ރައީސް ޔާމީނާއި ރައީސް މައުމޫނާއި ދެމެދު އުފެދުނު ހިޔާލުތަފާތުވުމެއްގައި ޕީޕީއެމްގެ ކޮންޓްރޯލް ގެއްލުމުން މައުމޫނަށް އަލުން ޕާޓީއެއް ހަދަން މަޖުބޫރުވީ އޭރު ޕީޕީއެމް އިސް ބައެއް ބޭފުޅުން މައުމޫނު ފަހަތަށް އަރަން ބޭނުން ނުވުމުންނެވެ. މައުމޫނު ފަހަތަށް އެރި ބައެއް މެމްބަރުންވެސް އަނބުރާ އަލުން ޕީޕީއެމަށް އައީ ބައެއް ފިއްތުންތައް ހުރުމާއި އޭރުގެ ޕީޕީއެމް އިސްކޮށް ތިބި ފަރާތްތަށް މައުމޫނު ފަަހަތަށް ނޭރުމެވެ. ފާޅުގައި މައުމޫނަށް ފަހަތަށް ނާރާނެ ކަމަށް ބުނެ ރައްދު ދޭން ފެށީ އަބްދުއްރަހީމް އަބްދުﷲ އެވެ. ކުރީގެ ފުނަދޫ ދާއިރާގެ މެމްބަރެވެ. އެ ހިސާބުން އެއީ ޔާމީނު އެންމެ އިތުބާރު ކުރެއްވި ޕީޕީއެމް މެމްބަރެވެ. ކޯޓު މަރުހަލާއިން ޕީޕިއެމް ހޯދުމަށް މައުމޫނު ފެށި މަސައްކަތުގައި ޕާޓީ ގެއްލިދާނެ ކަމަށްޓަކައި ބެކަޕް ޕާޓީއެއް (ޕީއެންސީ) ހަދައި އެ ޕާޓީގެ ވެރިއަކަށްވެސް ހަމަޖެއްސީ އަބްދުއްރަހީމެވެ. ޔާމީނުގެ ވެރިކަން ނިމި އެންމެ ފަހުން ޖަލަށް ދާނެ ޖެހުނު ކޮންމެ ފަހަރެއްގައި ވެސް ދެ ޕާޓީ ހިންގަން ހަވާލުކުރަނީ އަބްދުއްރީމަށެވެ. ޕީޕީއެމް ޕީއެންސީގައި އެއަށްވުރެ ގާބިލް މީހުން ތިއްބަސް އަދި ރައްޔިތުން ތާއިދު ބޮޑު މީހުން ތިއްބަސް ޔާމީނަށް ވަފާތެރިކަމުގެ މިންގަނޑުން ކިރާލީމާ އެންމެ ގިނައިން މާކްސް ލިބެނީ އަބްދުއްރަހީމަށެވެ.
މިއަދަކީ ރިޔާސީ އިންތިހާބަށް ކުރިމަތި ލެވޭނެ އެންމެ ފަހު ދުވަހެވެ. ޔާމީނު ހުންނެވީ އންތިހާބަށް ކުރިމަތިލެވޭނެ ހުރިހާ ދޮރެއް ބަންދުވެ، ޖަލުގައެވެ. މުއިއްޒުގެ އެއްވެސް ކަމަކަށް ޔާމީނު އިތުބާރެއް އަދި ތާއީދެއްވެސް ނުކުރައްވައެވެ. އޭގެ ހެއްކަކީ ޔާމީނު ވާދަ ނުކުރެވޭ ހާލާތެއްގައި ޕްލޭން ބީ އެއް ހަދާ އޭގައި މުއިއްޒު ނަން ނެތުމެވެ. ޕީއެންސީ ޓީކެޓް ކާމިޔާބު ކުރުމުންވެސް މުއިއްޒަކީ ޕްލޭންސީ ކަމަށް ހަދާ ޕީޕީއެމުން ކެންޑިޑޭޓެއް ނެރެން މަސައްކަތް ކުރުމެވެ. އެންމެ ފަހުން އެކަން ކުރާނެ ވަގުތެއް ނުލިބުމުން ނިންމީ އިންތިހާބު ބޮއިކޮޓް ކުރުމަށް ދެ ޕާޓީން ނިންމުމަށެވެ. މި ގޮތަށް ހުަށައެޅުމުން ބޮޑު ހަމަނުޖެހުމަކަށް ބަދަލުވެ، ޔާމީނާ ދެކޮޅަށް ޕީޕީއެމުގެ ބައެއް މެމްބަރުން ތެދުވެ، އެކަމާ ދެކޮޅު ހެދިއެވެ. ނަމަވެސް އެކަން ގަބޫލުނުކޮށް ރޭގެ ވަގުތެއްގައ ޕީޕީއެމް ޕީއެންސީގެ ތައްގަނޑުވެސް ފޮރުވި ކަމުގެ އަޑުވެސް ފެތުރުނެވެ. އޭރުވެސް މުއިއްޒު ސަޕޯޓަރުން ބުނަމުންދަނީ މުއިއްޒު ކެންޑިޑެންސީ ފޯމު ހުށައަޅާނެ ކަމަށެވެ. ޔާމީނަށް ތާއީދު ކުރާ ކިތަންމެ ގިނަ ބަޔަކު ހުރަސް އެޅިޔަސް އެކަން ކުރާނެ ކަމަށެވެ. އެއީ އުނދަގޫ ކަމަކަށް ވިޔަސް އަދި ދެ ޕާޓީގެ ލީޑަރުން ހުރަސް އެޅިޔަސް ފަރުވާލެއް ނެތް ކަމަށް ބަލާފައެވެ.
