އިންތިހާބީ ރައީސް ޑރ. މުއިއްޒު ހުވާކުރައްވާ ރަސްމިއްޔާތަށް ތައްޔާރު ކުރުމަށް ޖުމްހޫރީ މައިދާން ބަންދުކޮށްފިއެވެ. މުޅި ސަރަހައްދުގައި މިހާރު ކުރަމުންދާ ޒީނަތްތެރި މަސައްކަތްތަކުގެ ތެރެއިން އެންމެ ބޮޑު މަސައްކަތްތަކެއް ކުރަމުންދަނީ ޖުމްހޫރީ މައިދާން ތެރޭގައެވެ.
އަންނަ މަހު 17 ގައި އޮންނަ މި ރަސްމިއްޔާތުގެ އިންތިޒާމު ކުރުމުގެ މަސައްކަތް ހަވާލުކޮށްފައިވަނީ 22 މިލިއަން ރުފިޔާއަށް ސިފައިންގެ ކުންފުނި ސިވެކްއާއެވެ.
މިހާރުގެ ރައީސް އިބްރާހިމް މުހައްމަދު ސޯލިހާއި އެ މަނިކުފާނުގެ ނައިބު ރައީސް ފައިސަލް ނަސީމް ހުވާކުރެއްވުމުގެ ރަސްމިއްޔާތު ބޭއްވީ ގަލޮޅު ދަނޑުގަ އެވެ. އެ ފަހަރުގެ ރަސްމިއްޔާތައް ހަރަދުވީ 10 މިލިއަން ރުފިޔާއެވެ.
އިންތިހާބީ ރައީސް މުއިއްޒާއި އިންތިހާބީ ނައިބު ރައީސް ހުސައިން މުހައްމަދު ލަތީފު ހުވާކުރެއްވުމުގެ ރަސްމިއްޔާތުގެ އިންތިޒާމުތައް ރައްޔިތުންގެ މަޖިލިހުގެ އިދާރާ އިން އަންނަނީ އިންތިހާބީ ރައީސްގެ އޮފީހާ ގުޅިގެން ކުރަމުންނެވެ. ވިއްސާރަވެ މޫސުން ތަން ނުދޭ ނަމަ ރަސްމިއްޔާތު ބާއްވާނީ މަޖުލީހުގެ އިދާރާގައި ކަމަށްވެސް މަޖުލީހުން މައުލޫމާތު ދެއެވެ.
