ޗާގޯސް މައްސަލާގައި ސަރުކާރާ ދެކޮޅަށް ތެދުވި ގިނަ ސިޔާސީ ވެރިންގެ އެދުމަކީ އެމީހަކު ބޭނުންވާ ސިޔާސީ މަންފާއެއް ހާސިލުކުރުމެވެ. ކަމުގެ ހަގީގަތް އެއް ފަރާތެއްގައި ބާއްވާފައި ކޮންމެ މީހަކު ނިކުމެ މަސައްކަތް ކުރަމުން ދިޔައީ އެމީހަކީ ރައްޔިތުންނަށް އެންމެ ހެޔޮ އެދޭ މީހާ ކަމަށް ދައްކައިގެން އެ ކަމުން އަމިއްލަ ފައިދާތަކެއް ހާސިލުކުރުމެވެ. ޗާގޯސް މައްސަލައިގެ ތެރޭގައި ޕީޕީއެމް ނިކުތީ ޔާމީނު މިނިވަން ކުރެވޭތޯއެވެ. ރައީސް ނަޝީދު ނިކުތީ (ކަމުގެ ހަގީގަތް އެނގި ހުރެވެސް) ރައީސް އިބްރާހިމް މުހައްމަދު ސޯލިހަށް ޕްރެޝަރުތަކެއް ކުރިމަތިކުރުވުމަށެވެ. ޖޭޕީން ބޭނުންވީ ރައްޔިތުންނަށް ހަގީީގީ ހެވެއް އެދެނީ އެމީހުންކަން ދެއްކުމަށެވެ.
ޗާގޯސް ދެކޮޅު އެއްވުންތައް ލީޑު ކުރެއްވީ ކުރީގެ ބަންޑާރަ ނައިބު ޑރ.މުނައްވަރެވެ. ސިޔާސީ ގޮތުން އެއްވެސް ގޮތަކަށް ނުފެންނަތާ ޒަމާންތަކެއް ވުމަށް ފަހު މުނައްވަރަށް އިދިކޮޅު އާއްމު މެމްބަރުންގެ ސަމަލާކަމާއި އިދިކޮޅު ޕާޓީތަކުގެ ލީޑަރުންގެ ތާއިދު އެ ދަނޑިވަޅަށް ލިބުނެވެ. މި ފުރުސަތުގެ ބޭނުން ކޮށްގެން ނަޝީދު ވިސްނައިދެމުން ދިޔައީ އިންތިހާބުގައި ވާދަކުރުމަށެެވެ. އެ ދުވަސްވަރު މުނައްވަރު އެކަން އިއުލާންވެސް ކުރިއެވެ. އޭރުވެސް ސިޔާސީ ކަންކަން އިނގޭ ފަރާތްތަކުން ބުނަމުން ދިޔައީ މުނައްވަރަކީ ނަޝީދު ނެރޭ ކެންޑީޑޭޓެއް ކަމަށެވެ. ނަޝީދު އެމްޑީޕީގަ ހުރުމާއި ހަދަމުންދާ ޑިމޮކްރެޓްސް އޭރު ރިޔާސީ ރޭހަށް ވަނުމުގެ ވިސްނުން ގެންގުޅެފައިނުވާތިއެވެ. މުނައްވަރަކީ އައްޑޫގެ ބޮޑު އާއިލާއަކަށް ނިސްބަތްވާ ބޭފުޅަކަށްވެފައި އައްޑޫ އެމްޑީޕީން ލިބޭ ވޯޓު ބައިބައިކުރަން މުނައްވަރު ފަދަ ކެންޑީޑޭޓެއް ނެރެގެން ފަސޭހަވާނެތީއެވެ.
ޗާގޯސް މައްސަލަ ހިނދިގެން ދިޔައީ އެކަމާ އެއްވެ އުޅުނު ޕާޓީތަކުގެ އަމިއްލަ އެޖެންޑާތައް ނެރި އަސްލު މައްސަލަވެސް އޮބުމާއެކުގައެވެ. އަނެއްކޮޅުން ރިޔާސީ ރޭހަށް ނިކުންނަން ޕާޓީތައް ވަރުގަދަކޮށް ތަފާތު ސިޔާސީ ’ޑީލު‘ ތަކުގައި ޕާޓީތައް ބިޒީވީއެވެ. ނަޝީދުވެސް ޑިމޮކްރެޓްސް ޕާޓީ ހައްދަވާފައި އެ ޕާޓީވެސް ވަރުގަދަކޮށް އެންމެ ފަހުން ކެންޑީޑޭޓެއްވެސް ނެރުނީއެވެ. ޗާގޯސް މައްސަލައިގައި ވަގުތު އޮތް އެކަނި ފަރުދަކަށް ހުންނެވި މުނައްވަރު އެކަނިވެ، އެންމެ ފަހުން އުއްމީދުކުރަމުން އައި ރިޔާސީ އިންތިހާބަށް ވާދަކުރުމުގެ އުއްމީދުވެސް ގެއްލުނީއެވެ. މުނައްވަރު ނެރެން ނަޝީދަށް ކުރިމަތިވި ހާލަތުގެ ފަރުވާއަކަަށް ވީ ޕާޓީގެ ތެރެއިން ނަޝީދުގެ އަރިސް ބޭފުޅެއް ކަމަށްވާ އިލިޔާސް ލަބީބެވެ. އިލިޔާސް އަކީވެސް މުނައްވަރު ފަދައިން އައްޑޫއަށް ނިސްބަތްވާ ބޭފުޅެކެވެ.
ނަޝީދުގެ ސަބަބުން މުނައްވަރަށް ދެ ފަހަރުވެސް މި ވަނީ ސިޔާސީ ގޮތުން ލަނޑު ލިބިފައެވެ. ކުރިން އެމްޑީޕީގެ ރައީސް ކަމަށް ހުންނެވި އިރެވެ. މި ފަހަރު ސިޔާސީ ދާއިރާގައި ދުރުގަ ހުއްޓާ ރިޔާސީ ކެންޑީޑޭޓެއްގެ ހުވަފެން ދައްކައިގެންނެވެ. ރާއްޖޭގައި ބަދަލުވަމުންދާ ސިޔާސީ އޮއިވަރު ގެ ހާލަތު މުނައްވަރު ފަދަ ބޭފުޅުންނަށް ނުވިސްނެނީ ކަމަށްވެދާނެއެވެ. އެހެންވިޔަސް ނަޝީދު ދަސްނުވާހާ ތަޖުރިބާއާއި މައުލޫމާތު ނެތްކަމަށް ބެލެވޭކަށް ނެތެވެ.
