އިޒްރޭލު ސިފައިން ގާޒާގެ އަލް ޝިފާ ހޮސްޕިޓަލް ހިފައި އެތަނުގެ ބަލިމީހުންނާއި ވެރިން ހައްޔަރުކުރަން ފަށައިފިއެވެ. މިދިޔަ މަހު 7 ވަނަ ދުވަހުން ފެށިގެން އިޒްރޭލު ސިފައިން މެދު ނުކެނޑި ދެމުންދާ ހަމަލާތަކުގައި ޒަހަމުވާ ގިނަ އަަދަދެއްގެ ފަލަސްތީނު ރައްޔިތުން ފަރުވާ ހޯދަމުންދާ ހޮސްޕިޓަލް ހިފާފައިވަނީ ރޭގެ ވަގުތެއްގައެވެ. މިސައިލު ހަމަލާއިން ހޮސްޕިޓަލު ވަށައިގެން ހުރި އިމާރާތްތައް ބިމާ ހަމަކުރުމަށް ފަހު ހޮސްޕިޓަލު ވަށާލައިގެން ތިބި އިޒްރޭލު ސިފައިން އަލްޝިފާ ހޮސްޕިޓަލަށް ވަދެ އެންމެ ފުރަތަމަވެސް ހައްޔަރުކުރީ އިމަޖެންސީ ހިދުމަތްތަކާ ހަވާލުވެ ހުރި ވެރިޔާއެވެ. ހައްޔަރުކޮށް ބަރަހަނާ ހާލުގައި ކަނު ބަނދެގެން ގެންގޮސްފައިވަނީ ކޮން ތަނަކަށް ކަމެއް ސާފު ނުވާ ކަމަށް ގާޒާގެ ނޫހެއް ކަމަށްވާ ގުދުސް މީޑިއާއިން މައުލޫމާތުދެއެވެ.
އަލްޖަޒީރާއިން މައުލޫމާތުދޭ ގޮތުގައި އިޒްރޭލު ސިފައިންދަނީ ބަލީ މީހުން އެއްތަނަކަށް ޖަމާކޮށް، ފަހަރަކު މީހަކާ ސުވާލު ކުރަމުންނެވެ. އިޒްރޭލު ދިފާއި ވުޒާރާއިންވެސް މި ކަން ކަށަވަރުކޮށްދޭއިރު އެމީހުން ބުނަނީ އެކަންތައްތައް އެމަގުން ކުރަނީ ފަލަސްތީނުގެ މުޖާހިދުން ގެ މައުލޫމާތު ހޯދުމަށެވެ.
މުޅި ދުނިޔެއިން އިޒްރޭލާ ދެކޮޅަށް ހަމަލާތައް ހުއްޓާލަން ގޮވާލަމުންދާއިރު ހާއްސަކޮށް ސިއްހީ ހިދުމަތްދޭ ތަންތަނަށް ހަމަލާދޭން ދެކޮޅު ހަދަމުން ދަނިކޮށް، އިޒްރޭލުން ވަނީ މީގެ ކުރިންވެސް އެތައް ހޮސްޕިޓަލަކާއި މިސްކިތްތަކަށް ހަމަލާދީ އެތައް ބަޔަކު ޝަހީދުކޮށްލާފައެވެ.
