ސަރުކާރުގެ މުހިއްމު މަގާމުތަކެއް އަދާކުރެއްވި މަސްމަހާމެހީގެ އިލްމުވެރިޔާ އަހުމަދު ހާފިޒު އަވަހާރަވެއްޖެއެވެ. ކެންސަރުބަލީގެ އާލާސްކަންފުޅެއްގައި ގިނަ ދުވަސްތަކެއް ވަންދެން ފަރުވާ ހޯއްދަވަމުން ގެންދަވަނިކޮށް އަވަހާރަވީ މިއަދުއެވެ.
ސަރުކާރުގެ މުހިއްމު މަގާމުތަކެއް އަދާކުރެއްވުމުގެ އިތުރުން ހާފިޒުގެ ހިދުމަތް އެންމެ ބޮޑަށް ލިބުނީ މަސްވެރިކަމުގެ ދާއިރާއަށެވެ. މިގޮތުން މަސްމަހާމެއްސާއި ކަނޑުތަކުގެ ދިރުން ތަކާއި ބެހޭގޮތުން މުހިއްމު ރިސާޗުތައް ކުރެއްވިއެވެ. މަސްމަހާމެހީގެ ނަމާއި އޭގެ ތަފްސީލުތަކާ އެކު އެތައް ލިއުއްވުންތަކެއްވެސް ހާފިޒުވަނީ ޝާއިއުކުރައްވާފައެވެ. މަސްމަހާމެހީގެ ދިރުންތަކާއި ބެހޭގޮތުން ރިސާޗު ހައްދަވަނިކޮށް މުޅިން އަލަށް ފެނުނު މަހަކަށް ބޭރުގެ ސައިންޓިސްޓުންވަނީ ހާފިޒުގެ ނަމުން ނަންދީފައެވެ. އެންމެ އާދައިގެ މީހަކަށްވެސް ފަހުމުވާގޮތަށް މަސްމަހާމެހީގެ މައުލޫމާތުތައް އެއްކުރައްވައި އެ މައުލޫމާތުތައް ހިމެނޭ އެތައް ފޮތެއްވަނީ ނެރުއްވާފައެވެ.
އަހުމަދު ހާފިޒުގެ ސަރުކާރު ހިދުމަތްތަކުގެ ތެރޭގައި ސަރުކާރުގައި މަސްވެރިކަމުގެ ޕޮލިސީތައް ރޭއްވެވުމުގަ އާއި މަސްވެރިކަމުގެ ރޮނގުން އާންމުން ހޭލުންތެރި ކުރުވުމަށް ވަރަށް ފުޅާ ދާއިރާއެއްގައި މަސައްކަތް ކުރެއްވިއެވެ. މީގެ އިތުރުން ފިޝަރީޒް މިނިސްޓްރީން ވަރަށް ގިނަ އަހަރުތަކެއް ވަންދެން ނެރުނު މަޝްހޫރު ’ރަސްއައިން‘ މަޖައްލާގެ ގެ އެޑިޓަރުކަން ވަރަށް ގިނަ ދުވަހު ކުރެއްވިއެވެ. އަދި އެ މިނިސްޓްރީގެ އިސް މަގާމްތަކެއް އަދާކުރެއްވުމުގެ އިތުރުން އޭނާ ވަނީ ޔޫތު މިނިސްޓްރީގެ ސްޓޭޓް މިނިސްޓަރު ކަން ވެސް ކުރައްވައިފަ އެވެ.
މަސްވެރިކަމާއި ކަނޑުގެ ދިރުންތަކުގެ މަސައްކަތުގެ އިތުރުން ހާފިޒަކީ ކުޅިވަރުގައި ވެސް ފާހަގަ ކޮށްލެވޭ ބޭފުޅެކެވެ. އޭނާ ވަނީ ކްލަބް ވެލެންސިއާއަށް ގޯލް ކީޕަރެއްގެ ގޮތުގައި ކުޅުއްވައި، ފުޓުބޯޅައިގަ ހަރަކާތްތެރިވެފައެވެ. މީގެ އިތުރުން ހާފިޒުގެ އެންމެ ފާހަގަ ކުރެވެނީ ބާސްކެޓްބޯޅަކުރިއަރުވަން ކުރެއްވި މަސައްކަތްތަކެވެ. އެ ކުޅިވަރު ކުޅުއްވުމުގެ އިތުރުން ބާސްކެޓު އެސޯސިއޭޝަން ގެ ރައީސް ގެ ހައިސިއްޔަތުން އެތަން ހިންގުމުގައި އެތައް އަހަރަކު މަސައްކަތް ކުރެއްވިއެވެ.
އަހުމަދު ހާފިޒުގެ ހިދުމަތްތަކާއި ބެހޭގޮތުން މިއަދު މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ނެރުނު ބަޔާނެއްގައި ބުނެފައިވަނީ ”މަސްވެރިކަމުގެ ދާއިރާއަށް ގިނަ ހިދުމަތްތަކެއް ކުރެއްވި އަހުމަދު ހާފިޒު ދެމިއޮތުމުގެ އާލަމަށް ދަތުރުކުރެއްވި ހަބަރު އެހީ ފުން ހިތާމައާއި އެކުގައެވެ. އަހުމަދު ހާފިޒު ވަކިވެވަޑައިގަތުމަކީ ދިވެހިރާއްޖޭގެ މަސްވެރިކަމުގެ ސިނާއަތަށާއި ފަންނަށް ލިބުނު ބޮޑު ފަޅުކަމެކެވެ. އެމަނިކުފާނު ވަނީ މަސްވެރިކަމުގެ ފަންނު ކުރިއެރުވުމަށާއި މިނިސްޓްރީ އާއި މެރިން ރިސާޗް ސެންޓަރަށް ގިނަ ހިދުމަތްތަކެއް ކޮށްދެއްވާފައެވެ.“
