ރައްޔިތުންގެ މަޖުލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލާގައި މިއަދުގެ ޖަލުސާ ނުބޭއްވި ކެންސަލް ވެއްޖެއެވެ. މަޖުލީހުގެ ނައިބްރައީސް އީވާ އަބްދުﷲ ބަލިވެ ކަމަށްބުނެ ޖަލްސާ ނުބޭއްވުމުން އަނެއްކާވެސް މި ވަނީ މަޖުލީހުގައި މަރުތަޅު އެޅުވިފައެވެ. މީގެ ކުރިންވެސް ނަޝީދު ވަކިކުރަން ހުށައެޅި މައްސަލަތަކުގައި މި ފަދަ ގޮތަކަށް ޖަލްސާތައް އެޖެންޑާނުކޮށް މަރުތަޅު އެޅުވި އެންމެ ފަހުން މަޖުލީހުގެ ޗުއްޓީއަށް ދިޔައީ ވަކި ގޮތެއް ނުނިމެނީހެވެ. އެކަމުގެ ސަބަބުން ސަރުކާރުން ހުށައެޅި އެތައް ބިލެއްވެސް ވަނީ ފާސްނުކުރެވިއެވެ ލަސްވެފައެވެ. ރައްޔިތުންނާ ގުޅުން ހުރި ބިލުތަކާއި ބައެއް ގައުމުތަކަށް ސަފީރުން އައްޔަން ކުރަން ހުށައެޅި މައްސަލަތައްވެސް ވަނީ އެޖެންޑާ ނުކޮށް މަޖުލީހުގައި މަޑުޖެހިފައެވެ.
ނަޝީދު ވަކި ކުރުމުގެ ޖަލްސާ މެމްބަރުންގެ ވޯޓަކާ ހަމައަށް ނުގޮސް ކޮންމެވެސް ގޮތަކުން ކެންސަލު ކުރުމުގައި އަމީން އާއްމާއި ކައުންސެލު ޖެނެރަލްވެސް މުހިމު ރޯލެއް ކުޅޭ ކަމަށްވެއެވެ. މީގެ ކުރިން ކޮމެޓީތަކަށް މެމްބަރުން ހަމަނުވާ ކަމަށްބުނެއެވެ. ރައްޔިތުންގެ މަޖުލީހުގެ ޖަލްސާއެއް ނުބޭއްވި މަރުތަޅު އަޅުވައި ހުއްޓުވާލުމުގައި މަޖުލީހުގެ އިދާރި މޭޒުން ހައްލެއް ހޯދައިނުދީ ީގެ ކުރިން މަޖުލިސް ހުއްޓިފައިނުވެއެވެ. މަޖުލިސް ހުއްޓެނީ މެމްބަރުންގެ އަރާރުންވުމާއި ހަޅޭކާއި އެކި ހަމަނުޖެހުމުގެ ތެރެއިން ޖަލްސާ ކުރިއަށް ނުގެންދެވިގެންނެވެ. މުރާސިލަށް މައުލޫމާތު ދެއްވި މަޖުލީހުގެ މެމްބަރަކުވެސް ވިދާޅުވީ ނަޝީދު ދިފާއިުކޮށްދެނީ މަޖުލިޙުގެ އަމީން ޢާއްމު ނިއުޝާ ކަމަށާއި ރައްޔިތުން ހޮވާފައިވާ މެމްބަރުންގެ ބާރު ކަނޑުވާލައި ދައުލަތުގެ އެއްބާރުގެ މައްޗަށް ގަދަވެގަނެގެން އުޅޭ މަޖުލީހުގެ އިދާރީ މުއައްޒަފުންނަށް ފިޔަވަޅު އަޅައިގެންވިޔަސް މަޖުލީހުގެ ޖަލްސާތައް ބާއްވަން ޖެހޭނެ ކަމަށެވެ.
