އިޒްރޭލުގެ ލާއިންސާނި އަމަލުތަކާއި، ފަލަސްތީނު ރައްޔިތުންނާ ދެކޮޅަށް ދެމުންދާ އުދުވާނީ ހަމަލާތަކާ ދެކޮޅަށް އިނގިރޭސި ވިލާތުގައި އެއްވުންތައް ބާއްވަމުން އަންނާތީ އެކަމަށް ފާޑުކިޔާ، އެއްވުންތަކާ ދެކޮޅަށް ވާހަކަ ދެއްކި މިނިސްޓަރު މަގާމުން ވަކިކޮށްފިއެވެ.
އިނގިރޭސި ވިލާތުގައި ވެރިކަންކުރާ ކޮންޒަވެޓިވް ޕާޓީގެ ބާރުގަދަ ހޯމް ސެކެޓްރީ ސުއެލާ ބްރޭވްމަން މަގާމުން ވަކިކޮށްފައިވަނީ އެކަމަނާގެ އިސްތިއުފާއަށް އާއްމު ރައްޔިތުން ގޮވާލަމުން ދިއުމާއެކު ބޮޑުވަޒީރު ރިޝީ ސުނާކަށް ޕާޓީ ތެރެއިންވެސް ފިއްތުންތައް ކުރިމަތި ވުމުންނެވެ. ސުއެލާ ވަނީ އިނގިރޭސި ވެރިރަށް ލަންޑަންގެ މަގުތަކަށް އެއްވި މީހުންނަށް ވަރަށް ބޮޑަށް މަލާމަތްކޮށް ފާޑުކިޔާފައެވެ. އިނގިރޭސި ދާހިލީ ވަޒީރުގެ ހައިސިއްޔަތުން ގައުމުގެ އެތެރޭގެ މަސްލަހަތާއި ރައްކާތެރިކަން މުހިއްމުވާނެ ކަމަށާއި ފަލަސްތީނަށް ސަޕޯޓުކޮށް އެއްވާ މީހުންނަކީ ނުރައްކާތެރި ފިކުރަކަށް ތާއިދުކުރާ ބައެއް ކަމަށް ސިފަކޮށްފައިވެއެވެ.
ބޮޑުވަޒީރު ގެ އަރިސްބޭފުޅަކަށްވީތީ ފިޔަވަޅު ނާޅާނެ ކަމަށް ބުނެ ފާޑިކިއުން އަމާޒުވުމުން އެކަމާ ވަކިކޮށް އެ މަގާމަށް އައްޔަންކޮށްފައިވަނީ ކުރިން ފޮރިން ސެކެޓްރީ ކަމުގެ މަގާމުގައި ހުންނެވި ޖޭމްސް ކްލެވަރލީއެވެ.
މީގެ އިތުރުން އެންމެ ބޮޑު ހައިރާންކަމެއް އނގިރޭސި ސިޔާސީ މައިދާނަށް ލިބުނީ ކުރީގެ ބޮޑުބަޒީރު ޑޭވިޑް ކެމެރަން އަލުން އަނބުރާ ކެބިނެޓާއި ގުޅުމުންނެވެ. އެމަނިކުފާނު އައްޔަންކޮށްފައިވަނީ މި ދުވަސްވަރު އެންމެ މުހިއްމު އެއް ވުޒާރާ ކަމަށްވާ ފޮރިން ސެކެޓްރީ ކަމުގެ މަގާމަށެވެ.
