ޔޫއެފާ ޔޫރޮޕާ ލީގުގެ ގްރޫޕް ސްޓޭޖް މެޗުގައި އިނގިރޭސީ ގަދަ ބާރު މެންޗެސްޓަރ ޔުނައިޓެޑާއި ސައިޕްރަސް ގެ އޮމްނިއާ ނިކޯސިއާއި ބައްދަކުކުރި މެޗު އެއްވަރުވެގެން ނިމެން ދަނިކޮށް މެޗުގެ އިތުރު ވަގުތުގެ ވަހު މިނިޓްގައި ޖެހި ލަނޑާއެކު ޔޫރޮޕާ ލީގުގައި ކުރިއަށް ދިއުމުގެ ފުރުސަތު މެންޗެސްޓަރ ޔުނައިޓެޑުން ބޮޑުކޮށްފިއެވެ. މި ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ސްކޮޓް މެކްޓޮމެނީ އެވެ.
މެންޗެސްޓަރ ޔުނައިޓެޑްގެ އަމިއްލަ ދަނޑު އޯލްޓްރެފަޑްގައި ޔުނައިޓެޑް ގެ ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅު މި މެޗުގައި، މެންޗެސްޓަރ ޔުނައިޓެޑުން ވަނީ ގިނަ އަދަދެއްގެ ހަމަލާ ފޮނުވާލާ މުޅި މެޗު އެއްކޮށް ޑޮމިނޭޓްކޮށްފައެވެ. މި މެޗުގައި ގިނަ ހަމަލާތަކެއްގެ ހުރަހަކަށްވީ އޮމްނިއާ ގެ ގޯލް ކީޕާރު އުޒޯ އެވެ. މި ގޮތުން މާކަސް ރަޝްފޯޑު، ކްރިސްޓީއާނޯ ރޮނާލްޑޯ އަދި ކަސިމީރޯ ގޯލަށް ފޮނުވާލި ހަމަލާތައް އޮޒޯ ވަނީ ހުށިޔާރު ކަމާއި އެކު ދިފާއުކޮށްފައެވެ. މި މެޗުގައި މޮޅަށް ކުޅުނު އޮޒޯއަކީ ކުޑައިރުން ފެށިގެން މެންޗެސްޓަރ ޔުނައިޓެޑް ގެ ސަޕޯޓަރެކެވެ. މެޗަށްފަހު ވާހަކަދައްކަމުން އޮޒޯވަނީ އެނާ އެންމެ ސަޕޯޓްކުރާ ކުލަބް މެންޗެސްޓަރ ޔުނައިޓެޑް ގެ ދަނޑުގައި ޔުނައިޓެޑް ގިނަ އަދަދެއްގެ ސަޕޯޓަރުން ކުރިމަތީގައި ކުޅުމުގެ ފުރުސަތު ލިބުމަކީ ފަހުރެއް ކަމަށް ބުނެފައެވެ. އަދި އެއީ އެތައް ދުވަހެއްގެ ހުވަފެނެއް ހަގީގަތަކަށްވުން ކަހަލަ ކަމެއް ކަމަށެވެ.
މި މެޗުގައި ޔުނައިޓެޑުން ޖުމްލަ 33 ހަމަލާ ގޯލަށް ފޮނުވާލިޔަސް ލަނޑު ޖެހޭގޮތްވީ މެޗުގެ އިތުރުވަގުތުގެވެސް އެންމެ ފަހު މިނެޓްގައެވެ. ބަދަލު ކުޅުންތެރިންގެ ގޮތުގައި އެރި 3 ކުޅުންތެރިން ކަމަށްވާ އެރިކްސަން އާއި ސަންޗޯ އަދި މެކްޓޮނޮމީގެ މަސައްކަތުން ޖެހި މި ލަނޑުގެ ސަބަބުން ޔުނައިޓެޑަށް ވަނީ މި މުބާރާތުގެ އަނެއްބުރަށް ދިއުމުގެ ފުރުސަތު ވަރަށް ބޮޑުވެފައެވެ.
ޔޫރޮޕާ ލީގުގައި މިރޭ އިނގިރޭސި ވިލާތުގެ އާސެނަލްވަނީ ހަނި މޮޅަކާއެކު އެމީހުންގެ ސައްތައިން ސައްތަ ރެކޯޑު ދަމަހައްޓާފައެވެ. ބޯޑޯ އާއި ދެކޮޅަށް ކުޅުނު މެޗުގައި ލަނޑު ޖެހީ މި ސީޒަނުގައި މޮޅު ކުޅުމެއް ދައްކަމުން އަންނަ ސަކާ އެވެ. ޕްރިމިއަރ ލީގުގެވެސް މި ވަގުތު އެއްވަނާގައި ވަނީ މި ސީޒަނުގައި ހުރިހާ މުބާރާތެއްގައިވެސް މޮޅު ކުޅުމެއްދައްކަމުންދާ އާސެނަލްއެވެ.
