ކޮންމެ އަހަރެއްގެ ބޮޑު އީދުގައި ރާއްޖޭގެ އެކި ރަށްރަށުގައި އީދު ފާހަގަކުރަމުން އަންނަ އިރު ބައެއް ރަށްރަށުގައި އީދު އެންމެ ދުވަހެއް ފާހަގަކޮށްލާފައި ނިންމާލިޔަސް މި ފަހަރު އީދުގެ ހުރިހާ ދުވަހެއް، އީދެއްގެ ސިފައިގައި ފާހަގަކުރާ ރަށަކަށް އދ. ދަނގެތިވާނެއެވެ. ލޯކަލް ޓުއަރިޒަމް ގައި ކުރިއަރަމުން އަންނަ މި ރަށުން މައުލޫމާތުދޭ ގޮތުގައި އދ. އަތޮޅުން އެންމެ ފޯރިގަފަކޮށް މި ފަހަރު އީދު ފާހަގަ ކުރާ ރަށަކީ ދަނގެއްޗެވެ. ދަނގެތި ޒުވާނުންގެ ޖަމުއިއްޔާއިން އިސް ނަގައިގެން މި ފަހަރު އީދު ފާހަގުކރާއިރު، އީދު ބަންދުގެ އެންމެ ރެއެއް ދުވާލެއްވެސް މުނިފޫހި ފިލުމުގެ ހަރާކާތެއް ނެތި ނުދެއެވެ.
އީދު ނަމާދަށް ފަހު ބާއްވާ ސައި ގެ ޖާފަތަކުން އީދު ފަށާއިރު، މި ސައި ހާއްސަކޮށްފައިވަނީ އީދު ނަމާދުން ނިމިގެން އަންނަ މީހުންނަށް ދެވޭ ސައިގެ ގޮތުގައެވެ. މިއީ އެރަށުގައި ޒަމާނުންފެށިގެން ކުރަމުން އަންނަ ކަމެކެވެ. އީދު ނަމާދަށް ފަހު އެންމެން އެއްތާކުން ޖަމާވެ އީދުގެ ތަހުނިޔާ ކިއުމަށް ބާއްވާ ސައިގެ ފަހުން އީދު ކުޅިވަރުތައް ރަސްމީކޮށް ފެށޭނެއެވެ.
އީދުގެ އެހެނިހެން ހަރަކާތްތަކާ ބެހޭގޮތުން ދަނގެތީ ޒުވާނުންގެ ޖަމުއިއްޔާގެ މުއައްސިސް ހުސެއިން ރަޝީދު ވިދާޅުވީ، އީދު ދުވަހު ހަވީރު އޮންނާނީ ރަސްމީކޮށް އީދު ކުޅިވަރުތައް ފެށުމެވެ. އެއީ އީދު ނެރުން ކިޔާ ފޯރި ގަދަ ހަރަކާތެކެވެ. މި ހަރަކާތުގައި އޮންނާނީ މާލި ޕެރޭޑެކެވެ. މާލިތައް ތިބޭނީ ފަތުންނާއި ގޯނި ފަދަ ތަކެތިން ތައްޔާރުކޮށްފައެވެ. މީގެ އިތުރުން މި ފަހަރު އުކާލާ ކުނިބުނި (ޕްލާސްޓިކް ފަދަ) ބޭނުންކޮށްގެން ވެސް މާލި ހަދަން ގަސްތުކުރެއެވެ. މި ކުޅިވަރުގެ މަގުމަތީ ޕެރޭޑުގައި ބޮޑުބެރުގެ ހަރަކާތްތައް ކުރިއަށް ގެންދަނީ މަހިނބަދޫ ޑަނޑޫރާ ގުރޫޕުންނެވެ. ރޭގަނޑު މި ގުރޫޕުގެ ބޮޑުބެރުވެސް އޮންނާނެ ކަމަށްވެސް އެފަރާތުން ވިދާޅުވިއެވެ.
އީދު ގެ ދެވަނަ ދުވަހުގެ ހަރަކާތްތަކަށް ބަލާއިރު އީދުގެ ދެވަނަ ދުވަހު ހެނދުނު ފަށަނީ ކުޑަކުދިންގެ ހަރަކާތްތަކުންނެވެ. މި ގޮތުން ’ކޮއްކޮމެންގެ ކުލަ ފެން‘ ނަމުގައި ބާއްވާ މި ހަރަކާތުގައި ޕޫލުތައް ހެދި އެ ތަންތަން ކުޑަކުދިން ބޭނުން ކުރެވޭ ގޮތަށް ތައްޔާރު ކުރެވޭނެ ކަމަށާއި މި ޕޫލުތަކަށް އެރި ފެނާ ކުޅުމުގައި ކުލަ ޖެހުމާއި އެނޫންވެސް މަޖާ ކަންތައްތައް ހިމަނާފައިވާނެ ކަމަށް އެފަރާތުން މައުލޫމާތު ދެއެވެ.
