ތިލަމާލެ ބްރިޖު މަސައްކަތަށް ބޭނުންކުރަމުން އައި ބޯޓު ”ރުމޭލާ“އަަށް ފައިސާ ދިނުމުގައި އެއްވެސް މައްސަލައެއް ނުޖެހޭކަމަށާއި އެ ބޯޓު މަސައްކަތު ސައިޓުން ފޮނުވާލީ މިވަގުތަށް އެ ބޯޓުގެ ބޭނުންކޮށްގެން ކުރަންޖެހޭ ހުރިހާ މަސައްކަތް ނިމުމުންކަމަށް ބްރިޖު މަސައްކަތު އޮފީހުން ބުނެފިއެވެ. ސޯސަލް މީޑިއާ އާއި އަދި ބައެއް ނޫސްތަކުގައި ބުނެފައިވަނީ ރުމެއިލާ ފުރައިގެން ދިޔައީ އެއަށް ދޭން ޖެހޭ ފައިސާ ނުދިނުމުންނެވެ. ނަމަވެސް ބުރިޖު އޮފީހާއި ސަރުކާރުގެ އޮފިސަލުން ވިދާޅުވެފައިވަނީ އެއީ އެއްވެސް ހަގީގަތެއް ހުރި ވާހަކަތަކެއް ނޫން ކަމަށާއި ބައެއް ނޫސްތަކުން ފަތުރަމުންދަނީ ޒިންމާދާރުކަމެއް ނެތި ދޮގު ހަބަރުތަކެއް ކަމަށެވެ.

ބުރިޖުގެ މަސައްކަތް މިހާރު ގޮސްފައިވާ ހިސާބަށް ބަލާއިރު، ބުރިޖުގައި މިހާރު ކުރިއަށްދަނީ މާލެއިން ބްރިޖު ފެށޭ ހިސަބުގައި ޖަހާ އެއްގަމު ތަނބުތައް ޖެހުމުގެ މަސައްކަތްކަތެވެ. އޭގެ ވަރަށް ބޮޑު ބައެއް ނިމިފައިވާއިރު، މިހާރު ބްރިޖުގެ ސުޕާ ސްޓްރަކްޗާ ޑެކްގެ މަސައްކަތް މާލޭކޮޅުގައި ފެށިފައިވާކަމަށް ބްރިޖް އޮފީހުން މައުލޫމާތު ދެއެވެ. މާލޭއާ ދިމާލުން ކަނޑުގައި ޖަހާ ދެ ތަނބެއްގެ ޕައިލިން މަސައްކަތް މިހާރު ވެސް އަންނަނީ ކުރަމުންނެވެ.
ވިލިމާލެއާ ދިމާއިން ކަނޑުގައި ޖަހާ ހަ ތަނބެއްގެ ޕައިލިން މަސައްކަތް އަންނަނީ ކުރަމުންނެވެ. ހަމައެއާއެކު ވިލިމާލެއިން ބްރިޖާ ގުޅޭ ސަރަހައްދުތައް ހިއްކުމުގެ މަސައްކަތް ކުރަމުން އަންނަނީ ކުރަމުންނެވެ.
މީގެ އިތުރުން ގުޅީފަޅުގައި ވެސް އެއްގަމުގައި ޖަހާ ތަނބުތަކުގެ ޕައިލިން މަސައްކަތް އަންނަނީ ކުރަމުންއަންނަ އިރުބްރިޖުގެ މަސައްކަތް ޝެޑިއުލާ އެއްގޮތަށް ކުރަމުން އަންނަކަމަށާއި އެ ކަމުގައި އެއްވެސް މަޑުޖެހުމެއް އަދި ނެތްކަމަަށް ބްރިޖް އޮފީހުން މައުލާތު ދެއެވެ.




