އިޒްރޭލު ސިފައިން ގާޒާއަށް ދެމުންދާ އުދުވާނީ ހަމަލާގައި ރަފާ ގައި ހުންނަ ’ދަ އަލީ މޮސްކު‘ ބިމާ ހަމަކޮށްލައިފިއެވެ.
މި ހަމަލާ ދިނީ އެ މިސްކިތާއި އެ މިސްކިތު ކައިރީގައި ގިނަ ބަޔަކު ތިބި ވަގުތެއްގައެވެ. އެހެންކަމުން މި ހަމަލކާގައި ގިނަ އަދަދެއްގެ ބަޔަކު ވަނީ މިސްކިތުގެ ފާރުތަކުގެ ދަށުވެ ގެއްލިފައެވެ. މިހާތަނަށް ފެނުނު ބައެއް މީހުން ބޮޑެތި ޒަހަމު ތަކާއި އެކު ފުރާނަ ސަލާމަތް ކުރެވުނު އިރު 11 މީހުން ޝަހީދުވިއެވެ. މި އަދަދު މިއަށްވުރެވެސް އިތުވާނެ ކަމަށް ބެލެވެއެވެ. އެއީ އިޒްރޭލުން ހުއްޓުމެއް ނެތި ގާޒާއަށް ދެމުންދާ ހަމަލާތަކުގައި މީހުން ސަލާމަތްކުރަންވެސް ފުރުސަތު ނުލިބި، އިމާރަތްތަކުގެ ދަށުވާ މީހުން ނެގުމުގައި ހުރި ގޮންޖެހުންތަކާއެކުގައެވެ. އިޒްރޭލުގެ ހަމަލާތަކުގެ ސަބަބުން އެހީގެ މަސައްކަތްތަކުގައި ހަރަކާތްތެރިވަމުން އަންނަ ރެޑްކުރޮސެންޓު ފަދަ ޖަމާއަތްތަކުންވެސް އެކަށީގެންވާ އެހީތެރިކަމެއް ފޯރުކޮށެއް ނުދެވެއެވެ.
އިޒްރޭލުގެ މިސައިލު ހަމަލާގައި މި އަދު ބިމާ ހަމަކޮށްލި ’ދަ އަލީ މިސްކިތާއި‘ އެކު ހަނގުރާމަ ފެށި ފަހުން މިހާތަނަށް ވަނީ ފަލަސްތީނުގެ 220 މިސްކިތް ބިމާ ހަމަކޮށްލާފައެވެ.
