ޔޫރޮޕާލީގު: ތަފާތު ބޮޑުކޮށް މެންޗެސްޓަރ ޔުނައިޓެޑް މޮޅުވެ، އާސެނަލް އެއްވަރު

                ޔޫރޮޕާ ލީގުގެ ދެވަނަ ބުރުގެ ފުރަތަމަ ލެގުގައި ރޭ ރިއާލް ސޮސިއޭޑް ކޮޅަށް ހަތަރު ލަނޑު ޖަހައިގެން އަނެއް ބުރުގެ ފުރުސަތު ބޮޑުކުރި އިރު އާސެނަލްއިން ރަށުން ބޭރުގައި ބެންފީކާ އާއި އެކު 1-1 އިން އެއްވަރު ވެއްޖެއެވެ.

               ރޭގެ މެޗަކީ ރިއަލް ސޮއިއެޑާޑް ގެ ހޯމު މެޗުކަމަށް ވިޔަސް ކޮވިޑް19 ގެ ހާލަތުގެ ސަބަބުން ސްޕެއިން ސަރުކާރުން އަޅާފައިވާ ފިޔަވަޅުތަކުގެ ސަބަބުން މި ވަގަތު އިންގުލެންޑުން ސްޕެއިނަށް ދަތުރު ކުރެވޭނެ ފުރުސަތު ނެތުމުން ރޭގެ މެޗު ކުޅުނީ ރޭގެ މެޗު ކުޅުނީ ޔުވެންޓަސްގެ އެލއަންޒް އެރީނާގައެވެ.

                ޔުނައިޓެޑް ގެ ފަރާތުން ރަނގަޅު ކުޅުމެއް ފެނުނު މެޗުގައި ލަނޑުތައް ޖެހީ ބުރޫނޯ ފެންޑާސް (2 ލަނޑު)، މާކަސް ރަޝްފޯޑު އަދި ޑެނިއަލް ޖޭމްސް އެވެ. މި މެޗުގެ ފަހު ދިހަ މިނިޓްގައި، ދާދި ފަހުން މެންޗެސްޓަރ ޔުނައިޓެޑާ ގުޅުނު ހުނަރުވެރި ޒުވާން ފޯވާޑް ޑިއާލޯވެސް ކުޅެން ފުރުސަތު ދީފައިވެއެވެ. މާކޮސް ރަޝްފޯޑު އަތުން ގިނަ ފުރުސަތުތަކެއް ބޭކާރުވި މި މެޗުން މޮޅުވުމުން ދެވަނަ ލެގުގައި ޔުނައިޓެޑްގެ ދަނޑުގައި 0-0 ނަތީޖާއިން އެއްވަރުކޮށްލައިގެންވެސް އަނެއް ބުރަށް ދެވޭނެއެވެ.

               އާސެނަލާ ދެކޮޅަށް ބެންފީކާގެ މެޗުކުޅުނީ އިޓަލީގެ ވެރިރަށް ރޯމްގައެވެ. އެއީ ޕޯޗުގީޒް ސަރުކާރުން ކޮވިޑް19 އާއި ދެކޮޅަށް އަޅާފައިވާ ފިޔަވަޅުތަކުގެ ސަބަބުން އިނގިރޭސިވިލާތުން އެއްވެސް ބަޔަކަށް ޕޯޗުގީޒަށް އެތެރެ ނުވެވޭނެ ގޮތަށް އޮތުމުންނެވެ. މިމެޗުގައި ބެންފީކާއަށް ލީޑު ނަގައިދިނީ ޕެނަލްޓީއަކުން އަފޮންސޯ ފެނާންޑެސް އެވެ. އޭގެ ދެ މިނިޓް ފަހުން ބުކާޔޯ ސަކާ ވަނީ އާސެނަލްއަށް އެއްވަރުކޮށްދީފައެވެ. މިމެޗުގައި އާސެނަލް ގެ ފޯވަޑް އައުބެމަންޔަންގ އަށް ގޯލު ކުރިމަތިން ހުހަށް ލިބުނު ފުރުސަތެއް ވަނީ ބޭކާރު ކޮށްލާފައެވެ.

             ޔޫރޮޕާ ލީގުގެ ދެ ވަނަ ބުރުގެ ފުރަތަމަ ލެގުގައި ރޭ ޓޮޓެންހަމް ހޮޓްސްޕާސް ވަނީ ރަށުންބޭރުގައި އޮސްޓްރިއާގެ ވޯލްފްސްބާގާ އަތުން 4-1 އިން މޮޅުވެފަ އެވެ. ސްލާވިއާ ޕްރާގް ދަނޑުގައި ލެސްޓާ ސިޓީ ކުޅުނު މެޗު ނިމުނީ ލަނޑެއް ނުޖެހި އެއްވަރުވެގެންނެވެ.

އޭސީ މިލާނުން ސާބިއާގެ ރެޑް ސްޓާ ބެލްގްރޭޑް ދަނޑުގައި ކުޅުނު މެޗު ނިމުނީ 2-2 އިން އެއްވަރުވެގެންނެވެ. ސްޕެއިނުގެ ގްރަނާޑާ ވަނީ އަމިއްލަ ދަނޑުގައި އިޓަލީގެ ނަޕޯލީ 2-0 އިން ބަލިކޮށްފަ އެވެ. ސްޕޯޓިން ބްރާގާ ދަނޑުގައި ކުޅުނު މެޗުން ރޯމާ ވަނީ 2-0 އިން މޮޅުވެފަ އެވެ. އަދި އޮސްޓްރިއާގެ ރެޑްބުލް ސަލްޒްބާގް ދަނޑުގައި ކުޅުނު މެޗުން ވިޔަރެއާލް ކުރިހޯދީ 2-0 އިންނެވެ.