ޕްރޮސެކިއުޓަރ ޖެނެރަލް ހުސެއިން ޝަމީމަށް މަރުތޭލައަކުން ހަމަލާދީ ޒަހަމުކޮށްލައިފިއެވެ.
މިއަދު ހެނދުނުގެ ވަގުތެއްގައި ޝަމީމަށް ހަމަލާދިނީ ކޮންބައެއް ކަމެއް ނުވަތަ ކޮން ސަބަބެއްގައި ކަމެއް ޕޮލިހުން މިހާތަނަށް ހާމަކޮށްފައި ނުވެއެވެ. ޝަމީމަށް މި ވަގުތު ފަރުދެމުން އަންނަނީ އޭޑީކޭ ހޮސްޕިޓަލުގައެވެ. މި ހަމަލާއިން ޝަމީމުގެ އަތުގެ ކަށިގަނޑެއްގައި ރެނދެއްލާފައިވާ ކަމަށާއި މިހާރު ހާލު ރަނގަޅު ކަމަށް އޭޑީކޭ ހޮސްޕިޓަލުން މައުލޫމާތުދެއެވެ.
މި ހަފްތާގެ ތެރޭގައި ބައެއް މަޖުލިސް މެމްބަރުންނަށްވެސް އަންނަނީ މަގުމަތިން ހަމަލާދީ މަރާމާރީ ހިންގަމުންނެވެ. މި ގޮތުން ފުވައްމުލަކު މެމްބަރު ހުސެންއަށާއި، އައްޑޫ މީދޫ ދާއިރާގެ މެމްބަރު ރޮޒެއިނާ އާދަމަށްވެސް ވަނީ ބަޔަކު ހަމަލާދީފައެވެ.