ހެނދުނު ކުޑަކުދިންގެ ފެން ކުލަ ޕޫލުން އަދި އެ ކުދިންގެ އިވެންޓު ނިމުނީއެއް ނޫނެވެ. މެންދުރު ފަހު އޮންނަ މަސްރޭހަށް މީހުން ފުރުވާލުމުގައިވެސް ކުޑަކުދިންގެ ބައިވެރިވުން އޮންނާނެއެވެ. މި ގޮތުން މަހަށް ފުރާ މީހުން ފުރުވަން ދާނީ ކުޑަކުދިންނާ އެކީ މަސްވެރިން ގޮތަށް އެކުދިން ހެދުންލައްވާ، ކަރުދާހުން މަސް ހަދައިގެން، އެ ހިފައިގެންނެވެ. މަސްރޭހުގެ ބައިވެރިން ފުރުވާލުމަށް ފަހު އެމީހުން މަސްބާނައިގެން އެނބުރި އަންނަން ހަމަޖެހިފައިވަނީ ރޭގަނޑެވެ.
އީދުގެ ތިންވަނަ ދުވަހު އޮންނާނީ މަގުތަކުގައި ބިލެތްދަފި ނެގުމާ ކޯޑި ހިންގުމެވެ. ބިލެއްދަފި ނެގުމުގެ ހަރަކާތަށް މާލެއިން ގެންނަނީ މަޝްހޫރު ބޮޑުބެރު ގުރޫޕު 1438އެވެ. މި ދުވަހުގެ ހަރަކާތަށް ފަހު ރޭގަނޑަށް ހަމަޖައްސާފައިވަނީ 1438 ގެ ބޮޑުބެރު ޝޯވއެވެ.
އީދުގެ ހަތަރުވަނަ ދުވަހު އޮންނާނީ ކެއެމަކާ އެކު، އެކިއެކި މުބާރާތްތަކުން ވަނަތަކަށް ދިޔަ ފަރާތްތައްކަށް އިނާމު ދިނުމާއި، އީދު ގެ އެކި ކަންކަމުގައި އެހީތެރިކަން ލިބުނު ފަރާތްތަކަށް ސެޓްފިކެޓް ދިނުމަށް ބާއްވާ ހަފްލާއެކެވެ.
ޒުވާނުންގެ ޖަމުއިއްޔާއިން ހާމަކުރި ގޮތުގައި އެ ފަރާތަށް އީދުގެ މިހާ ގިނަ ހަރަކާތްތަކެއް ބޭއްވެނީ ވަރަށް ގިނަ ބައެއްގެ އެހީތެރިކަމާ އެއްބާރުލުމާ އެކީގައެވެ. މި ގޮތުން ސްޓެލްކޯ ގެ ނަން ޝުކުރުވެރިކަމާއެކު ފާހަގަ ކުރެއެވެ. މި ފަހަރުގެ ދަނގެތީގެ އީދު ކުޅިވަރުތަކުގައި ބޭނުން ކުރަނީވެސް ’ސްޓެލްކޯ ދަނގެތީ އީދު ފޯރީގެ‘ ނަމުގައެވެ. މީގެ އިތުރުން ދަނގެތީގެ ކައުންސިލާއި ބައެއް ވިޔަފާރިވެރިންނާއި އާއްމުންގެ އެހީތެރިކަމާ އެއްބާރުލުން ވަރަށް ބޮޑަށް ލިބޭތީ އެކަން ޝުކުރުވެރިކަމާ އެކު ފާހަގަކުރެއެވެ.
މި ހިސާބުން އަދި ދަނގެތީގެ އީދު ކުޅިވަރު ނިމުނީއެއް ނޫނެވެ. ފަހަރެއްގައި ސަޕްރައިޒް އިވެންޓެއްވެސް އޮވެދާނެ ކަމުގެ އިޝާރާތެއް ޒުވާނުން ޖަމުއިއްޔާގެ މުއައްސިސް ހުސެއިން ރަޝިދު ދެއްވިއެވެ.
މި ފަހަރު ފޫހި ނުވެ، އީދެއް ނިންމާލަން ބޭނުން ނަމަ ދާންވީ ދަނގެއްޗަށެވެ.
