ގައުމީ ހޭންޑުބޯލު މުބާރާތުގެ ދެވަނަ ޑިވިޝަނުގެ ޗެމްޕއަންކަން ޓެންޓު ސްޕޯޓްސް ކުލަބު ހޯދައިފިއެވެ.
ފައިނަލް މެޗު ޓެންޓުން ކާމިޔާބު ކުރީ، ފިއޮންޓި ސްޕޯޓްސް ކުލަބް 30-15 ގެ ނަތީޖާއަކުން ބަލިކޮށްގެންނެވެ.
މި މުބާރާތުގައި އެއްވެސް މެޗަކުން ބަލި ނުވެ ސައްތައިން ސައްތައިގެ ރެކޯޑަކާއެކު ޓެންޓު ސްޕޯޓްސް ކުލަބު ކާމިޔާބުކޮށް، ގައުމީ ހޭންޑުބޯލުގެ މުބާރާތުގެ އެއްވަނަ ޑިވިޝަނުން ވަނީ ޖާގަ ހޯދާފައެވެ.
މި މުބާރާތުގެ ކާމިޔާބާއި ބެހޭ ގޮތުން ޓެންޓު ހޭންޑުބޯލް ޓީމު ހިންގުމުގައި އިސްކޮށް ހަރަކާތްތެރިވާ ހައިޝަމު (ހަންޑޭ) ބުނީ އަންނަ އަހަރު އެއްވަނަ ޑިވިޝަނުގައި ވާދަކުރަން ޖެހުނަސް ޓީމާއި މެދު އިތުބާރު އޮތް ކަމަށާއި މި އަހަރުގެ ޓީމުގެ ކުޅުންތެރިންގެ ފެންވަރު އެކަން ސާބިތުކޮށްދީފައިވާ ކަމަށެވެ.
މުރާސިލަށް މައުލޫމާތު ދެމުން ހަންޑޭ ބުނީ މިހާރުވެސް ދެތިން ކުޅުންތެރިން، ވަރަށް ރަނގަޅު މޮޅު ކުޅުންތެރިން އަންނަނީ ޓީމަށް ޖޮއިން ކުރަން ވާހަކަ ދެކެވުމުން ކަމަށާއި އެހެން ވިޔަސް މި އަހަރު ކުޅުނު ކުޅުންތެރިންނަށް އިސްކަން ދޭނެކަމަށެވެ.
ހޭންޑު ބޯލް ކުޅުމަށް ޝައުގުވެރިވާ އަންހެން ކުޅުންތެރިންނަށް ވެސް ހަންޑެ ވަނީ އުފާވެރި ހަބަރެއް ދީފައެވެ. މި ގޮތުން އަންނަ އަހަރު ޓެންޓު ސްޕޯޓްސް ކުލަބުން އަންހެން ޓީމެއްވެސް ބައިވެރިކުރާނެ ކަމަށާއި ސީދާ ތައްޓަށް ވާދަކުރެވޭ ވަރުގެ ހުނަރުވެރި އަންހެން ކުޅުންތެރިންގެ ރަނގަޅު ޓީމެއް ބައިވެރި ކުރާނެ ކަމަށެވެ.
އިންޓަވިއު ނިންމާލަމުން ހަންޑެ ބުނީ މި މުބާރާތް ކާމިޔާބު ކުރުމުގައި ކުޅުންތެރިންނާއި ޓެންޓުގެ މެނޭޖްމަންޓަށް ވަރަށް ބޮޑަށް ޝުކުރު އަދާކުރާން ބޭނުންވާ ކަމަށާއި ހާއްސަކޮށް ޓެންޓު ގެ ރައީސް ނަސްރު (ނަސްރުﷲ ވަހީދަށް) ވަރަށް ބޮޑަށް ޝުކުރު އަދާކުރަން ބޭނުންވާ ކަމަށެވެ. އަންނަ އަހަރު އެއްވަނަ ޑިވިޝަނުގައި ވާދަކުރާއިރު ތައްޓަށް ވާދަ ކުރާނެ އެންމެ ގަދަ އެއް ޓީމަށް ޓެންޓު ސްޕޯޓްސް ކުލަބުވާނެ ކަމުގެ ޔަގީންކަންވެސް ހަންޑެ އަދި ޓެންޓުގެ މެނޭޖުމަންޓުން ދެއެވެ.
ފިރިހެން ޑިވިޝަނުގެ އެންމެ މޮޅު ކުޅުންތެރިން:
ޓެންޓުގެ އަބްދުالله ޒިމާމް, އިބްރާހީމް ހައިޝަމް އަބްދުالله, އަހުމަދު ފިރާޝް, ފްލައިން އީގަލްސް ސްޕޯޓްސްގެ އަބްދުالله އައްޒާމް, ޓެންޓުގެ އަހުމަދު އަބްދުލް ސައްތާރު, ބޮންތި ސްޕޯޓްސް ކުލަބްގެ ފިރުޝާން މުހައްމަދު, ޓެންޓުގެ އިސްމާއިލް ޝުއާއު އަބްދުالله އެވެ.
މުބާރާތުގެ އެންމެ އުންމީދީ ކުޅުންތެރިޔަކަށް ވެލިދޫ ޔުނައިޓެޑުގެ މުހައްމަދު ޔަސްމު އަހުމަދު އެވެ. ފައިނަލް މެޗުގެ މޮޅު ކުޅުންތެރިއަކަށް ހޮވުނީ ފިއޮންޓިގެ އަހުމަދު ފިރާޝްއެވެ.
އަންހެން ޑިވިޝަނުގެ ޗެމްޕިއަންކަން ތުޅާދޫ ޔަންގު އީގަލް:
ރޭ ކުޅެވުނު މި މުބާރާތުގެ އަންހެން ޑިވިޝަނުގެ އަންހެން ޑިވިޝަނުގެ ޗެމްޕިއަންކަން ތުޅާދޫ ޔަންގް އީގަލް އިން ހޯދީ ސުޕަ ޖެނެރޭޝަން ކުލަބް 32-14 އިން ބަލިކޮށްގެންނެވެ.
އަންހެން ޑިވިޝަނުގެ އެންމެ މޮޅު ކުޅުންތެރިންނަކީ, ތުޅާދޫ ޔަންގް އީގަލްސްގެ, ޝިޒްނާ ރަޝީދު, ޒުހާ ހުސެއިން, އާމިނަތު ފަޒްލާ, ކައުސަރު އާދަމް ސައީދު, މަރިޔަމް ލީން އަހުމަދު, ސުޕަ ޖެނެރޭޝަންގެ އާމިނަތު ޝުދާ އަދި ޔޫތް ސްޕޯޓްސް ކުލަބްގެ ފާތިމަތު ނިއުޝާ އެވެ.
އަންހެން ޑިވިޝަނުގެ އެންމެ އުންމީދީ ކުޅުންތެރިޔަކީ ފާތިމަތު ލީމް ރިޝާދެވެ.
