ޝަރީއަތް ނިމެންދެން ޖަލުގައި ބަންދުކޮށްފައި ހުރި މުހައްމަދު ޖަމީލުގެ ހަށިގަނޑުގައި ގިނަ އަދަދެއްގެ ޒަހަމުތަކެއް ހުރި ކަމުގައި ވިޔަސް ޕޯސްޓުމޯޓަމް ނުހަދައި ވަޅުލައިފިއެވެ.
ޖަލު ބަލަހައްޓަމުންދާ ކަރެކްޝަން ސަވިސްއިން ބުނީ އިއްޔެ ވަގުތެއްގައި ޖަމީލު ގެ ގޮޅި ބެލިއިރު ހަރަކާތެއް ނެތި އޮތް ކަމަށާއި، އެހެންކަމުން ވަގުތުން ޖަލުގެ ސިއްހީ ފަރުވާދޭ ތަނަށް ގެންގޮސް ފަރުވާދޭން ފެށިއެވެ. އޭގެ ފަހުން އިތުރު ފަރުވާއަށް މާފުށި ސިއްހީ މަރުކަަޒަށް ގެންދެވުނު ކަމަށާއި އެ ތަނުން ޑޮކްޓަރު ބުނެފައިވަނީ ޖަމީލު ހިތް ހުއްޓިގެން މަރުވެފައިވާ ކަމަށެވެ.
ޖަމީލުގެ އާއިލާއިން ވާހަކަ ދެއްކި މީހަކު ބުނީ އިއްޔެގެ ވަގުތެއްގައި ޖަމީލުގެ ހަށިގަނޑު އާއިލާއާއި ހަވާލު ކުރި އިރު އެއްވެސް ވަރަކަށް ޕޯސްޓުމޯޓަމް ހަދާ ވާހަކައެއް ނުބުނާ ކަމަށެވެ. އަދި ޖަމީލު މަރުވީ ގުދުރަތީ މަރަކުން ކަމަށްވެސް ކަރެކްޝަން އޮފިޝަލުން ބުނެފައިވާ ކަމަށެވެ. އާއިލާއިން ހިނެވެމުގެ ކަންކަމުގައި އުޅުނު މީހުން ފާހަގަކުރި އެތައް ޒަހަމެއް ސޯސަލް މީޑިއާގައި ދައުރުވަމުން އަންނައިރު ބުރަކަށްޓާއި އަތުގައި ޒަހަމުތަކެއް ހުއްޓެވެ. ނޫފައި ގަނެފައި އެތައް ތަނެއް ހުރިއިރު އެއީ އަނިޔާގެ ނިޝާންތަކެއް ކަމަށް ބެލެވެއެވެ.
ޖަމީލުގެ ޖަނާޒާގެ ކުރިން ޕޮލިހުން އައިސް ޖަމީލުގެ ކަށުކަމާކެމީގެ ކަންކަން ހުއްޓުވައި ޕޮލިހުންގެ ބެލުމުގެ ދަށަށް ގެންދިއުމަށް ރޭގައި މަސައްކަތް ކުރިއަސް ފަހުން ވަނީ އާއިލާއިން ބޭނުންވި ގޮތަށް ފަތިސް ނަމާދަސް ފަހު ވަޅުލާފައެވެ. ހޯމް މިނިސްޓަރ އިހުސާން ބައިވެރިވި ޖަނާޒާގައިި މިނިސްޓަރު ވިދާޅުވީ ޖަމީލުގެ މަރުގެ މައްސަލަ ބައްލަވާނެ ކަމަށާއި ކަރެކްޝަން އޮފިޝަލުންނާއި ޖަލު ބަލަހައްޓާ އޮފިޝަލުންގެ އިހުމާލެއް އޮތްތޯ ބައްލަވާނެ ކަމަށެވެ.
ޕޯސްޓުމޯޓަމް ހެދުމަށް އާއިލާއިން ޖަމީލުގެ ހަށިގަނޑު ފުލުހުންނާއި ހަވާލު ނުކުރީ ކީއްވެތޯ ސުވާލު ކުރުމުން ޖަމީލުގެ އާއިލާއަށް ނިސްބަތްވާ މެމްރަކު ބުނީ ހިނަވާ ކަފުންކޮށް ކަށު ނަމާދަށް ތައްޔާރުވެފައިއޮއްވާ ހަށިގަނޑު ހަވާލު ކުރަން ބޭނުން ނުވީ ކަމަށެވެ. އެމީހުން ބަލަންވާ ވަރަށް ނުބަލައި ދޫކޮށްލާފައި ފަހުން ފާޑުކިއުންތައް އަމާޒުވުމުން (ފަހުވަގުތު) އެކަން ކުރުމުގައި ރަނގަޅު ނިޔަތެއް ސަރުކާރުގެ ނެތް ކަމަށްވެސް އެ ފަރާތުން ދެކެއެވެ.
