މާޒިޔާ އިސްވެ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ މެމްބަރު 10 ކްލަބު ސޮއިކޮށް، އެކްސްޓްރާ އޯޑިނަރީ ކޮންގްރެސްއެއް ބާއްވަން ހުށަހަޅައިފިއެވެ.
ދިވެހި ފުޓުބޯޅައިގައި މި ވަގުތު އެންމެ ކާމިޔާބު އެއް ކުލަބު ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަނުގެ ފަރާތުން މިއަދު އެކްއެފްއޭއެމްގެ އެކްސްޓްރާ އޯޑިނަރީ ކޮންގްރެސްއަކަށް ގޮވާލީ އިދާރީ ގޮތުން ހިންގުމުގައި ހުންނަން އަސާސީ ގަވާއިދު ލާޒިމް ކުރާ ކޮމިޓީތައް ނެތުމާއި އުސޫލާ ހިލާފަށް ބައެއް ކޮމިޓީތައް އެކުލަވާލެވިފައިވާތީ އާއި އިންތިހާބީ ކޮމިޓީގެ މަގާމުތަކުން ބައެއް މީހުން އިސްތިއުފާދީފައިވާތީއެވެ.
މާޒިޔާއިން ހުށަހެޅި ހުށަހެޅުމުގައި އެކްސްޓްރާ އޯޑިނަރީ ކޮންގްރެސްގެ އެޖެންޑާއަކަށް ކަނޑައަޅާފައި ވަނީ ޑިސިޕްލިނަރީ ކޮމިޓީ އާއި އެތިކްސް ކޮމިޓީ އަދި އެޕީލް ކޮމިޓީ ސައްހަކޮށް ފާސްކުރުމެވެ.
ފުރަތަމަ ޑިވިޝަނުގެ ކްލަބުތަކުގެ ތެރެއިން މާޒިޔާގެ އިތުރުން ދެން ކޮންގްރެސްއަށް ގޮވާލައި، ސޮއިކޮށްފައިވަނީ ވެލެންސިއާ އާއި ޓީސީ ސްޕޯޓްސް ކްލަބެވެ. ދެވަނަ ޑިވިޝަނުގެ ކުޑަ ހެންވޭރު ޔުނައިޓެޑާއި އެލްޓީ ސްޕޯޓްސް ކްލަބު، ބީޖީ ސްޕޯޓްސް ކްލަބު، ޓެންޓް އެފްސީ، މަހިބަދޫ ސްޕޯޓްސް ކްލަބު، ދަ ގްރާންޑޭގެ އިތުރުން ސީބީއެސްއެވެ.
އެފްއޭއެމްގެ އަސާސީ ގަވާއިދުގައިވާ ގޮތުން، މެމްބަރު ކްލަބުތަކުގެ 50 އިންސައްތައަށް ވުރެ ގިނަ ކްލަބުތަކުން އެކްސްޓްރާ އޯޑިނަރީ ކޮންގްރެސްއަކަށް ގޮވާލައިފިނަމަ، 14 ދުވަސް ތެރޭގައި ކޮންގްރެސް ބާއްވަން ޖެހެއެވެ. ނުބާއްވައިފިނަމަ ތިން ދުވަސް ތެރޭގައި ފީފާ އަދި އޭއެފްސީގެ އެހީއާއެކު ޓީމްތައް އަމިއްލައަށް ކޮންގްރެސް ބޭއްވޭނެއެވެ.
މައްސަލަ ގަނޑެއްގެ ތެރޭގައި އޮތް އެފްއޭއެމް ގެ އިންތިހާބު ތާވަލުކޮށްފައި އޮތީ މިމަހުގެ 31 އަށެވެ. އިންތިހާބުގައި ވާދަކުރަން ނިންމީ ކުރީގެ ރައީސް އަދި މަހިބަދޫ ދާއިރާގެ މަޖިލިސް މެމްބަރު އަހުމަދު ތޯރިގު (ޓޮމް) އާއި އެފްއޭއެމްގެ ރައީސްކަމުން ދާދިފަހުން ވަކިވި ބައްސާމް އަދީލް ޖަލީލްގެ އެކްސްކޯގައި ހިމެނުނު މުފާވިޒު ހާޝިމް (މުފާ) އެވެ. ނަމަވެސް ރައީސް ކަމަށް ވާދަކުރާ އެއް ކެންޑިޑޭޓު ކަމަށްވާ އަހުމަދު ތޯރިގު (ޓޮމް) އަށް ފުރަތަމަ ޑިވިޝަނުގެ ތިން ޓީމުގެ ތާއިދު ނެތް ކަމަށް ބަލައި، ތޯރިގުގެ ކެންޑިޑެންސީ ވަނީ އެފްއޭއެމުން ބާތިލުކޮށްފައެވެ. ތޯރިގަށް ތާއިދުކޮށްފައިވާ އެއް ކުލަބު ކަމަށްވާ ވެލެންސިޔާގެ ތާއިދު ސިޓީއެއް މުފާއަށް ވެސް ވަނީ ދީފައެވެ. ވެލެންސިޔާގެ ބޯޑުން ބުނެފައިވަނީ ސައްހަ ސިޓީއަށް ދީފައިވާނީ ވެސް މުފާއަށް ކަމަށެވެ.
ތޯރިގުގެ ކެންޑިޑެންސީ ބާތިލު ކުރުމުން އޭނާ ވަނީ އެފްއޭއެމްއަށް އިސްތިއުނާފަށް ހުށައަޅާފައެވެ. އޭނާ އިސްތިއުނާފަށް ހުށަހެޅި ސިޓީއަށް އެފްއޭއެމްއަށް ޖަވާބު ދެވިފައެއް ނުވެއެވެ. އެއީ 2023 ވަނަ އަހަރު އަހަރީ އާންމު ޖަލްސާގައި އެޕީލް ކޮމިޓީއެއް ފާސްކޮށްފައި ނެތުމުންނެވެ.
