އެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރެއިން، ފުލުހުންގެ ބެލުމުގެދަށުގައިހުރި 103 ކިލޯއަށްވުރެ ގިނަ މަސްތުވާތަކެތި ނައްތާލައިފިއެވެ.
ފުލުހުން މައުލޫމާތުދޭ ގޮތުގައި ދޫނިދޫގައި އިއްޔެ ނައްތާލާފައިވަނީ 958 މައްސަލައާއި 197 އިންސިޑެންޓުގައި ހިމެނޭ 3121 އެވިޑެންސެވެ.
އޭގެތެރޭގައި ހިމެނެނީ:
-މަސްތުވާތަކެތިހުރި 8293 ރަބަރު ޕެކެޓު.
-މަސްތުވާތަކެތި ހުރި 2731 ސެލޯފިންކޮޅު.
-މަސްތުވާތަކެތި އަޅާފައިހުރި ފިލްމުހުސްކުރި 237 ދަޅު.
-މަސްތުވާތަކެތީގެ 585 ބުލެޓު.
–މަސްތުވާން ބޭނުން ކުރާ 30 ބިޑި.
މަސްތުވާތަކެތީގެ ބާވަތެއްގެ ގޮތުގައި ހިމެނޭ، (މަނާ ބޭހުގެ ގޮތުގައި ހިމެނޭ) 537 ބޭސްގުޅައެވެ.
-އެހެނިހެން މަސްތުވާތަކެތީގެ ގޮތުގައި 3045 އައިޓަމް
މިތަކެތީގެ މަގުމަތީ އަގަކީ 425،590،234.92 (ހަތަރުސަތޭކަ ފަންސަވީސް މިލިއަން ފަސްލައްކަ ނުވަދިހަހާސް ދުއިސައްތަ ތިރީސް ހަތަރު ރުފިޔާ ނުވަދިހަ ދެލާރި) އެވެ.
ފުލުހުން މައުލޫމާތުދޭ ގޮތުގައި މަސްތުވާތަކެތި ނައްތާލުމުގައި ގެންގުޅޭ އުސޫލުތަކަށް އެންމެ ފަހުން ގެނެސްފައިވާ ބަދަލުތަކާއެކު، އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެވޭ މަސްތުވާތަކެތީގެ ތެރެއިން އެ މައްސަލައެއް ތަހުގީގު ކުރުމަށް ގާނޫނީގޮތުން ބެހެއްޓުމަށް ލާޒިމުކުރާ މިންވަރަށް ބެހެއްޓުމަށްފަހު ބާކީ ހުންނަ މަސްތުވާތަކެތި ވީއެންމެ އަވަހަކަށް ނައްތާލައެވެ.
މަސްތުވާތަކެތި ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ މަސްތުވާތަކެއްޗާއި މަސްތުވާތަކެތީގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލާފައިވާ ކޮމިޓީގެ ބެލުމުގެ ދަށުންނެވެ.
މަސްތުވާތަކެތި ނައްތާލުމަށް އިއްޔެ ބޭއްވި ހަރަކާތުގައި ދާޚިލި ސަލާމަތާއި ފަންނިއްޔަތާބެހޭ ވަޒީރު ޢަލީ އިޙްސާން އާއި ކޮމިޝަނަރ އޮފް ޕޮލިސް ޢަލީ ޝުޖާއު ގެ އިތުރުން ނޫސްވެރިންނާއި މި ހަރަކާތުގައި ބައިވެރިވުމަށް ނަންނޯޓު ކުރި އާއްމު ރައްޔިތުންވެސް ބައިވެރިވި ކަމަށް ފުލުހުން މައުލޫތުދެއެވެ.
