މިއީ ހިންދީ ފިލްމު ބަލާ އަދި ތާއީދުކުރާ ފަރާތްތަކަށް ވަރަށްވެސް އުފާވެރި ހަބަރެކެވެ. ވަކިން ހާއްސަކޮށް ކެޓްރީނާ ކައިފް އަދި ވިކީ ކޯޝަލްގެ ސަޕޯޓަރުންނަށް ހާއްސަ ހަބަރެކެވެ.
ކެޓްރީނާ ކައިފް އަދި ވިކީ ކޯޝަލްގެ ދެމަފިރިންގެ އާއިލާއަށް މެންބަރަކު އުފަން ވަނީއެވެ.
ހިންދުސްތާން ޓައިމްސްގައި ރިޕޯޓް ކޮށްފައިވާ ގޮތުން ކެޓްރީނާ އިނީ ބަލިވެއެވެ.ކެޓްރީނާ އާއި ވިކީ މިވަގުތު ޗުއްޓީ ހޭދަކުރަމުންދަނީ ލަންޑަންގައެވެ.
ދާދިފަހުން އެދެމީހުން އެކީ ލަންޑަނުގެ މަގެއްގައި އަތާއަތް ގުޅުވާލައިގެން ހިނގާފަ ދިޔަ މަންޒަރު ބަޔަކަށް ފެނިގެން ވީޑިއޯ ކޮށްފައިވެއެވެ.
މިވީޑިއޯ މިހާރު ސޯޝަލް މީޑިއާގައި ދައުރުވަމުންދާއިރު، ކެޓްރީނާ ކައިފް ލައިގެން ހުރީ ގަޔަށް ވަރަށް ދޫކޮށްހުރި ހެދުމެކެވެ. އަދި މި މަންޒަރު ދުށް ބައެއް މީހުން ހާމަކުރި ގޮތުގައި ދާދިފަހުން ބަލިވެ އިންކަން އިއުލާންކުރި ދީޕިކާ ޕަޑުކޯން އަށް ވުރެ ކެޓްރީނާގެ ބަނޑުފެންނަލެއް ބޮޑެވެ.
ލަފާކުރެވޭ ގޮތުގައި ކެޓްރީނާގެ ފުރަތަމަ ދަރިފުޅު އުފަންވާނީ ލަންޑަނުގައެވެ.
ފަހަކަށް އައިސް ބޮލީވުޑްގެ މަޝްހޫރު ގިނަ ތަރިން ވިހެއުމަށްޓަކައި ލަންޑަން ދާކަން ވަނީ ފާހަގަ ކުރެވިފައެވެ. އެގޮތުން މަޝްހޫރު ބަތަލާ އަނުޝްކާ ޝަރުމާގެ ދެވަނަ ދަރިފުޅު އަކޭ ކޯލީ ވެސް ލިބުނީ ލަންޑަންގައެވެ.
