ބިސްމި އަކީ އަލްހަމްދު ސޫރަތުގެ ފުރަތަމަ އާޔަތް ކަމަށާއި އަލްހަމްދު ކިޔާއިރު ބިސްމި އަޑުހަރުކޮށް ކިޔަވަން ޖެހޭނެ ކަމަށް ރައީސް މައުމޫން ވިދާޅުވެއްޖެއެވެ.
މިސްރުގެ ޖާމިއުލް އަޒްހަރުން ކިޔަވާ ވިދާޅުވި އަދި އެ ޔުނިވަރސިޓީން ރަން ވަނަ ތަކެއް ހާސިލްކޮށްފައިވާ ކުރީގެ ރައީސް މައުމޫން އަބްދުލްގައްޔޫމު ވިދާޅުވީ ބިސްމި އަކީ އަލްހަމުދު ސޫރަތުގެ ފުރަތަމަ އާޔަތެވެ. ހުރިހާ މުސްހަފެއްގައިވެސް އޮންނާނީ އެހެން ކަމަށާއި އަލްހަމްދު އަޑުހަރުކޮށް ކިޔަވާ ނަމަ ބިސްމިވެސް އަޑުހަރުކޮށް ކިޔަވަން ޖެހޭނެއެވެ. ރަނގަޅުގޮތަކީވެސް އެއީ ކަމަށެވެ. މިއަދު ސޯސަލް މީޑިއާގައި ހިއްސާކޮށްފައިވާ ކުރު މެސެޖުގައި އިލްތިމާސް ކުރައްވާފައިވަނީ އެކަން ރަނގަޅު ކުރުމަށެވެ.
މީގެ ކުރިން ރާއްޖޭގެ މިސްކިތްތަކުގައި އަލްހަމްދު ކިޔެވުމުގައި ކުރިން ބިސްމިވެސް ބާރަށް ކިޔަވަމުން އައެވެ. ނަމަވެސް ފަހުން ދީނީ އިލްމު ހާސިލުކުރެއްވި ބައެއް އިލްމުވެރިންނާއި އެނޫންވެސް ބައެއް ފަރާތްތަކުން ’ސުންނަތް ގޮތަކީ‘ ބިސްމި ބާރަށް ނުކިޔުން ކަމަށް ބުނެ އެކަން އެގޮތަށް ނުކުރާތާ ދުވަސްތަކެއްވަނީވެފައެވެ.
