ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ފަށާފައިވާ އުވާނަށް މި އަދަށް 1 މަސްދުވަސް ވީ އިރު ގިނަ އަދަދެއްގެ އިޒްރޭލު ރައްޔިތުން ގައުމު ދޫކޮށް ގޮސްފިއެވެ. އިޒްރޭލުގެ ވުޒާރާތަކާ ހަވާލާދީ އަލް ޖަޒީރާއިން ރިޕޯޓުކޮށްފައިވާ ގޮތުގައި މިހާތަނަށް 230،000 އަށް ވުރެ ގިނަ ބަޔަކު ވަނީ އިޒްރޭލު ދޫކޮށް އެހެން ގައުމުތަކަށް ހިޖުރަކޮށްފައެވެ. އިޒްރޭލުގެ އެންމެ ކާރުބާރު ބޮޑު ބައެއް އެއަރޕޯޓުތައްވެސް ފަޅުވެ، ފުރާ މީހުންނާއި އަންނަ މީހުންގެ ޑިމާންޑެއް ނެތުމުން ހުއްޓުމުކަށް އައިސްފައިވާ ފޮޓޯތަކާއި ވީޑިއޯތައްވެސް ދަނީ ސޯސަލް މީޑިއާގައި ދައުރުވަމުންނެވެ.
މީގެ ކުރިން އިޒްރޭލުގެ އުދުވާނީ ހަމަލާ ކޮންމެ ދުވަހަކު ކަހަލަ ގޮތަކަށް ފަލަސްތީނު ރައްޔިތުންނާ ކުރިމަތިލާން ޖެހުނަސް އެކަމުގެ ހިލަމެއް އިޒްރޭލު ސިޓީ ތަކާއި އަވަށް ތަކުގައި އުޅޭ މީހުންނަށް ނުވެއެވެ. މި ފަހަރުގެ ހަނގުރާމައިގައި ފަލަސްތީނުގެ މުޖާހިދުން ރައްދު ހަމަލާ އިޒްރޭލުގެ ތެރެއަށްެވެސް އަމާޒުވެ ބައެއް މީހުން މަރުވެ ގިނަ އަދަދެއްގެ ބަޔަކުވަނީ ޒަހަމުވެފައެވެ. އަނެއްކޮޅުން ހަމާސްއިން އިސްވެ ދިން ކުއްލި ހަމަލާއިން މުޅި އިޒްރޭލު ރައްޔިތުންނަށް ސިހުން ލިބިފައިވާއިރު، އިޒްރޭލު ސިފައިންގެ އަމަލުތަކުގެ ސަބަބުން އެ ގައުމުގެ ރައްޔިތުންގެ ފުރާނަ ނުރައްކަލުގެ ތެރޭގައިވާ ކަމަށް މިހާރު އެމީހުން ގަބޫލު ކުރެއެވެ.
ފަލަސްތީނު މުޖާހިދުންގެ އިތުރުން ލުބުނާނުގެ ހިޒްބުﷲ އާއި ޔަމަނުގެ ހޫތީންގެ ފަރާތުން އަންނަ ހަމަލާތަކުގެ ސަބަބުން އިޒްރޭލާއި ލުބުނާނުގެ ބޯޑަރު ސަރަހައްދުގައި އުޅޭ ގިނަ އަދަދެއްގެ އިޒްރޭލު ރައްޔިތުންވަނީ ރައްކާތެރިކަމުގެ ހިސާބުތަކަށް ބަދަލުކޮށްފައެވެ. މި އެންމެން ވެސް ބަދަލު ކުރީ ޓުއަރިސްޓު ހޮޓާ ތަކަކަށް ކަމަށް އިޒްރޭލުން މައުލޫމާތު ދެއެވެ. މި އެންމެންވެސް މި އަހަރު ނިމެންދެން ދިރިއުޅޭ ގޮތަށް ހަމަޖެހިފައިވަނީ ހޮޓާ ތަކުގައެވެ.
އިޒްރޭލު ސިފައިންގެ ލާއިންސާނީ އަމަލު ތަކާ ދެކޮޅަށް މުޅި ދުނިޔޭގެ ހުރިހާ ގައުމެއްގައި ނުރުހުން ފާޅުކޮށް މުޒާހަރާ ކުރަމުންދާތީވެ، އިޒްރޭލުގެ ރައްޔިތުން ދަތުރުފަތުރު ކުރުމުގައި ސަމާލުވުމަށްވެސް ވަނީ އެ ގައުމުގެ ކަމާބެހޭ އިދާރާތަކުން އަންގާފައެވެ. މީގެ ތެރޭގައި އެއްވެސް ގޮތަކަށް ދަތުރު ނުކުރުމަށް އިލްތިމާސްކޮށްފައިވާ ގައުމުތަކުގެ ތެރޭގައި ދިވެހިރާއްޖެވެސް ހިމެނެއެެވެ.