މިއަދު މަންޒަރަކީ އިއްޔެއާއި ރޭގެ މަންޒަރެއް ނޫނެވެ. މިއަދު މުއިއްޒު ފޯމު ހުށައަޅަން ދަރުބާރުގޭގައި (އިލެކްޝަން މަރުކަޒުގައި) އިންނެވީ ޕީޕީއެމް ޕީއެންސީ ހަވާލުވެ ހުންނެވި އަބްދުއްރަހީމާ އެކުގައެވެ. ހެނދުނު ހެނދުނާ ދަރުބާރުގެއަށް ދިއުމުގެ ހުރިހާ އިންތިޒާމެއް ހަމަޖެއްސީވެސް ޕީއެންސީގެ ރައީސް އަބްދުއްރަހީމެވެ. މި އަދު މި ފެންނަނީ މި ދެ ދުވަހު ހިނގި ކަންތައްތަކުގެ ނަތީޖާއެއް ނޫނެވެ. މިއީ މާކުރިން ރޭވިގެން ހިނގަމުންއައި އެތެރޭގެ ބާރުވެރިކަން ހޯދުމުގެ ނަތީޖާ ބޭރަށް ފާޅުވި ދުހެވެ. ކުރިންވެސް ތުހުމަތު ކުރެވުނު ގޮތަށް ދެ ޕާޓީގެ ޖޮއިންޓު ޕާލިމެންޓާއި ޖޮއިންޓު ސެނެޓުގެ ބޮޑުބައި ވަނީ މުއިއްޒު ނަންގަވާފައެވެ. އޭރު ނޭންގެނީ ލީޑަރޝިޕުން އަންނަން ތިބީ ކޮންބައެއް ކަމެވެ.
ސިޔާސީ ޕާޓީތަކުގެ އިސް ސަފު ތަރުތީބު ވަނި އެއިރެއްގައި ބާރުގަ ހުންނަ ފަރާތެއްގެ ތަރުތީބުކުރާ ގޮތަކަށް ނޫނެވެ. އިސް ސަފުގައި ތިބޭ މީހުން އަބަދުވެސް ބަލަބަލާ ތިބެނީ ބާރުގަދައީ ވެރިއަކަށް ވާން ހުރީ ކާކުތޯއެވެ. ބާރުގަދަ ފެކްޝަނަކީ ކޮންބައެއްތޯއެވެ. އެކަން މިހާރު އެ ފެންނަނީ ޕީޕީއެމް ޕިއެންސީ ތެރެއިންނެވެ. މިއަދު އެމީހުންގެ ތެރެއިން ބުނާ ކަހަލައެވެ. އަަހަރުމެންނަކީ މާ ކުރިން ފެށިގެން މުއިއްޒުއަށް ތާއިދު ކުރާ ބައެކެވެ. މި އަޒުމެއް ނުގުޑާނެއެވެ. ތެދެކެވެ. މުއިއްޒުގެ އާރާއި ބާރު ހުރިހާ ދުވަހަކަށް އެމީހުންގެ ވައުދަކީ އެއީއެވެ. މާދަމާ ހާލަތު ބަދަލުވާނެ ގޮތެއް ނޭންގެއެވެ.
