ސޫދާންގެ ވެރިރަށް ޚަރްތޫމްގައި، ޕެރަމިލިޓަރީ ގްރޫޕެއްގެ ހަނގުރާމަވެރިންނާއި، ސޫދާން ސިފައިންނާ ދެމެދު ބަދަލުކުރަމުން އަންނަ ހަމަލާތަކުގައި 56 މީހުން މަރުވެއްޖެއެވެ.
މީޑިއާ ރިޕޯޓްތައް ބުނާގޮތުގައި، ސޫދާންގައި ނުފޫޒުގަދަ ޕެރަމިލިޓަރީ ގްރޫޕެއް ކަމަށްވާ، ރެޕިޑް ސަޕޯޓް ފޯސަސްގެ ހަނގުރާމަވެރިން ހަމަލާތައް ދޭން ފަށާފައިވަނީ، ސޫދާންގެ ސަރުކާރު، އަސްކަރީ ބަޣާވާތަކުން އިންގިލާބު ކޮށްލުމަށެވެ. މި ހަމަލާތަކުގައި މިހާތަނަށް 56 މީހުން މަރުވެ، 595 މީހުންވަނީ ޒަޚަމްވެފައެވެ.
ސޫދާނުގެ މީޑިއާތަކުން ހާމަކުރާ ގޮތުގައި އެމީހުން އެންމެފުރަތަމަ ހަމަލާތައް އަމާޒުކުރީ، ޚަރްތޫމްގައި ހުންނަ ސޫދާން ސިފައިންގެ މައި ބޭހަށެވެ. އޭގެފަހުން، ސޫދާންގެ އެކި ހިސާބުތަކުގައި ހުރި ސިފައިންގެ ބޭސްތަކަށް އެމީހުންގެ ހަމަލާތައް އަމާޒުކުރިއެވެ.
މުޅިން ކަށަވަރުނުވާ މައުލޫމާތުތައް ބުނާގޮތުގައި، ހަނގުރާމަވެރިން މިހާރުވަނީ ސޫދާންގެ ރިޔާސީ ގަނޑުވަރާއި، ސިފައިންގެ ވެރިޔާގެ ގެކޮޅާއި، އަދި ވެރިރަށަށް ނިސްބަތްވާ ޚަރްތޫމް އިންޓަރނޭޝަނަލް އެއަރޕޯޓްވެސް ހިފާފައެވެ. އެކަމަކު، ސޫދާން ސަރުކާރުގެ ޖެނެރަލް އިންޓެލިޖެންސް ސަރވިސްއިން ބުނެފައިވަނީ، ހަނގުރާމަވެރިންނަށް ރިޔާސީ ގަނޑުވަރު ނުހިފޭ ކަމަށާއި، އެމީހުން ހަދަނީ ދޮގު ކަމަށެވެ.
ރެޕިޑް ސަޕޯޓް ފޯރސަސްއިން ބުނެފައިވަނީ، ސޫދާންގެ އުތުރުގެ މެރޯވީ ސިޓީއާއި، ދެކުނުން އަލް އުބައިދް ސިޓީގެ އެއަރޕޯޓްވެސް މިހާރު އޮތީ އެމީހުންގެ ކޮންޓްރޯލްގެ ދަށުގައި ކަމަށެވެ.
ސޫދާން ސިފައިން ބުނެފައިވަނީ، އެމީހުން ހަނގުރާމަވެރިންނާ ދެކޮޅަށް ވަރުގަދައަށް ހަމަލާތައް ދެމުންގެންދާ ކަމަށެވެ.
ސޫދާން ސިފައިންގެ މަތިންދާ ބޯޓުތަކާއި، ހެލިކޮޕްޓަރުތައް އުދުހޭ މަންޒަރު ފެންނައިރު، އާންމުން ބިރުން ފިލަން ދުވާ މަންޒަރު ފެންނަ އެތައް ވީޑިއޯ އެއްވެސް ސޯޝަލް މީޑިއާގައި ދައުރުވަމުން އެބަދެއެވެ.
ސޫދާން ސިފައިންނާއި، ރެޕިޑް ސަޕޯޓް ފޯރސަސްގެ ހަނގުރާމަވެރިންނާ ދެމެދު ހަމަލާތައް ބަދަލުކުރަން މިފެށީ، މަސްރަހް ވަރަށް ނުތަނަވަސްވެފައި އޮންނަތާ ދުވަސްކޮޅެއް ފަހުންނެވެ.
ހަނގުރާމަ ފެށުމާ ގުޅިގެން ދުނިޔޭގެ ގައުމުތަކުން ގެންދަނީ، ސޫދާންގައި ތިބި އެގައުމުތަކުގެ ރައްޔިތުން ރައްކާތެރިވުމަށް އިލްތިމާސް ކުރަމުންނެވެ.
