މަސްތުވާތަކެތީގެ ސަބަބުން އޯވަޑޯސަކަށް ގޮސް، 3 ސްޓްރޯކާއި ހާޓްއެޓޭކަކުން ކިރިޔާ ފުރާނަ ސަލާމަތްވީ ކަމަށް މަޝްހޫރު ލަވަކިއުންތެރިޔާ ޑެމީލޮވާޓޯ ހާމަކޮށްފިއެވެ. ޑެމީލޮވާޓޯ ގެ ހަޔާތުގެ ވާހަކަ ކިޔައިދޭ ޔޫޓިއުބް ޕްރޮގްރާމް ’ޑާންސިން ވިތު ދަ ޑެވިލް‘ އަށް ކިޔާދިން ގޮތުގައި މަސްތުވާތަކެތީގެ ސަބަބުން އޭރު ކިރިޔާ ފުރާނަ ސަލާމަތްވިޔަސް އަލުން އެނބުރި އާދެވުނީ ބަލި މީހެއްގެ ގޮތުގައެވެ. މި ގޮތުން މިހާރުވެސް ދަނީ ސިކުނޑީގެ ބައްޔަކަށް ބޭސް ކުރަމުން ކަމަށާއި އެކަން މުޅި އުމުރަށްވެސް ތަހައްމަލު ކުރަން ޖެހޭނެކަމަށެވެ.
’ޑޮކްޓަރުވެސް އަހަރެން ކައިރި ބުނީ ބާކީ އިނީ 10 ވަރަކަށް މިނިޓުގެ ވަގުތުކޮޅެކޭ، އެވަގުތު އެތައް ބައިވަރު އެއްޗެއް ހިތަށް އަރަމުންދިޔަ، އަހަރެން ލޯބިވާ އެތައް ބަޔަކާއި އަހަރެން ދެކެ ލޯބިވާ މީހުންނާއި އަދި އަދި އަހަރެން އެކަމަކަށް ލޯބިވާ ކަންތައްތައް މަތިން ހަނދާވި، އެކަންތައްތަކާ ވެސް ދިރިހުންނަން ޖެހޭނެ ކަމަށް ނަފްސަށް ވިސްނާދިނިން‘ މަރުގެ އެތި ފަހަރަކުން ސަލާމަތްވި ހާދިސާ ކިޔާދެމުން ޑެމީ އިތުރަށް ބުނި ގޮތުގައި ދެން އެފަދަ ކަމެއް ތަކުރާރު ކުރުމަށް އޭނަގެ ސިއްހަތުވެސް ތަނެއް ނުދެއެވެ. އެންމެ ލޯބިވި މަސައްކަތް މިއުޒކުގައި ހަރަކާތްތެރިވުމަށްވެސް ޑްރަގުގެ ސަބަބުން ހުރަސް އެޅެއެވެ. މިހާރުވެސް އޭރުގެ އާދަތަކުން ލިބުނު ގެއްލުމަށް ފަރުވާ ކުރާ ކަމަށާއި ކާރު ވެސް ނުދުއްވާ ކަމަށާއި އެއީ ފެނުމުގައި ވެސް މައްސަލަތަކެއް ހުރުމުން ރައްކާތެރި ނުވާނެތީއެވެ. ފޮތް ކިޔުމަކީވެސް މިހާރު އުނދަގޫ ކަމެއް ކަމަށާއި ގިނައިރު ފޮތަށް ބަލާއިރު އަކުރުތައް އެއްވެފައި ހުންނަ ކަހަލަ ގޮތަކަށް ސިފަވެއެވެ.
”ދިރިއުޅުމުގައި ހުންނާނެ ހުރަސް ކުރަން ނެޖެހޭ އިންތަކެއް، އެ ލައިން ހުރަސްކޮށް ދާން ނުޖެހޭ ހިސާބަށް ދެވިފައިވާ ކަމަށް ގަބޫލުކުރަން‘ ޑެމީގެ ހަޔާތުގެ ވާހަކަ ކިޔައިދޭ ޕްރޮގްރާމް ނިންމާލަމުން ބުންޏެވެ. އަހަރެން ކުރީގެ ހަޔާތުން ލިބުނީ ފިލާވަޅެއް އެހެން ވިޔަސް އެކަމާ ދެރަވެ ރޮއި ހިތާމަކޮށްގެން މުސްތަގުބަލު ހަލާކުކޮށްލާކަށް ބޭނުމެއްނުވޭ‘ ޑެމީ އިތުރަށް ކިޔާދިނެވެ. މި ޕްރޮގްރާމުގައި ޑެމީގެ ގާތް ރަހުމަތްތެރިންނާ މަންމައާއި ބައްޕަ އަދި އާއިލާ މީހުންގެ އިންޓަވިއުވެސް ހިމަނާފައިވެއެވެ. އެމީހުންގެ ވާހަކައިންވެސް ޑެމީ ކުޑައިރުންފެށީގެން މިއަދާ ހަމައަށް ދިރިއުޅުން ކުރިއަށް ދިޔަ ގޮތާއި އެމީހުންނާ މެދު ބެހެއްޓި ގާތްކަށް ކިޔާދީފައިވެއެވެ. މިއުޒިކީ ދާއިރާއިން ޑެމީގެ އެންމެ ގާތް މީހުން ކަމަށްވާ ސަރ އެލްޓަން ޖޯން އާއި 2000 ގެ އަހަރުތަކުގައި ވަރަށް ބޮޑު މަގުބޫލުކަމެއް ލިބުނު ކްރިސްޓީނާ އެގްލިއެރާ ވެސް މި ޕްރޮގްރާމަށް ވާހަކަދައްކާފައިވެއެވެ
