މޫސުން ގޯސްވުމާއި ގުޅިގެން ދިރާސީ އައު އަހަރުގެ ފުރަތަމަ ތިންދުވަހުގެ ދަންފަޅިކުރުކުރުމަށް އެޑިއުކޭޝަން މިނިސްޓްރީން ނިންމުމާއި ގުޅިގެން ގިނަ ބައެއްގެ ފާޑު ކިޔުން އެމިނިސްޓްރީއަށް އަމާޒުވެއްޖެއެވެ.
އިއްޔެ މިނިސްޓްރީއިން ސްކޫލްތަކަށް ފޮނުވި ސާކިއުލާގައި ބުނެފައިވަނީ ރާއްޖޭގެ އެކި ހިސާބުތަކަށް ގަދަވަޔާއިއެކު ބޯކޮށް ވާރޭވެހި، ކަނޑު ގަދަވުމުގެ ސަބަބުން ދަތުރުކުރުމަށް ބުރުއަރާފައިވާތީ މޫސުމީ ހާލަތަށް ބަލައި، ފުރަތަމަ ތިން ދުވަހުގެ ކިޔެވުން 3 ގަޑި އިރަށް ކުޑަކުރަން ނިންމީ ކަމުގައެވެ.
މިކަމާއި ގުޅިގެން ބެލެނިވެރިންގެ ޝަކުވާތައް ވަނީ މީސްމީޑިއާއަށް ހާމަކޮށްފައެވެ. ގިނަ ބެލެނިވެރިން ޤަބޫލުކުރާގޮތުގައި މިއީ މާ އުނދަގޫ ގޮތެކެވެ. ސަބަބަކީ 3 ގަޑި އިރަކީ ނުހަނު ކުޑަ ވަގުތު ކޮޅަކަށްވެފައި ވިއްސާރަ ދުވަސްވަރެއްގައި ހިނގާ ބިގާވެ އުޅުމާއި އެއްޗެހި ދުއްވުމުގެ ދަތިކަންވެސް މަގުތަކުގައި ބޮޑުކަމުންނެވެ.
މިކަމާއި ގުޅިގެން ސޯޝަލް މީޑިއާގައި މީހަކު ކުރި ޕޯސްޓެއްގައި ބުނެފައިވަނީ ތިންދުވަހަށް ސުކޫލްތަކުގެ ކިޔެވުން ކުރުކޮށްލުމުން ލިބޭ ފަސޭހައެއް ނެތްކަމަށްށެވެ. ”މިއުޅެނީ ކުދިން ސްކޫލުގައި ތިބެން ޖެހިގެން އުނދަގޫ ވާތީއެއްނޫން، ދަތުރުކޮށްފަ ކުދިން ގޮވައިގެން ދާންޖެހޭ ހިސާބަށް ނުދެވިގެން ކަންބޮޑުވަނީ، މިހާރު މިއޮއްގޮތުން އެބަޖެހޭ ކޮންމެހެންވެސް ދާން“ ބެލެނިވެރިއަކު ބުނެފައިވެއެވެ.
ބައެއް ބެލެނިވެރިން ހާމަކުރާ ގޮތުގައި އޮފީސްތަކުގައި މަސައްކަތް ކުރާ ބެލެނިވެރިންނަށް މިކަންވާނީ ބޮޑު އުދަގުލަކަށްށެވެ. އަނެއްކޮޅުން ސްކޫލަށް ކުދިން ލާފައި އަނެއްކާ ގެއަށް ނުވަތަ އޮފީހަށްގޮސް ކުޑައިރުކޮޅެއް ފަހުން ބަލާ ދިއުމަކީވެސް ތަކުލީފެކެވެ. ކުރިން ކިޔަވަދޭ ގަޑިތަކަށްވުރެ މި ގޮތަށް 3 ގަޑިއިރު ކިޔަވައިދިނުން މާ ބޮޑަށް ގޯސް ކަމަށް ގިނަ ބެލެނިވެރިން ގަބޫލުކުރެއެވެ.
ރާއްޖެއަށް ކުރަމުން މިދާ ވިއްސާރައިގައި އެންމެ ބޮޑު މައްސަލައަކަށް ދިމާވެފައިވާ ކަމަކީ ކަނޑުދަތުރު ފަތުރު ކުރުމުގެ ދަތިކަމެވެ. މޫސުން ގޯސްވުމުގެ ސަބަބުން ކަނޑު ދަތުރު ފަތުރު ކުރުންވެސް ބައެއް ސަރަހައްދުތަކުގައި ވަނީ ވަގުތީ ގޮތުން ހުއްޓާލާފައެވެ.
އެގޮތުން ހދ އަތޮޅުގެ ބައެއް ސަރަހައްދުތަކުގައި އެމްޓީސީސީއިން ހިންގަމުންއަންނަ އާރް ޓީއެލް ގެ ފޭރީގެ ހިދުމަތްވެސް ވަނީ ވަގުތީ ގޮތުން މެދު ކަނޑާލާފައެވެ.ކަން މިހެން އޮތް އިރު ސްކޫލް ކުދިންގެ ކިޔެވުން ހަފްތާއަކަށް ބަންދުކޮށްލުމަކުން ވާނެ ގެއްލުމެއް ނެތްކަމަށް ބެލެނިވެރިންދަނީ ބުނަމުންނެވެ.
ބޮޑު ބަންދަށް ރާއްޖެއިން ބޭރަށް ދިޔަ ގިނަ މީހުން މާލެއައިސް މޫސުން ގޯސްވެގެން ރަށަށް ނުދެވިފައިވާއިރު މާލެއައި ބައެއް މީހުން އަދިވެސް ތިބީ ދަތުރުފަތުރު ކުރުމުގެ ހުރަސްތަކާއެކު މާލޭގައި ތާށިވެފައެވެ. ސްކޫލަށް ބޭނުންވާ ސާމާނު ގަތުމާއި ޑޮކްޓަރަށް ދެއްކުން ފަދަ ކަންކަމަށް ގިނަ މީހުންއައީ އާއިލާތަކާއި ކުދިންވެސް ގޮވައިގެންނެވެ. ކުރިއަށް އޮތް ހަފްތާގަައިވެސް މޫސުން ރަނގަޅު ނުވާނެތީ ގިނަބަޔަކު ތީބީ މާލޭގައި ތާށިވެ، ހަފްތާއެއް ފަހުން ރަށަށް ދިއުމަށް ނިންމައިގެންެނެވެ.
މިދުވަސްވަރަކީ މޫސުން ގޯސް ދުވަސް ވަރަކަށްވެފައި، ދަތުރު ފަތުރު ކުރުމުގައި ސަމާލުވުމަށް މޫސުމާއި ބެހޭ ޤައުމީ އިދާރާއިން ގެންދަނީ ކެނޑިނޭޅި ރައްޔިތުންނަށް އިލްތިމާސް ކުރަމުންނެވެ.
