މި އަހަރުގެ ބޮޑު އީދުގެ ކުޅިވަރުތަކުން ބ.ކަމަދޫއިން ބޮޑު މަޝްހޫރު ކަމެއް ހޯދި ޒާރާ އާއި ވިޔަފާރިވެރިޔާ އަހުމަދު ޝިޔާމު (ސަން ޝިޔާމު) ކައިވެނީގެ ވާހަކަ ދައްކައި އެކަމަށް ފާޑުކިއަމުންދާތީވެ، ދީނީ އިލްމުވެރިޔާ ޝެއިހު ޒައިދު އެކަމާ ނުރުހުން ފާޅުކުރައްވައިފިއެވެ.
ސޯސަލް މީޑިއާގައި ވަރަށް ހަރަކާތްތެރިކޮށް އުޅުއްވާ ޝެއިހު ޒައިދު ވިދާޅުވެފައި ވަނީ ”މީހަކު ހަރާމް ގުޅުމެއް ހިންގައި ރައްޓެހިވެގެން އުޅުމަކީ ބައެއް މީހުންނަށް ހަޑިކަމެއް ނޫން ކަމަށާއި އަދި އެފަދަ ކަމެއްގައި އޭޖު ގެޕް (އުމުރުގެ ތަފާތު) ގެ ވާހަކައެއްވެސް ނުދައްކާ ކަމަށެވެ. އެކަމަކު ބާލިގުވެފައިވާ 2 މީހަކު ކައިވެނިކުރީމާ އެކަމަށް ހަޖޫ އެބަޖަހާ ކަމަށާއި މިއީ ދެރަކަމެއް ކަމަށްވެސް“ އަލީ ޒައިދު ބުނެފައިވެއެވެ. މީގެ އިތުރުން ޒައިދު ބުނެފައިވަނީ ހަޖޫ ޖަހައި، އިންކާރު ކުރަންވީ ޒިނޭއަށެވެ.
އަލީ ޒައިދު މި މޭރުމުން ރައްދު ދީފައިވާއިރު އާއްމުން ފާޑުކިޔަމުންދިޔަ އެއްވެސް ކަމަކަށް ވާހަކަދައްކާފައި ނުވެއެވެ. މި ގޮތުން އާއްމުން އެންމެ ބޮޑަށް ފާޑުކިޔާފައިވަނީ އަހުމަދު ޝިޔާމު މުހައްމަދަކީ ސިޔާސީ ޕާޓީއެއްގެ ލީޑަރެއްގެ އިތުރުން މަޝްހޫރު ވިޔަފާރިވެރިއެކެވެ. ދ.މީދޫ ދާއިރާގެ މަޖުލިސް ގޮނޑި ފުރުއްވަމުންދާއިރު އެންމެ އަވަހަށް އޮންނަ ރިޔާސީ އިންތިހާބަަށް ރާއްޖޭގެ ރައީސުލްޖުމްހޫރިއްޔާ ކަމުގެ މަގާމަަށްވެސް އަންނަނީ ނުރަސްމީކޮށް ކެމްޕޭނު ކުރައްވަމުންނެވެ. އެހެންކަމުން އެފަދަ ބޭފުޅަކު ކުއްލި ގޮތަކަށް ކައިވެނި ބައްލަވައި ގަތުމުން އާއްމުންގެ އެތައް ސުވާލުތަކަކާއެކު ފާޑުކިއުންވެސް ރައްދުވީއެވެ. ޝިޔާމު ފަދަ މަހުޖަނަކާއި މީގެ ކުރިން ދުވަހަކުވެސް ގުޅުމެއްނެތް އަންހެން ކުއްޖަކު، ހަަމައެކަނި ’ޓީވީން‘ ފެނިލުމުން ހިތްދޫވެ، ކައިވެންޏަކާ ހަމައަށް ދިއުމަށް ހޭދަވި މަދު ދުވަސްކޮޅަކީ ވިޔަފާރިއެއް ކަމަށްވެސް ސިފަކުރަނީ އެފަދަ ސަބަބުތަކާއި ހުރެއެވެ.
މީގެ ކުރިންވެސް ޒުވާން ކުދިންނާއި ކައިވެނި ކޮށްފައިވާ ސަން ސިޔާމަށް ޒާރާއާއި އެކީ ހޭދަކުރެވޭނީ ކިހާ ދުވަހަކުތޯ ސުވާލު އުއްފައްދަނީ ހަސަދަވެރިންނެއްނޫނެވެ. އެއީ މީގެ ކުރިން ކަންތައް ވެފައި ހުރިގޮތުން ދައްކަމުން އަންނަ ވާހަކަތަކެކެވެ. ޝިޔާމު ހިތްޕުޅާވާ ޒުވާން ކުއްޖަކު ފެންނަ އިރަށް ހުދު އަހެއްގައި އައިސް ’މިވަނީ ލޯބިކަން ޔަގީން…‘ އޭ ބުނާނީ ކޮން ކުއްޖަކާ ކަމެއް ޔަގީންނެއްނޫނެވެ. ޔަގީންވާ ކަމަކީ ރާއްޖޭގެ އެންމެ ވަރުގަދަ ވިޔަފާރިވެރިންގެ ތެރެއިން ކައިވެނީގެ އަދަދު އެންމެ ގިނަ ބޭފުޅަކީ ޝިޔާމެވެ. މީގެ ތެރޭގައި މުޅިންވެސް ހިމެނެނެނީ ކައިވެނި ބައްލަވައި ގެންނެވިއިރު އުމުރުން 25 އަހަރުވެސް ނުފުރޭ އަންހެން ކުދިންނެވެ.
ސިޔާސީ އެކި ކަންކަމުގައި އަބަދުވެސް ވާހަކަ ދައްކަމުންދާ ޝެއިހު އަލީ ޒައިދަށް ޝިޔާމުގެ ކައިވެންޏަށް މީހުން ސުވާލު އުފައްދާތީ، އެ ކައިވެނި ދިފާއުކުރަން ނެގި ދާއިރާއަކީ ގަސްތުގައިކުރިކަމެއް ކަމަށް ބެލެވެއެވެ. މި ސަރުކާރަަށް ނިސްބަތްވާ ހުރިހާ ސިޔާސީވެރިންނާއި ސިޔާސީ އެކްޓިވިސްޓުންގެ އަމަލުތައް ’ދީނީ ގޮތުން ހަލާލު‘ ކުރުމުގައިވެސް ޒައިދުގެ ބަސްމަގު ހުންނަނީ މި ކަހަލަ ގޮތަކަށެވެ. ތިމާ ހިތްއެދޭ ސިޔާސީ މީހާގެ ވާހަކަ އެހެން ދިމާލަކަށް ވާހަކަ ފުރޮޅާލައިގެން މައުލޫވެސް ބަދަލުކޮށްލައިގެންނެވެ.
