”ބަންގުލަދޭޝް ގެ ބޮޑު ވަޒީރު ޝެއިހު ހަސީނާ އިސްތިއުފާ ދެއްވައިފި“ ކަމަށް އިއުލާން ކުރުމާއި އެކު މުޅި ބަނގުލަދޭޝް ކަހަލަ ގޮތަކަށް އުފަލުން އުތުރި އަރައިގަތީ ވޭތުވެދިޔަ 2 ހަފްތާ ގައި ސަރުކާރާއި ދެކޮޅަށް މުޒާހަރާކުރަމުންދިޔަ ކިޔަވާ ކުދިންނަށް އަނިޔާކޮށް އެތައް ބަޔަކު މަރުވެފައިވާތީ އެކަމުގެ ޖަޒުބާތުގައެވެ. 15 އަހަރުގެ ދިގުވެރިކަމެއްގައި ބޮޑުވަޒީރުގެ މަގާމުގައި އާރާއި ބާރުގައި ހުންނެވި އިރު މަގުތަކަށް ސިފައިންނާއި ފުލުހުންނެރި މުޒާހަރާކުރަމުން އައި ރައްޔިތުން އައީ މައިތިރި ކުރަމުންނެވެ. ނަމަވެސް ގިނަ އަދަދެއްގެ ރައްޔިތުން ހަސީނާ ދިރިއުޅުއްވާ ގެކޮޅަށް އަރައިގަންނަން ތައްޔާރުވުމުން ގައުމުން ފިއްލަވައި، ވަޑައިގަތީ އަވައްޓެރި އިންޑިއާގެ ހިމާޔަތަށެވެ.
ބަންގުލަދޭސްގެ ވަގުތި ސަރުކާރެއް އެކުލަވާލުމުގެ މަސައްކަތް ކުރަމުންދަނީ ސިފައިންގެ ބެލުމުގެ ދަށުންނެވެ. މި ކަމުގައި އިސްކޮށް ހުންނެވި ސިފައިންގެ ވެރިޔާ މިއަދު ގައުމާ މުހާތަބުކޮށް ބުނެފައިވަނީ ހުރިހާ ރައްޔިތުން އެނބުރި ގެއަށް ދިއުމަށާއި އެމީހުން އެދޭ ފަދަ ވެރިންގެ ވަގުތީ ސަރުކާރެއް އެކުލަވާލާނެ ކަމަށެވެ. ހަސީނާ ކުރެއްވި ކަންތައްތަކަށް ހާއްސަކޮށް މުޒާހަރާ ތަކުގައި މަރުވި 300 އަށް ވުރެ ގިނަ މީހުންގެ މަރަށް އިންސާފު ހޯއްދަވައިދެއްވާނެ ކަމަށެވެ.
ހުރިހާ ކަމެއް ގޯހުން ގޯހަށް ދިޔައީ އިއްޔެ
މުޒާހަރާގެ ބައިވެރިންނަށް އެންމެ ބޮޑު އަނިޔާއެއް ތަހައްމަލު ކުރަން ޖެހުނީ އިއްޔެއެވެ. އިއްޔެއަކީ މުޒާހަރާގައި އެންމެ ގިނަ މީހުންވެސް މަރުވި ދުވަހެވެ. 90 އަށްވުރެ ގިނަ އާއްމު ރައްޔިތުން މަރުވީ ކާފިއު އިއުލާންކޮށް މަގުތަކަށް ނިކުންނަ މީހުންނަށް ހަރުކަށި އަދަބު ދޭނެ ކަމަށް ސަރުކާރުން އިއުލާންކުރުމަށް ފަހުގައެވެ. އިއްޔެގެ ބޮޑު އެއްވުމުގައި ސިފައިންވެސް ވަނީ އާއްމުންނާ ދެކޮޅަށް ނެރެފައެވެ. ދެބައި މީހުންގެ ކުރިމަތި ލުމުގައި ފުލުހުންގެ ތެރެއިން 13 ވަރަކަށް އޮފިސަރުން މަރުވެފައިވެއެވެ. އާދިއްތަ ދުވަހު ހިނގި ބޮޑު ލޭއޮހުރުވުންތަކަށް ފަހު ކުރިއަށްވުރެ ގިނަ އަދަދެއްގެ މީހުން ވެރިރަށް ޑާކާގެ ބޮޑުވަޒީރު ގެކޮޅު ހިމެނޭ ސަރަހައްދަށް އެއްވުމަށް އާއްމުން އައީ ގޮވާލަމުންނެވެ. ރުޅިއައިސް ކެކިގެން ތިބި ރައްޔިތުން މިއަދު ވަނީ ހަސީނާގެ ގަނޑުވަރާއި އޮފީސް ހިމެނޭ ސަރަހައްދު އެމީހުންގެ ބާރުގެ ދަށަށް ގެނެސްފައެވެ. މިއަދުގެ އެއްވުން ތަކުގައި ބަނގުލަދޭސްގެ ދިފާއި ބާރުތަކުންވެސް ރައްޔިތުން ހުއްޓުވާކަށް މާބޮޑު މަސައްކަތެއް ނުކުރާކަން ވަނީ ފާހަގަ ކުރެވިފައެވެ.
ހަސީނާއަށް ފަހު ބަނގުލަދޭސްއަށް ވާނީ ކިހިނެތް ހެއްޔެވެ؟
މިއީ މިހާރު އެންމެންވެސް އުފައްދާ ސުވާލެވެ. ހަސީނާ ފަދަ ބާރުގަދަ ވެރިއެއް ނޫނީ ބަނގުލަދޭސް ފަދަ ގައުމެއްގައި ވެރިކަން ނުކުރެވޭނެ ކަމަށް ދެކޭ ފަރާތްތަކާއި ހަސީނާމެން ފަދަ މުޅި އުމުރަށް ވެރިކަމުގެ ލައްޒަތުގައި އުޅޭ ސިޔާސީވެރިންނާއި ނުލައި އުފާވެރި ބަނގުލަދޭސްއެއް ފެންނާނެ ކަމަށް ބުނާ މީހުންގެ ހުރީ މަސްހުނި ހިޔާލު ތަކެވެ. ކޯޅުން ބޮޑު ސިޔާސީ ޕާޓީ ތަކުގެ ވެރިންނާއި، އަސްކަރިވެރިޔާ މި ވަގުތު މަޝްވަރާ ކުރަމުންދާއިރު ވަގުތީ ހައްލެއް ލިބުނަސް ދާއިމީ ހަމަޖެހުމެއް ލިބުމަކީ ފަސޭހަ ކަމެއް ނޫން ކަމަށް މުހައްލިލުން ދެކެއެވެ.
ހަސީނާގެ ދަރިކަލުން މިއަދު ބުނެފައިވަނީ އެމީހުން އަލުން އަނބުރާ ސިޔާސީ ދާއިރާއަށް އައުމުގެ އެއްވެސް ވިސްނުމެއް ނެތް ކަމަށެވެ.
