”ހޭދަވާ ރޭދުވާ ނޭންގިހުއްޓާ އެބަދޭ، ވަޔާ…“ މިއީ އުއްމީދީ ފިލްމު މަރްޔަމް ގެ ތީމު ލަވަ ’އުއްމީދު‘ ފެށޭ ހިސާބެވެ. މަރްޔަމް ހަޔާތުގެ ވާހަކައިގެ ޖަޒުބާތު އިހުސާސްކޮށްދޭން ނަސްމާ އަބްދުލް މުހްސިން (ނައްކޮ) ގެ ފުރިހަމަ ޅެމާއި ހިތްގައިމު އަޑާއި އަދި މެލޮޑީން ގެނެސްދޭ ގޮތެވެ. މި ހުރިހާ ކަމަކީވެސް ނައްކޮގެ އަމިއްލަ މަސައްކަތެވެ.
އެއް ކާފު ޕްރޮޑަކްޝަނުން މީޑިއާނެޓް އޮރިޖިނަލްސް އަށް ގެނެސްދޭ މި ފިލްމަކީ މިހާތަނަށް ދިވެހި ރާއްޖޭގައި އާއްމުކޮށް ގެނެސްދޭ ފިލްމުތަކާ މުޅިން ތަފާތުކޮށް، އަންހެނެއްގެ ސިޔާސީ ހަޔާތެއް ވާހަކަ ކިޔާދޭ ފިލްމެކެވެ. މިހާތަނަށް މި ފިލްމުގެ ބައެއް އިސްތިހާރުތަކުންނާ ހަބަރުތަކުން ވެސް ފެންނަނީ ތަފާތު މަސައްކަތެއްގެ ގޮތުގައެވެ. މި އުއްމީދީ ފިލްމަށް ނައްކޮގެ އުއްމީދު އައީ ވެސް އެ ޕްރޮޑްކްޝަންގެ ވެރިން އުއްމީދީ އަޑަކަށް އިންތިޒާރުކުރަމުން ދަނިކޮށެވެ.
”މި ފިލްމަށް ބޭނުންވީ މުޅިން އާ އަޑެއް، ލަވައެއް، ދެން ފެނުނީ ޝަލަބީ އާއި އެކު ނައްކޮ ލަވައެއް ކިޔަނިކޮށް (ޓީވީއެމް ޕްރޮގްރާމެއްގައި) އެ ހިސާބުން ޝަލަބީ ކައިރި އަހައިގެން ޝަލަބީގެ އެހީތެރިކަމާ އެކު ނައްކޮއާ ދިމާވެ، ހީވެސް ނުކުރާ ރަނގަޅު މަސައްކަތެއް މި އޮތީ ކުރެވިފަ…“ މި ލަވައާއި އެކީ މަރްޔަމްއަށް، ނައްކޮ އައި ހިސާބު އެއް ކާފު ގެ އޮފިސަލަކު ކިޔައިދިނެވެ.
ނައްކޮ ބުނީ މިއީ ހަޔާތުގައި ވެސް ފިލްމެއްގެ މަސައްކަތެއްގައި ބައިވެރިވި ފުރަތަމަ ފަހަރު ކަމަށާއި، މި ތަޖުރިބާ ވަރަށްވެސް ހިތްހަމަ ޖެހޭ ކަމަށެވެ. މަރްޔަމް ގެ ޓީމުން ދިން ފުރުސަތާއި ޝަލަބީގެ ފަރާތުން ލިބުނު ހިތްވަރާއި އެއްބާރުލުން ވަރަށް ބޮޑަށް ފާހަގަކުރާ ކަމަށެވެ. އަދި ހާއްސަކޮށް މި ލަވައިގެ ރެކޯޑިން (މިކްސިން، މާސްޓަރިން) ހެދި އިބްރާހިމް ޝިހާމް ގެ މަސައްކަތަށް ވަރަށް ބޮޑަށް ތައުރީފުކޮށް ލަވައިގެ މި ފުރިހަމަކަމަކީ ކުޑަޝިހާމްގެ ހުނަރުވެރި މަސައްކަތެއް ކަމަށާއި އެ ފަރާތާއި އެކީ މަސައްކަތް ކުރެވުނީތީ ވަރަށް އުފާވާ ކަމަށެވެ.
ނައްކޮގެ ބައެއް ލަވަތައް މީގެ ކުރިންވެސް އާއްމުންނަށް ވަނީ އިވިފައެވެ. ހާއްސަކޮށް ޝަލަބީ ކިޔާފައިވާ ’އެސްފިޔަ‘ ހީލާ‘ ފަދަ ލަވަތައް ފާހަގަކުރެވެއެވެ.
ވިސާން (ކަނޑި) ޑައިރެކްޓަރ ކޮށްފައިވާ “ މަރްޔަމް“ އަކީ މީޑިއާ ނެޓް އޮރިޖިނަލްސް އިން ގެނެސްދޭ އަލަތު ފީޗާ ފިލްމެވެ. އޯކޭޒް އިންކް އިން ޕޯސްޓްޕްރޮޑަކްޝަންގެ މަސައްކަތްކުރާ މި ފިލްމު ފެނިގެންދާނީ ހަމައެކަނި މީޑިއާ ނެޓްގެ މަލްޓި ސްކްރީން އެޕްލިކޭޝަން މެދުވެރިކޮށެވެ.
ލީޑުން މަރްޔަމް މަޖުދާ އާއި އަޙްމަދު ސަޢީދު ފެނިގެންދާ ”މަރްޔަމް“ ގެ ސްކްރީންޕްލޭ ލިޔުނީ މަޝްހޫރު ސްކްރީން ރައިޓަރ އަޙްމަދު ޒަރީރު އެވެ.
ފިލްމުގައި ހަރަކާތްތެރިވާ މުހިންމު އިތުރު ތަރިންގެ ތެރޭގައި ޢަލީ އާޒިމް (ދޮން އައްޔަ)، ނިޝް، ޢަލީ ޝަޒްލީމް، މުޙައްމަދު ވަޙީދު (ވައްޑެ) ވެސް މުހިންމު ރޯލުތަކުން ފެނިގެންދާނެއެވެ. މީގެ އިތުރުން މީމު އަތޮޅު މުލަކުން ވެސް ފިލްމުގެ ސަޕޯޓިން ރޯލުތަކުން މީހުން ބައިވެރިކޮށްފައިވެއެވެ.
