ހަކީމީ ގެ އަންހެނުން މިލްކިއްޔާތުން ބައެއް ހޯދުމަށް ދައުވާކުރިއިރު މުދާ މަންމަގެ ނަމުގަ

ނިމިގެން ދިޔަ ވޯލްޑް ކަޕުގައި މޮރޮކޯއިން ހޯދި އާދަޔާ ހިލާފު ކާމިޔާބުގައި ބޮޑު ހިއްސާއެއްވި އެ ގައުމުގެ ފުޓްބޯޅަ ތަރި އަޝްރަފް ހަކީމީ ގެ އަންހެނުން ވަރިވާން ހުށައަޅައިފިއެވެ. މި ދެމަފިރިން މައްސަލަ ޖެހި، ވަރިވެފައިވާ ކަމަށް މީގެ ކުރިންވެސް މީޑިއާގައި ވާހަކަ ދެކެވިފައިވަނިކޮށް، ހަކީމީ ގެ އަންހެނުން ހިބާ އަބޫކް ވަނީ ހަކީމީގެ މުދަލުން ދެބައިކުޅަ އެއްބައި ހޯދުމަށް ވެސް ދައުވާކޮށްފައެވެ.

މި ދައުވާތަކާއި ގުޅިގެން ކޯޓުން ބެލިބެލުމުން ހަކީމީ ގެ އެއްވެސް މުދަލެއް އޭނާގެ ނަމުގައި ނެތް ކަމަށްވެއެވެ. ހުރިހާ މުދަލާއި ފައިސާއެއް ހުރީ ހަކީމީ ގެ މަންމަގެ ނަމުގައެވެ. އެހެން ކަމުން ހިބާ އަށް އެއްވެސް އެއްޗެއް ނުލިބޭނެ ކަމާއި އެ ދައުވާ ކުރިއަށް ނުދާ ކަމަށްވެސް މޮރޮކޯގެ ބައެއް މީޑިއާތަކުން މައުލޫމާތުދެއެވެ. މީގެ އިތުރުން ހަކީމީ ފުޓްބޯޅަ ކުޅެގެން ލިބޭ އާމްދަނީ (މުސާރަ) ވެސް ލިބެނީ އޭނަގެ މަންމައަށެވެ.

ދުނިޔޭގެ މި ވަގުތު އެންމެ އަގުބޮޑު ކުޅުންތެރިން ހިމެނޭ ފްރާންސް ގެ ޕީއެސްޖީއަށް ކުޅެމުންދާ އަޝްރަފް ހަކީމީއަށް މުސާރައިގެ ގޮތުގައި ހަފްތާއަކު 215000 ޑޮލަރު ލިބެއެވެ. މިގޮތުން ހަކީމީ އަކީ އެފްރިކާ ބައްރުން، 6 ވަނަ އަށް އެންމެ ބޮޑު މުސާރައެއް ލިބޭ ފުޓްބޯޅަ ކުޅުންތެރިޔާއެވެ.

މި ދިޔަ ފެބްރުއަރީ މަހުގެ ތެރޭގައި ހަކީމީގެ މައްޗަށް އަންހެނަކުވަނީ ރޭޕުގެ ތުހުމަތުވެސް ކޮށްފައެވެ. ޕޮލިހުން މި މައްސަލައިގައި ބުނެފައިވަނީ، 24 އަހަރުގެ އަންހެނަކު ހަކީމީ ރޭޕްކުރި ކަމަށް ބުނެފައިވާ ކަމަށާއި ނަމަވެސް އެ އަންހެމީހާ އެ މައްސަލަ ރަސްމީކޮށް ހުށައަޅަން ބޭނުން ނުވާކަމަމަށް ބުނެފައިވާ ކަމަށެވެ.

މި މައްސަލާގައި ހަކީމީގެ އަންހެނުންވެސް ވަނީ ވާހަކަ ދައްކާފައެވެ. ”އަހަރެން އަބަދުވެސް ހުންނާނި އަނިޔާ ލިބޭ މީހުންނާއި އެކު“ ރޭޕް ކުރިކަމަށް ބުނާ އަންހެން މިހާއަށް ސަޕޯޓް ކުރުމުގެ ގޮތުން ހިބާ ބުނެފައިވެއެވެ.

ހަކީމީގެ އަންހެނުން ބުނާގޮތުން އޭނާ ވަރިވާން ނިންމީ ރޭޕް މައްސަލައިގެވެސް ކުރިންނެވެ. އެހެންވިޔަސް ވަރިވާ ސަބަބު މިހާތަނަށް ހާމަކޮށްފައި ނުވެއެވެ.

ހިބާ އަބޫކާއި އަޝްރަފް ހަކީމީ ދިމާވީ 2018 ވަނަ އަހަރު، ހަކީމީ ޖަރުމަނުގެ ޑޯޓުމަންޑު ޓީމަށް ކުޅުނުއިރު ޖަރުމަނުންނެވެ. ހަކީމީ އަށްވުރެ 12 އަހަރު ދޮށީ ހިބާ މަޝްހޫރުވެފައި ވަނީ ސްޕެނިޝް ޑްރާމާ ސީރީޒް ’އެލް ޕްރިންސިޕެ ’ ގައި ކުޅުނު ރޯލުންނެވެ. ސްޕެއިން އަށް އުފަން ހިބާ އަކީ ޓިއުނީޝިޔާއިން ސްޕެއިނަށް ހިޖުރަކުރި ދެމަފރިއެއްގެ ދަރިއެކެވެ.

ސްޕެއިނުގައި 2020 ގައި ކުރި ކައިވެންޏަށް އެ އަހަރު ކުއްޖަކު ލިބިފައިވެއެވެ. އަދި ދެވަނަ ދަރިއެއް ލިބުނީ މިދިޔަ އަހަރުއެވެ.

އެންމެ ފަހުން ނިމުނު ވޯލްކަޕުގައި މޮޅު ކުޅުމެއް ދައްކައިގެން ހަކީމީއާއި މޮރޮކޯއަށް ގިނަ ބައެއްގެ ސަމާލުކަން ލިބުނެވެ.