އިއްޔެ އއައްޑޫ ސިޓީ ހިތަދޫ ގެއެއްގައި އަންހެނަކު ފެންވަރަން ހުއްޓައި ފުލުހުން ދޮރު ވައްޓާލާ ފާހާނާއަށް ވަތްކަމަށް ބުނާ މައްސަލަ ފުލުހުން ދޮގުކޮށްފިއެވެ.
މިކަމާ ގުޅިގެން ފުލުހުން ހިއްސާކުރި މެސެޖެއްގައި ވަނީ، މަސްތުވާތަކެތީގެ މައްސަލައެއްގައި ހިތަދޫ އެޕާޓްމަންޓެއް ކޯޓު އަމުރެއްގެ ދަށުން އިއްޔެ ބަލާފާސްކޮށްފައި ވާކަމަށެވެ.
އެޕާޓްމަންޓަށް ފުލުހުން ވަނުމަށް ދޮރު ހުޅުވުމަށް ތަކުރާރުކޮށް އެދުމުން ވެސް ދޮރު ނުހުޅުވުމުން، ފުލުހުން އެޕާޓްމަންޓަށް ވަދެފައި ވަނީ ބާރުގެ ބޭނުންކޮށް ދޮރު ވައްޓާލައިގެންނެވެ. އަދި އެޕާޓްމަންޓުގެ ދެ ކޮޓަރިއެއްގެ ދޮރު ހުޅުވުމަށް ތަކުރާރުކޮށް އެދުމުން ވެސް ދޮރު ނުހުޅުވުމުން އެ ދޮރު ވެސް ހުޅުވީ ބާރުގެ ބޭނުންކޮށްގެން ދޮރު ވައްޓާލުމަށް ފަހު ކަމަށް ފުލުހުން ބުންޏެވެ.
އޭގެ ތެރެއިން އެއް ކޮޓަރިއެއްގައި ފެންވަރައިގެން ނުކުމެ ހުރި އަންހެނަކު ހުރުމުން ފުލުހުން ވާނީ ދޮރު ލެއްޕުމަށްފަހު ކޮޓަރިން ނުކުތުމަށް ފުރުސަތު ދީފައިވާ ކަމަށްވެސް ފުލުހުންގެ މެސެޖުގައިވެއެވެ.
މީގެ އިތުރުން ފުލުހުން ބުނީ ސޯސަލްމީޑީއާގައި އަދި ބައެއް މީޑިއާ ތަކުން ބުނެފައިވާ ގޮތަށް، އެޕާޓްމަންޓުގެ ފާހާނައިގެ ދޮރު ވައްޓާލާފައި ވަދެފައި ނުވާނެ ކަމަށެވެ. އަދި މި އޮޕަރޭޝަންގައި ބައިވެރިވި ފުލުހުން ބޮޑީވޯން ކެމެރާ ބޭނުންކޮށްފައި ނުވާކަން ވެސް ފުލުހުން ވަނީ ފާހަގަކޮށްފައެވެ. އެހެން ކަމުން އެއީ ރަނގަޅު މައުލޫމާތެއް ނޫން ކަމަށްވެސް ފުލުހުންގެ މެސެޖުގައިވެއެވެ.
ރާއްޖޭގެ ބައެއް މީޑިއާތަކުންނާއި އަދި ސޯސަލް މީޑިއާގައި ބުނެފައިވަނީ އައްޑޫ ހިތަދޫ ގެއެއްގެ ފާހަނާ ދޮރު ވައްޓާލާ ފުލުހުން ވަދެފައިވަނީ އަންހެނަކު ބަރަހަނާކޮށް ފެންވަރަން ހުއްޓާ ކަމަށެވެ. އަދި އެ އަންހެންމީހާ ހެދުން ލައި ކަންތައް ކުރުވީވެސް ފުލުހުންގެ ހާޒިރުގައި ކަމަށާއި އެ ހުރިހާ ވަގުތެއްގައިވެސް ފުލުހުންގެ ބޮޑީވޮން ކެމެރާއިން ދިޔައީ ރެކޯޑު ކުރަމުން ކަމަށްވެސް އެ އަންހެންމީހާގެ އާއިލާއާއި ހަވާލާދީ ބުނެފައިވެއެވެ.
މި އޮޕަރޭޝަންގައި ބާރުގެ ބޭނުން ކުރިގޮތުގެ ރިވިއުއެއް ހަމަޖެހިފައިވާ އުސޫލުގެ ތެރެއިން ހަދާނެ ކަމަށް ފުލުހުން ވަނީ ބުނެފައެވެ.
