ރާއްޖޭގެ ބައެއް މީޑިއާތަކުގައި، ދިވެހި ރާއްޖެއަށް ދަތުރު ކުރުމުގައި އިނގިރޭސި ވިލާތާއި އެމެރިކާގެ ރައްޔިތުން ސަމާލުވުމަށް ޓްރެވަލް އެޑްވަޒީ ނެރެފައިވާ ކަމަށް ޝާއިއުކުރުމުން މިނިސްޓަރ މައުސޫމުގެ ހޫނު ރައްދެއް އެ މީޑިއާތަކަށް ދެއްވައިފިއެވެ. ޓުއަރިޒަމް މިނިސްޓަރ އަބްދުﷲ މައުސޫމު ގެ ސޯސަލް މީޑިއާގައި އެމަނިކުފާނު ވިދާޅުވީ ”މަސްދަރުން ޚަބަރު ކަށަވަރުނުކޮށް، ތެދުދޮގުނުބަލާ، ރާއްޖޭގެ އިގުތިސޯދާއި އަމަން އަމާންކަމަށް ބުރޫއަރާފަދަ ޚަބަރުތައް ޔޯލައަކުންހޯދައިގެން، އެފަދަ ޚަބަރު ފަތުރާނޫސްތަކުގަ އެޑިޓަރުން ތިބޭބާ؟ ނޫސްވެރިކަމުގެ މިނިވަންކަންލިބެނީ ބޮޑު ޒިންމާއަކާއި އެކު“ ކަމަށެވެ.
މީގެ އިތުރުން ދިވެހިރާއްޖެ އަށް ކަނޑައަޅާފައިވާ ސަފީރު ކެރޮން ކޮސްލާ ވެސް ވިދާޅުވީ އިނގިރޭސި ވިލާތުގެ ރައްޔިތުން ގައުމުތަކަށް ދަތުރުކުރުމުގައި ސަމާލުވާން އެދި ނެރެފައިވާ ޓްރެވަލް އެޑްވައިޒަރީ މި މަހު އަޕްޑޭޓްކުރީ ރާއްޖެއަށް ހާއްސަކޮށް ނޫން ކަމަށާއި އެއީ މުޅި ދުނިޔެއަށް ނެރުނު އަޕްޑޭޓެއް ކަމަށެވެ.
ޔޫކޭގެ ޓްރެވަލް އެޑްވައިޒަރީ އަޕްޑޭޓާ ގުޅިގެން ރާއްޖޭގެ ނޫސްތަކުން ރިޕޯޓްކޮށްފައިވަނީ ރަނގަޅަށް ނޫން ކަމަށް ވިދާޅުވެ ސަފީރު ކުރެއްވި ޓްވީޓެއްގައި ވަނީ ޓެރަރިޒަމާ ގުޅޭ ގޮތުން މި މަހުގެ 22 ގައި ނެރުނު އަޕްޑޭޓަކީ ހުރިހާ ގައުމެއް ހިމެނޭ ގޮތުން ނެރުނު އަޕްޑޭޓެއް ކަމަށެވެ. ”މިއީ ދިވެހިރާއްޖެއަށް ވަކިން ހާއްސަކޮށް ގެނައި ބަދަލެއް ނޫން،“ ސަފީރު ލިޔުއްވާފައިވެ އެވެ.
ޔޫކޭ ސަރުކާރުގެ ވެބްސައިޓްގައި ވެސް މިއީ މުޅި ދުނިޔޭގައި ވެސް ޓެރަރިޒަމްގެ ރިސްކު ބޮޑުވެފައި ވާތީ ގެނައި ބަދަލެއް ކަމަށް ބުނެފައިވެ އެވެ.
ރާއްޖޭގެ ބައެއް ނޫސްތަކުގައި މި ހަބަރު ޝާއިއު ކުރުމުން އާއްމުންނާ ބައެއް ވިޔަފާރިވެރިންވެސް ކަންބޮޑުވުން ފާޅުކޮަށްފައިވެއެވެ. މި ގޮތުން މި ދުވަސްވަރަކީ ރާއްޖައި ހަމަނުޖެހުން ތަކެއް ނުވަތަ ކުއްލި ނުރައްކަލުގެ ހާލަތު ފަދަ ހާލާތެއް އިއުލާންކޮށްފައި ނެތް ދުވަސް ވަރެއްގައި ކުއްލިއަކަށް ރާއްޖެއަށް ދަތުރުކުރުމުގައި ސަމާލުވުމަށް ނުވަތަ ސަމާލުކަން ދޭންޖެހޭ ލެވެލް މަތި ކުރިކަމަށް ހަބަރު ފެތުރުމުން އެކަމުގެ އަސަރު ރާއްޖޭ ޓުއަރިޒަމާއި އިގްތިސާދަށް ވެސް އަސަރުކުރާނެ ކަމަށް އެފަރާތްތަކުން ދެކެއެވެ.
ރާއްޖެއަށް އެންމެ ގިނައިން ޓުއަރިސްޓުން އަންނަ އެއް ގައުމަކީ އިނގިރޭސި ވިލާތެވެ.
