ފަލަސްތީނުގެ ރައްޔިތުންނާ ދެކޮޅަށް އިޒްރާއިލުން ފަށާފައިވާ ހަނގުރާމައިގައިގެ އިތުރުން ލުބުނާނުގެ ބޯޑަރުގައިވެސް އިޒްރޭލުން އާ ހަނގުރާމައެއް ފެށުމަށް ތައްޔާރުވެއްޖެއެވެ. ފަލަސްތީނުގެ ރައްޔިތުންގެ ދިފާއުގައި ހަނގުރާމަ ކުރަމުންދާ ހަމާސް ޖަމާއަތް ނައްތާލުމުގެ މަގުސަދުގައި ކަމަށްބުނެ އެއްގަމާއި ވައިގެ މަގުން ގާޒާއަށް ދެމުންދާ ހަމަލާތަކުގެ އިތުރުން ލުބުނާނުގެ ބޯޑަރަށްވެސް އިޒްރާއިލުން ދަނީ ސިފައިންނާއި ހަތިޔާރު ޖަމާކުރަމުންނެވެ. ފަލަސްތީނުގެ ހަމާސް ޖަމާއަތަށް ވާގިވެރިވުމަށް ލުބުނާނުގެ ހިޒްބުﷲ ޖަމާއަތުން އިޒްރޭލުގެ މަގާމުތަކަށް ހަމަލާދޭ މައްސަލާގައި އިޒްރޭލުން މިހާރު ބޭނުންވަނީ ހިޒްބުﷲއާ ދެކޮޅަށްވެސް ހަނގުރާމައެއް ފެށުމަށެވެ.
ހިޒްބުﷲ ޖަމާއަތުން ބުނަމުންދަނީ އެމީހުން ހަމަލާދެނީ އިޒްރޭލުން ހިފާފައިވާ ލުބުނާނުގެ ބިންތަކުގައި ތިބި އިޒްރޭލު ސިފައިންނަށެވެ. އެއީ ލުބުނާނުގެ މިލްކެއް ކަމަށާއި ލުބުނާނުގެ ގޯލާން އުސްބިންތައް (ދަނޑު ބިންތައްވެސް ހިމެނޭ ގޮތަށް) އިޒްރޭލުން ހިފާފައިވަނީ އަރަބި-އިޒްރޭލު ހަނގުރާމައިގައެވެ.
މެދުއިރުމަތީގެ ކަންކަން ދިރާސާކުރައްވާ ފަރާތްތަކުން ލަފާކުރާ ގޮތުގައި ލުބުނާނުގެ ބޯޑަރުގައި ހިޒްބުﷲއާއި ކުރިމަތި ލުމަކީ ގާޒާއަށް ހަމަލާ ދިނުންހާ ފަސޭހަ ކަމެއް ނޫނެވެ. އެއީ ވޭތުވެދިޔަ ދުވަސްތަކުގައި ހިޒްބުﷲ ޖަމާއަތުން ހަތިޔާރުތައް ހޯދާ އެތައް ގޮތަކުން ވަރުގަދަކޮށްފައިވުމެވެ. އެހެންކަމުން އެއްފަހަރާ ދެ ތަނުގައި ހަނގުރާމަ ކުރަމުން ހިޒްބުﷲ ބަލި ކުރުމަކީ އިޒްރޭލަށް ކުރަން އުނދަގޫ އަދި ގެއްލުން ބޮޑު ކަމަކަށްވާނެއެވެ.
