މިއަދާއި މާދަމާ ރާއްޖޭގައި ހިންދީ ފާދިރީއެއްގެ ދަރުހެއް އޮންނަ ކަމަށް ބުނެ އިސްތިހާރެއް ހަދައިގެން އުޅެނީ ޑރ. މުއިއްޒުގެ ކެމްޕޭނު އޮފީހުންކަން ފަޅާ އަރައިފިއެވެ. މިއަދު ސޯސަލް މީޑިއާގައި ދައުރުވަމުންދާ މި އިސްތިހާރުގެ ހަބަރު ޝާއިއުކުރި ބައެއް މީޑީއާތަކުންވެސް ބުނެފައިވަނީ މިއީ ސޯސަލް މީޑިއާއިން ފެނުނު އެއްޗެއްގެ ގޮތުގައެވެ. ޑރ. މުއިއްޒުގެ ކެމްޕޭނު އިސްތިހާރު ކުރަމުންދާ ބައެއް މިޑިއާތަކާއި، ސަލަފު ޖަމުއިއްޔާއަށް ނިސްބަތްވާ ބައެއް މީހުންވެސް މިކަން ކުށްވެރިކޮށް ވާހަކަދައްކަމުންދާއިރު، އެ ފަރާތްތަކުންވެސް މިކަމުގެ ތެދުދޮގު ބަލާފައި ނުވެއެވެ.
އުނިމާ ގްރޭންޑުގައި މި އިވެންޓު އޮންނަ ކަމަށް ބުނެ އިސްތިހާރު ކުރަމުންދާއިރު، އެ ފަރާތުންވެސް ވަނީ އެކަން ދޮގުކޮށްފައެވެ. މިއީ ރިޔާސީ އިންތިހާބުގެ ކެމްޕެއިނަށް ބަޔަކު ހިންގާ ވަރަށް ދަށު ދަރަޖައިގެ ހަޑި ހުތުރު އަމަލެއް ކަމަށް ބުނެ ޑރ. މުއިއްޒު ތަންކޮޅެއް އިލްމީ ޒަމާނީ ކެމްޕެނެއް ކުރުމަށްވެސް ބައެއް ފަރާތްތަކުން ދަނީ ގޮވާލަމުންނެވެ.
އާއްމުންގެ ތެރޭގައި ފިތުނަ ފަސާދަ ފަތުރައިގެން މި ފަދަ މުޑުދާރު ކަންކަން ހިންގަމުންދާއިރު ބައެއް ފަރާތްތަކުން ތެދުދޮގު ނުބަލާ ސޯސަލް މީޑިއާގައި ފަތުރަމުންދަނީ އަމިއްލަ ސިޔާސީ އެޖެންޑާގެ ދަށުން ކުރަމުންދާ ކަމެއްގެ ގޮތުގައެވެ.
މި ކަމާ ގުޅިގެން ސަރުކާރުގެ އޮފިޝަލަކަު ވިދާޅުވީ ދައުރުވަމުންދާ ހަބަރަކީ ސަރުކާރުގެ އެއްވެސް އިދާރާއަކުން ހުއްދަ ހޯދައިގެން ކުރާ ކަމެއް ނޫން ކަމަށާއި އެއީ މި ސަރުކާރުން ހިތްވަރުދޭނެ އަދި ހުއްދަ ދޭނެ ކަމެއްވެސް ނޫން ކަމަށެވެ. މި އިސްތިހާރު ހަދައިގެން އެ ޕްރޮމޯޓު ކުރަނީ އެކަން ބޭނުންވާ މީހުން ކަމަށާއި، އެއީ ޑރ.މުއިއްޒު ކެމްޕޭނު ޓީމުން ހިންގާ ވަރަށް ދަށުދަރަޖައިގެ ފިނޑި އަމަލެއް ކަމަށެވެ.
