީ މަރުކަޒެއް ހިފައި، އަސްކަރީ ހެލިކޮޕްޓަރެއްވެސް ވައްޓާލާފައެވެ.
ޗެޗްނިޔާގެ ލީޑަރު ރަމަދާން ކަދިރޯވު ވިދާޅުވީ، ވެގްނަރ ހަނގުރާމަވެރިންނާ ދެކޮޅަށް، ވަރަށް ވޭންދެނިވެ، ވަރުގަދަ ރައްދެއް ދީގެންވެސް އެމީހުން މައިތިރި ކުރަން ތައްޔާރަށް ތިބި ކަމަށެވެ. ޓެލެގްރާމް މެދުވެރިކޮށް ދެއްވި ބަޔާނެއްގައި ކަދިރޯވް ވިދާޅުވީ ޕްރޮގޯޒިން (ވެގްނާގެ ވެރިޔާ) ގެ އަމަލުކުރަމުން އެދަނީ ފަހަތުން އައިސް ބުރަކައްޓަށް ވަޅި ހެރުދުންފަދަ ގޮތަކަށް ކަމަށެވެ. ޕްރިގޯޒިން އަކީ ރަސިޔާގެ ވެރިންނަށާއި ރައްޔިތުންނަށް ގައްދާރެއް ކަމަށެވެ.
ކަދިރޯވް ގެ ބަޔާނުގައި ޗެޗްނިޔާގެ ލަސްކަރު މިހާރު ދަތުރުކުރަމުންދަނީ މަސްރަހު އެންމެ ހޫނު ސަރަހައްދަށް ކަމަށާއި ދާދި އަވަހަށް ރަޝިޔާގެ ލަސްކަރުތަކާ ގުޅިގެން، އެ ސަރަހައްދުގެ ހިމާޔަތުގައި ކުރަން ޖެހުނު ކޮންމެ ކަމެއް ކުރާނެ ކަމަށެވެ.
ޗެޗްނިޔާގެ މުޖާހިދުންގެ ވެރިޔާ ކަދިރޯވް އަކީ އަބަދުވެސް ރަޝިޔާގެ ރައީސް ޕުޓިން ގެ ވަރަށް އަރިސް ފަރާތެކެވެ. ޔުކްރެއިނުގައި މިހާރު ކުރިއަށްދާ ހަނގުރާމައިގައިވެސް ރަޝިޔާ ސިފައިންނާ އެކު ޔުކްރެއިނާ ދެކޮޅަށް ހަނގުރާމަ ކުރުމުގައި ޗެޗްނިޔާގެ މުޖާހިދުންގެ ލަޝްކަރެއް ބައިވެރިވެެފައިވަނީވެސް ޕުޓިންގެ އެދުމުގެ މަތިންނެވެ ވެގްނަރ ގުރޫޕަކީވެސް ރަޝިޔާ ސިފައިންނާ އެކު ހަނގުރާމަ ކުރަމުންދިޔަ ކުލީ ސިފައިންގެ ފައުޖެކެވެ. ރައީސް ޕުޓިންގެ ގާތް އެކުވެރިއެއް ކަމަށް ބުނާ ޔެގްނީ ޕްރިގޯޒިން ވެރިކަމުގެ ދަށުގައި ހަނގުރާމަ ކުރަމުންދާ މި ގުރޫޕުގައި ހިމެނެނީ ރަޝިޔާ ޖަލުތަކުގައި ތިބި ކުއްވެރިންނާ ބޮޑު އާމްދަނީއެއް ލިބޭ ގޮތަށް ހޯދާފައިވާ އަސްކަރީ ތަމްރީން ލިބިފއި ތިބި މީހުންނެވެ. ރަޝީޔާގެ އަސްކަރީ އެހީތެރިކަން ލިބިގެން ޔުކްރެއިނުގައި ހަނގުރާމަ ކުރަމުންދިޔަ ވެގްނަ ގުރޫޕުން ފަހަކަށް އައިސް އެކި ޝަކުވާތައް ކުރަމުން އައިސް އެންމެ ފަހުން މިއަދުގެ ވަގުތެއްގައި ވަނީ ފާޅުގައި ރަޝީޔާގެ އަސްކަރިއްޔާއާ ދެކޮޅަށް ތެދުވެފައެވެ.
މި މައްސަލާގައި ރައީސް ޕުޓިން ވަނީ މިއަދު ގައުމާ މުހާތަބް ކުރައްވާ ގައްދާރުންނާ ބާގީންނަށް އަދަބު ދެއްވާނެ ކަމުގެ ވައުދުވެފައެވެ. އަދި ރަޝީޔާގެ ބިމާއި ރައްޔިތުން ހިމާޔަތުގައި ކޮންމެ އަގެއް ދައްކަވަން ވެސް ތައްޔާރަށް ހުންނެވި ކަމަށްވެސް ޕުޓން ވައުދުވިއެވެ.
