ރައްޔިތުންގެ މަޖުލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ މަޖުލީހުން ހުއްޓުވައި ކުރިއަށް ނުގެންދިއުމުން އެ މައްސަލައިގެ ގޮތެއް ނިންމަން އެމްޑީޕީން ސްޕްރީމް ކޯޓަށް ހުށައެޅި މައްސަލަ އެ ކޯޓުން ބަލައިގަނެފިއެވެ. ދުސްތޫރީ މައްސަލައެއްގެ ގޮތުގައި ހުށައެޅި މައްސަލަ އެމްޑީޕީގެ ގާނުނީ ބޭފުޅުން ވިދާޅުވަނީ އަވަސް މައްސަލައެއްގެ ގޮތުގައި ނިންމުމަށެވެ. އެމްޑީޕީގެ ސެކެޓްރީ ޖެނެރަލް އަނަސް އަބްދުއްސައްތާރު ވިދާޅުވީ އެ މައްސަލަ ސްޕްރީމު ކޯޓުން ބަލައިގަނެ މައްސަލަ ހުށައެޅުމުގެ ހުއްދަ އެ ކޯޓުން ދީފައިވާ ކަމަށެވެ، އަނަސް ވިދާޅުވި ގާނޫނު އަސާސީއާއި މަޖުލީހުގެ ގަވައިދުތަކުންވެސް މި ގޮތަށް ރައްޔިތުންގެ މަޖުލިސް ހުއްޓުވާފައި ނުބޭއްވޭނެ ކަމަށެވެ. އެމްޑީޕީން ބޭނުންވަނީ ސްޕްރީމް ކޯޓުގެ ހުކުމަކުން އެ މަރުތަޅު ނައްޓާލުމަށެވެ.
ރައްޔިތުންގެ މަޖުލީހުގެ އަމީން އާއްމު ފާތުމަތު ނިއުޝާ ވަނީ މަޖުލީހުގެ ޖަލްސާ ބާއްވަން ތަކުރާރުކޮށް ދެކޮޅު ހަދާފައެވެ. އަމީން އާއްމު ވިދާޅުވެފައިވަނީ ރައްޔިތުންގެ މަޖުލީހުގެ ޖަލްސާއެއް ބޭއްވޭނީ ނައިބް ރައީސް އީވާ އަބްދުﷲ މަޖުލީހަށް ހާޟިރުވި ދުވަހަކުން ކަމަށާއި، އެކަމަނާގެ ރިޔާސަތުގައި ނޫން ގޮތަކަށް ޖަލްސާއެއް ނުބޭއްވޭނެ ކަމަށެވެ. ނަޝީދުގެ ޑިމޮކްރެޓްސް ޕާޓީއާއި ގާތް ގުޅުމެއް އޮންނަ ނިއުޝާ ވަނީ ކުރިން ހުށައެޅި އިތުބާރުނެތް ކަމުގެ މައްސަލާގައިވެސް އެއްބާރުލުންދޭން ދެކޮޅު ހަދާފައެވެ.
