އިޒްރޭލު ސިފައިން ފަލަސްތީނުގެ ނިކަމެތި ރައްޔިތުންނާ ދެކޮޅަށް ދެމުންދާ ހަމަލާތަކުގައި އެންމެ ފަހުން ހޮސްޕިޓަލަށްވެސް ބޮން އަޅާ އެތައް ބަޔަކު ޝަހީދުކޮށްލުމުން ދިވެހިރާއްޖެއިން އެކަން ކުށްވެރިކޮށްފިއެވެ. ގާޒާގެ އަލް އަހްލީ ހޮސްޕިޓަލަށް ރޭ އިސްރާއީލުން ދިން ހަމަލާގައި ހޮސްޕިޓަލުގައި ފަރުވާދެމުންދިޔަ އެތައް ސަތޭކަ ބަޔަކުވަނީ ޝަހީދުވެފައެވެ.
މި ހަމަލާއާ ގުޅޭގޮތުން ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ، ހޮސްޕިޓަލްތަކާއި އާންމު ރައްޔިތުން ބޭނުންކުރާ އުމްރާނީ ވަސީލަތްތަކާއި އާންމުންނަށް އަމާޒުކޮށްގެން ހަމަލާދިނުމަކީ އިންސާނިއްޔަތާ ޚިލާފުކަމެއްކަމަށެވެ.
މީގެ އިތުރުން، ގަސްތުގައި ހިންގާ މި އަނިޔާވެރި އަމަލުތަކަށް ނިމުމެއް ގެނައުމަށާއި، ޣައްޒާއަށް އިންސާނީ އެހީތެރިކަން ފޯރުކޮށް ދިނުމަށް ޓަކައި ކުރެވެން ހުރި ހުރިހާ މަސައްކަތެއް ކުރުމަށް ޝާހިދު ވަނީ ބައިނަލްއަގުވާމީ މުޖުތަމައަށް ގޮވާލައްވާފައެވެ.
ފަލަސްތީނުގެ މި ހޮސްޕިޓަލަށް އިސްރާއީލުން ދިން ހަމަލާގައި ޝަހީދުވި މީހުންގެ އަދަދު 500އަށް ވުރެ އިތުރުވާނެ ކަމަށް އޮފިޝަލުން ބުނެއެވެ.
