މިހާރަކަށް އައިސް ބައެއް މީހުން ހާއްސަކޮށް ކުޑަކުދިންގެ ހެދުންތަކާއި ބޮލުގައި އަޅާ ތޮފި ފަދަ ތަކެތީގައި ﷲ ގެ އިސްމުފުޅު ބޭނުންކޮށްގެން ބައެއް އިބާރާތްތައް ލިޔެފައި ހުރެއެވެ. މި ކަމާ ބެހޭ ގޮތުން ދީނީ އިލްމުވެރިޔާ ޝެއިހް މުހައްމަދު ޝާފިއު ވިދާޅުވަނީ އެއީ ހުއްދަ ކަމެއް ނޫން ކަމަށެވެ.
މި ކަމުގެ ތަފްސީލު ދެއްވަމުން ޝެއިހް މުހައްމަދު ޝާފިއު ބަޔާންކޮށްދެއްވާފައިވަނީ ”މިފަދަ ޓީޝާރޓު ލުމަކީ ހުއްދަކަމެއް ނޫނެވެ. އަދި އެފަދަ ޓީޝާރޓެއް ލާމީހާ އެފަދަ ކަމެއް ކުރާނަމަ އެކަން ހުއްޓުވަންޖެހޭނެއެވެ. އެކަމަށް އިންކާރު ކުރަން ޖެހޭނެއެވެ. އެއީ ﷲ ގެ ނަންފުޅަށް އިހާނަތްތެރިވުން އެކަމުގައި ހިމެނޭތީއެވެ. އެގޮތުން މިފަދަ ޓީޝާރޓްތަކުގައި ﷲ ގެ އިސްމުޅު ޕްރިންޓުކުރުމުގެ ސަބަބުން، އެ ޓީޝާރޓްތައް، ﷲ ގެ ނަންފުޅު ލިޔެފައިވާތަކެތި ބެހެއްޓުން ލާއިޤުވެގެން ނުވާ ތަންތަނުގައި މިސާލަކަށް ފާޚާނާފަދަ ތަންތަނުގައި ބެހެއްޓުމާއި، (ޚާއްޞަކޮށް މިފަދަ ތަކެތި ދޮންނައިރު) އެހެނިގެން ގޮތްގޮތުންވެސް އިހާނާތްތެރިވުން ހިމެނޭތީއެވެ. ތިބާއާ އެހެނިހެން މުސްލިމުން މިފަދަ ޓީޝާރޓްތައް ގަތުމުން ދުރުހެލިވެއްޖެނަމަ އެކަންކުރާބަޔަކަށް އެބައިމީހުންގެ މާރކެޓް ހަނިވެގެންދާނެއެވެ. އޭރުން އެބައިމީހުންގެ މަޤްޞަދަކީ ހަމައެކަނި ވިޔަފާރިކުރުން ކަމުގައިވާނަމަ، އެފަދަ ޓީޝާރޓްތައް ޕްރިންޓުކުރުން ހުއްޓާލަން އެމީހުންނަށް މަޖުބޫރުވާނެއެވެ.”
